ROMNYU 6

Kemu Kipon Sila Ai Khrista Nyu Rhünlo

1Kha, tselo nne nyu zo mon? Shwikenjün gü no chon chwiryülo nrün genyu kemu nyu bin ti ole? 2Tsonlo nrün ndi! Nne kemu kipon sikela nyu le nyu tse thyüo tsü nyu yhun sin gunlo tila? 3N gun Khrista Jisu zen-o baptaiz thyülo kelanyu dan, a-zen-o a-kesinyu baptaiz thyülo laso tsekethyü hagun le shamvu ole? 4Tsügenyu nne baptaiz kethyü ka a-kesi zen-o nme thyüo nsunla so; tson-o n Pvügü kekvu le kesinyu dan nyu Khrista thyü nrhün kelo hontse n ai no keyhun keshün thyüo yhunlo nrün genyu.

5Kechamvule nle a-zen-o a-si hontselo yatselo, nle a-zen-o a-le rhünni keso hontse nrün genyu. 6N kemu mi gü nke lao kemu dothyü sinmvulo nrün genyu nle temi whegü pe a-sin-o krus ge hüla so tsekethyü shabin nyo. 7Kechamvule si kelagü tsüle kemu nken laso, tson-o a-thyü ntsenlo laso. 8Ai nle Khrista zen-o sila yatselo nle a-zen-o rhünlo titse tenyen bin nyo. 9Kechamvule Khrista le kesinyu dan nyu rhünni kelo siki sinilo hoso tse kethyü nle shabin nyo; kesi le a-so kekvu bin sinlo hoso. 10A-le si kethyügü tsüle temi aphu genyu kemu kipon gwüngwa nme thyü sila so, ai a-le rhün hü kela keyhun gü we Sunggigü kipon genyu. 11Tsühontse hagun ai kemu kipon sila so, lo Jisu Khrista genyu Sunggigü kipon rhün hü laso tsekethyü rüchünlo nye.

12Tsügenyu hagun thyümin kenyü dan zen mvulo nrün genyu kemu no sila lo kegwa min higü nyu gon bin nya. 13Nmvu ai ntsen kemvu kenyü hontse kethyü thyü mvulo nrün genyu hagun min khi pe kemu kipon shü nya; ai kesinyu dan nyu rhünnilo kela temi thyüo hagun npvü hagun khipe Sunggigü kipon shülo, lo kentsen keseri kenyü thyülo nrün genyu hagun min khipe Sunggigü kipon shülo nye. 14Kemu no hagun so gon loho so; kechamvule hagun le tejvü gü hensin mvule shwikenjün gü hensin bin kela si genyu.

Kentsen Gonyu Thyülo

15Tsenlo dihontse tila? Nle tejvü gü mvule shwikenjün gü hensin bin kela genyu kemu thyü bin ti ole? Tsonlo shvu tsin! 16Sila nrün genyu kemu nmvu ai ntsenlo nrün genyu Sunggigü jo kezen hihvu nme mvue nme go thyüo hagun npvü hagun khipe digü go thyüo a-jo zen tiyo hagun le a-jo zen kehügü do so tsekethyü hagun le sha mvu ole? 17Hagun le gwüngwa nme ka we kemu go thyü hü, ai hagun khini pe senkethyü jo hinyu shükelo hagun yhen thyüo jo hidan zen kelo genyu ale Sunggigü shwen bin nyo. 18Kechamvule kemu nyu hagun shwüshü lao hagun no kentsen go thyülo kela genyu. 19Ale hagun kvu kemvu sha kebin genyu temi jvü rüla nyu hagun ka zo hünyo. Hagun le nduka serikemvu thyülo nrün genyu hagun keyhun khipe nshün kemvu lo ntsen kemvu dothyü gunkeryü hontse, ntsoka ai yhun nshünlo nrün genyu hagun keyhun khipe kentsen dothyülo nye.

20Hagun le nduka kemu do thyü kehü ka kentsen keseri kipon ndi. 21Tsüka hagun le nyu kegwa hyulo la? Ntsoka tsügenyu kejo kebin gwünzin; kechamvule tsüdan genyu kesi hyulo hünyo. 22Ai hagun le ntsoka we kemu nyu chwiryü lao Sunggigü do thyülo laso; tsügenyu hagun thyü kenshün kelo hyulo; lo siki kethonthen kerhün le hagun hon so. 23Kechamvule kemu shün le kesi, ai Sunggigü le n Npugü Jisu Khrista nyu kenrun nyu khipe nketsü gü we kethonthen kerhün gü genyu.

Currently Selected:

ROMNYU 6: REGSBSI

Highlight

Copy