TSIPWESWÜ 25
25
Peor Ka Israel Nyu Tho
1Israel nyu le Akakia ketejon nyu nsen kebin ka Moab nyu tenunyu zen-o keyüla sola. 2Tenunyu tsüdan le anyugun kope Moab nyu tero kerüshvu keho nyu shü. Tson-o Israel nyu le tyütsü lo tero gü rüshvu. 3Peor ka Baal. Tsügenyu Npugü le anyugun ge anyunta lao 4Mosa ka zoshü, “A jozen-o Israel sharhinyu aphu zenryü nhennyu hüshvu lalo tson yatselo ale temi dan ge anyunta sinmvu lati.” 5Mosa le kerathü nyu dan ka zoshü, “Hagun nmeme tse a-tsipwe ka Peor Baal kerüshvu nyu a phu dushvu lalo.”
6Israel nyu le Npugü kehü Phika khenpvü ka chü kebin ka, Mosa lo anyugun apentha mhundyü nyu Israel nyu nme le Midia nyu tenunyu nme zen-o a-phika nyu ryü. 7Tsontsin püshükeda gü Aaron nyu Eleazar nyu Phenihas le hyu shüo kehun nyu so gü mi nme khilo-o, 8au then yügü a-mi pe au mihvu nren jen kesüla. Hihontseo kenpen le Israel nyu nke kebin khinla, 9ai kenpen higü le temi yie nki pezi boshvu laso.
10Npugü le Mosa ka zoshü, 11“Phenihas le thyü shü kela genyu, ale Israel nyu ge anyunta sin mvu laso. A-le anyeki tero lihie kerüshvu tsü nyhen loho kela genyu, ale anyunkenta ka anyugun nke mvula. 12Tsügenyu ale ryükejü gwenkho aphu nyu a-zenkejozen bin nle tse a-ka zoshülo. 13A-le lo a-tsipwe no kethonthen püshükeda thyüti, a-le akentsun nyu nhen loho lo temi dan kemu jükeshü senryü kethyü genyu.”
14Midianyu tenu gi kesin-o boshvu kela Israel nyu gü zan le Salu nyugü Simeon tsipwe ka kami pe gü Zimri. 15Tenu gi zan le Kozbi. Tsügi a-pvü Zur le Midianyu tsipwe nme ka sharhi gü.
16Npugü le Mosa ka zoshü, 17“Midianyu hüo nke lalo, 18Peor ka anyugun le hagun sa pe gwakemvu thyükela lo Peor ka kenpen gwenkho ka boshvu kelagi Kozbi tse genyu.”
Currently Selected:
TSIPWESWÜ 25: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
