TSIPWESWÜ 6
6
Nazirit nyu Genyu Tejvu
1Npugü le Mosa ka zoshü 2tejvü hidan pe Israel nyu tsü shülo. Peche nmvue tenunyu ligü higü Nazirit nyu nme thyü titse keswe kerüche thyü lao a-thyü kenshün pe Npugü tsü kela nyu le 3vain zu nmvue tsü nzü la kehü tsü khela mvuloshvu. A-le vain pe kethyü ketsüi lihie tsü nmvue vain sha kerhün nmvue kenko-e tyü loho. 4A-le Nazirit thyü kebin then vain bin ge chwikeryü a-shye nmvue a-yhüe tyü loho.
5A-le Nazirit thyü titse swe kenjü nyu kebin then a-pehü nmvue a-münhü thu loho. A-le gwenkho aphu a-thyükenshün pe Npugü tsü titseo keswe no a-phin kenjü, tsügenyu a-pe lo a-münhü no yhun binlo. 6-7A-pehü tsüle a-le a-thyükenshün pe Sunggigü ketsü zansü, tsügenyu a-le a-pvü, a-jvü, a-tsasikezen nmvue a-lügi yatse-e simin khoka güo a-nrhu lanya. 8A-le Nazirit thyü kebin then a-thyükenshün pe Npugü tsü laso.
9Nazirit nyu khoka temi nme le whütse sikela genyu a-pehü thyükenshün kela tsü nrhu layatselo, a-le jon tsenyü bin lo-o a-pe lo a-münhü thu la mvuloshvu; tson-o a-le nshün loti. 10Jon tetse nyü a-le paro nmvue nsu kenyhun sen Npugü kehü Phika khenpvü ka püshükeda gü ki ryüti. 11Püshükeda güle nme pe kemu genyu kerüshvu lo kecha gü pe rope kerüshvu thyü-o a-le simin kesü kela genyu a-ge thyünshün kelo jvü thyüti. Tsü jon nyü temi güle a-pehü thyü kenshün ni ti 12lo Nazirit nyu nme thyüo a-gwenkho thyü kenshün nipe Npugü tsüti. Gwenkho keri dan tsü swümvu lati, a-pehü thyü kenshün pe Npugü ketsü gü nrhu kela genyu. A-mithyüni kethyü kerüshvu a-le tanyü chenme nyu nme senryüti.
13Nazirit nyu nme le a-keswe thyüpen lolo, a-le rora thyü ti. A-le Phika gü khenpvü ka gü 14a-ge tetsin kendi senru kenshen pe Npugü tsüti: rope kerüshvu genyu tanyü tse chenme nyu nme, kemu genyu kerüshvu tanyü lü chenme nyu nme, lo kepvüshe kerüshvu genyu tenyü tse nme. 15A-le kebu lo shükemvu tensü ko rokhu nme pe rüshvuti. Shye lo vainzu kerüshvu ka senmvulo keshvu soki oliv ter pe tho kerhün pe kethyü tensü thün lo oliv ter pe yün kethyü tensü kerüpvü pe kethyü tensü thün lo oliv ter pe yün kethyü tensü kerüpvü kosin tse.
16Püshükeda güle hi aphusen Npugü kigü kemu genyu kerüshvu lo rope kerüshvu thyüti. 17A-le tanyü tse gü lo rokhu ka tensü tse pe kepvüshe kerüshvu thyü pe Npugü tsüti; a-le shye lo vainzu gü ko pe kerüshvu thyü shüti. 18Phika gü khenpvü ka Nazirit gü le a-pe thu pe kepvüshe kerüshvu rokebin mah soge shüti.
19Tson-o tanyü tse gü bu nilo lo, püshükeda gü le tsü khipe rokhu nyu tensü thün me lo tensü kerüpvü nme kesin-o pe Nazirit gü ben ka shüti. 20Tsüsika püshükeda güle tsüpe jwe kerüche thyüpe Npugü tsüti; tsüle püshükeda gü genyu kenshün kerüshvu nme, tejvu nyu püshükeda gü jün a-nyü lo a-pha nyeki kesin. Tsüsiki Nazirit gü le vainzu tsü logwa.
21Hidan hile Nazirit nyu genyu tejvü; ai Nazirit nyu nme le a-keswe genyu a-le khi keshüi nyeki kerüshvu thyü titse zoshü njü yatselo, a-le zoshwishü kenjü hontse thyü pen mvuloshvu.
Püshükeda güle Jochü Keshü
22Npugü le Mosa ka zoshü 23Aaron lo anyudan ka zoshüo no hihontse jochü pe Israel nyu tsülo:
24Npugü no jochü pe hagun tsü lo hagun nucha lo;
25Npugü no hagun so lo hagun shwinjü keshü gü thyülo;
26Npugü no hagun shwi a-kenyüo nyun kebwe
pe hagun ketsü gü thyülo.
27Npugü le zoshü, “Anyugun le azan sen-o jochü pe Israel nyu ge shü yatselo, Ale jochü pe anyugun tsüti.”
Currently Selected:
TSIPWESWÜ 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
