TSIPWESWÜ 7
7
Sharhidan Kerüshvu
1Mosa le Npugü kehü Phika gü thyüpen kelo nyü ter pe Phika gü, tsü kanyü aphu, kershvubin, lo tsü kanyü aphu yün-o thyükenshün lo. 2Tson-o Israel nyu tsipwe ka pfüphun sharhi kentsen, temi swükeshü dan le, 3kerüshvu sen Npugü kiryü: gari tsero lo methu tse tseryü kenyhun, sharhinyu mihvu genyu gari nme lo sharhinyu nme genyu methu tse nme. Anyugun le lesü khikeshü siki, 4Npugü le Mosa ka zoshü, 5“Phika gü ka lotha nyu sen nrün genyu jwe hidan khilo; njüo Levinyu no thatho thyü nrün genyu pe anyugun tsüshülo.” 6Tson-o Mosa le gari lo methutse dan pe Levinyu tsüla. 7A-le gari kenyhun lo methu tse pezi pe Gershon nyu tsü, 8lo gari pezi lo methu tse tetse pe Merari nyu tsü. Anyugun tho aphu Aaron nyugü Ithamar hensin nyu thyü kü ti. 9Ai Mosa le gari nmvue methutse nme-e pe Kohath nyu tsümvu, kenshün kanyü anyugun le ntsen kehü dan tsü pen nrün genyu.
10Sharhi dan le kershvubin gü thyünshün kethyü kehun genyu kerüshvu dan ko senryü. Anyugun le jwe pe kershvubin ka shü titse nda kelo ka, 11Npugü le Mosa ka zoshü, “Jonryü kenyhun jaka khenyütsen sharhi nmeme no kershvubin thyü kenshün kethyü genyu a-jwe khi shüti, tse anyugun ka zoshülo,” tsonshü.
12-83Anyugun le hihontse kekhinkeri thyüo kerüshvu hoshü:
| Jon | Tsipwe | Sharhi |
|---|---|---|
| 1 | Juda | Amminadab nyugü Nahshon |
| 2 | Issachar | Zuar nyugü Nethanel |
| 3 | Zebulun | Helon nyugü Eliab |
| 4 | Reuben | Shedeur nyugü Elizur |
| 5 | Simeon | Zurishaddai nyugü Shelumiel |
| 6 | Gad | Deuel nyugü Eliasaph |
| 7 | Efraim | Ammihud nyugü Elishama |
| 8 | Manasseh | Pedahzur nyugü Gamaliel |
| 9 | Benjamin | Gideoni nyugü Abidan |
| 10 | Dan | Ammishaddai nyugü Ahiezer |
| 11 | Asher | Ochran nyugü Pagiel |
| 12 | Naftali | Enan nyugü Ahira |
Kerüshvu nmeme le sen keryü le a-ken meme: mehaka rakagi khun a-kensu le kilogram nmeo gram pvün lo rakagi khunda a-kensu le gram tsi tetse, shye pe kerüshvu genyu khun kenyhun nren tho pe ter ka kerhün kethyü pe süto tse; tharün kegwa pe sü kethyü suna khun nme a-kensu le gram tsio tseryü; rope kerüshvu genyu methu tsebwe nme, tanyü tse nme, lo tanyü chenme nyu nme; kemu genyu kerüshvu tenyü nme; lo kepvüshe kerüshvu genyu methu tse kenyhun, tanyü tse pvün, tenyü tse pvün, lo tanyü chenme nyu pvün.
84-88Sharhinyu mi tseryü kenyhun le kershvubin gü thyü kenshün nrün genyu kerüshvu sen keryü kerhün keshü le hihontse:
— rakagi khun tseryü kenyhun lo rakagi khunda tseryü kenyhun
kerhün keshü kensu le kilogram nkio tsenyüo gram tsero.
— Suna khun tseryü kenyhun kensu le kilogram nmeo gram shenryü
kenyhun, lo tharün kegwa pe tsüdan sü.
— methu tse tseryü kenyhun, tenyü tse tseryü kenyhun, tanyü
chenme nyu tseryü kenyhun, tsüpe rope kerüshvu thyü nrün
genyu shye pe kerüshvu sin.
— kemu genyu kerüshvu tenyü tse tseryü kenyhun
— kepvüshe kerüshvu genyu methu tse nkipezi, tanyü tse hen-
tsero, tenyü tse hentsero, tanyü chenme nyu hentsero.
89Mosa le Phika günyu Npugü nthon kegü ka, Npugü le Kejozenkelo Khinpha soge cherubin hvu janyu shwikenjünbin ge a nthon kethyü khwe nyülo.
Currently Selected:
TSIPWESWÜ 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
