TSIPWESWÜ 22
22
Moab Raja Le Balaam Kokeshü
1Israel nyu le ketuo Jordan npho zin Moab nyu kazü ketejon Jeriko kentsun ka nsenlo. 2Moab nyu raja Zippor nyu gü Balak le Israel nyu le Amor nyu ge thyü keshü lo Israel nyu dikho le hüyo nyülo, 3njüo a-e lo a-temi aphu nshvu sala: 4Tson-o Moab nyu le Midian nyu sharhidan ka, “Thon mvutse danda higü le methu tse le shonphu lvukela hontse ngun kehun hi aphu nke kelai so.” Tsügenyu raja Balak le 5lilo nipe Amaw kazü nyu Eufrates züri khoka Pethor nyu kebin Beor nyu gü Balaam ko shü. Anyugun le Balak ka jolo higü sen gü a-ka zoshü: “Ale nno shanyü kebin le Senye nme apentha Ijipt nyu chwiryü bin nyo; anyugun le liki hiki aphu hen-o agun kazü lo lo kela kenshvu le bin ale. 6Anyugun le agun nyechon, tsügenyu ryüo asunka shochün pe tsü lalo. Tson yatselo agun le anyugun nyeki kvulao a kazünyu anyugun hüshwi lati. Nle jochü shülo mele jochü pfülo, lo nle swetsü lalo mele shochün pfüla kehü ale sha bin nle.”
7Tson-o Moab nyu lo Midian nyu sharhi dan le me swetsü nrün chün sen-o Balaam ki gü Balak jolo pe a-ka, zoshü. 8Balaam le anyugun ka zoshü, “Ntsoje hika binlo, lo senduki Npugü le nyu zoshüyo ale pe hagun ka zoshüti.” Tsügenyu Moab nyu sharhi dan le Balaam zen bin tinla.
9Sunggigü le ryü Balaam ketsoshü, “Nzen kebin hile dikipon nyu la?”
10Tsontsin a-le, “Moab raja Balaam le nipe aki shü bin nle, 11Ijipt ki keryü temi dan le kazü apentha hen lo laso. Tsü genyu a-le ano anyugun swetsü la njüo a-le anyugun zen kegao hüshwila nyü bin nle.”
12Sunggigü le Balaam ka zoshü, “Temi hidan zen gü nya lo Israel nyu dan swetsü nya anyugun le ajochü pfü kehü genyu.”
13Lonyü gü Balaam le Balak lilo dan ki gü zoshü, “Hagun kaki rani gun lalo; Npugü le ano hagun zen gü nyalo tsekela genyu.” 14Tson-o anyugun le rani Balak ki ryüo Balaam le anyugun zen ryümvule tsela le tse zoshü.
15Tsontsin Balak le kerigü nyeki teshwe kepfünyu temi chon kvu nishü. 16Anyugun le Balaam ki gü Balak jolo higü pe a-tsü shü: “Nchenoe thame no nketekhi la nyao aki ryülo. 17Ale nchün thyüsa shüti lo nle nyu zoyo tsü thyü shüti. Nchenoe ryü agenyu temi hidan swetsü lalo.”
18Ai Balaam le a-jokenishü, “Balak le a-rajabin nyu suna raka aphu pe atsü lae, ale tha keshetsin nyue Npugü a Sunggigü johokeshü zenmvulo nrün ndi. 19Ai kechadan hontse hagun cheno-e ntsoje binlo, Npugü le tha peha aka zosin tile nmvuyo shalo nrün genyu.”
20Tsüje Npugü le ryü Balaam ka zoshü, “Temi hidan le nno anyuzen gun lotse nketso ryübin yatselo gwendo lo-o anyuzen gunlo, ai ale nka nyu zoshü yo tsü nti thyülo.” 21Tson-o lonyü gü Balaam le a-gada ge dun-o Moab nyu sharhi dan zen gun.
Balaam lo A-gada
22Balaam le gü kejü genyu Sunggigü le a-nyunta la, Balaam le a-gonyu mihvu zen a-gada gen dun-o güjü, tsüka Npugü lokethyü nyu nme le tsonda nyu so-o tsonkhin lola. 23Gada le tsangge lokethyü güle jenthon sen-o tsonda nyu so kebin hyu shüo, tson tebao low nyu yüla. Balaam le a-gada vüo zen niryü tsonda nyu shüshü. 24Tsontsin Npugü lokethyü güle vain low kenyhun jaka lizin hizin tsokhwe le kebin tson kenrün nme ka so lola. 25Gada güle tsangge lokethyü gü hyushüo tson teba gü tsokhwe ge Balaam pha senla. Balaam le a-gada gü vü nishü. 26Tsangge lokethyü güle nigü tsünye ka lizin hizin nrhilo keshvu bin nme ka sobin. 27Gada le tsangge lokethyü gü hyu shüo jü tsüla. Balaam le anyuntao a-thün pe Gada gü vüso. 28Tsontsin Npugü le jo zolo kegwa kekvu pe gada gü tsü shüo tsügü le Balaam ka zoshü, “Ale nge nyuthyü shüo? Nle hi gwenshen ge avü bin la sela?”
29Balaam le a-jo kenishü, “Nle a nchün ndyü keshü genyu! Ale jenthon sen kehü we ndushvu la nrün.”
30Gada le a-jokenishü, “ale nle nkeyhunthen dun kehü ngada tsü mvu ole? Ale himhundyü nge hihontse hü ole?”
A-le a-jokenio, “Nmvule.”
31Tsüselo Npugü le Balaam no tsangge lokethyü gü le a-jenthon sen-o tsüka so kebin hyulo; tsontsin Balaam le chetsü gü kazü nyu nkhünrün tinla. 32Tsangge jolo gü le Balaam ka, “Nle nyuthyüo hi gwünshen ge ngada vü la? Nle kenjwen higü thyü zümvu kethyü genyu ale ntson khin titse ryüle. 33Ai ngada le ahyulao gwenshen ge tson teba la. Tsonmvu yatselo ale ndushvu lao ngada kenishüla nrün.”
34Balaam le a-jokenishü, “Ale mulaso. Nle tsonnyu so-o a ntsun kebin ale shamvu; ai ale gü zümvu yatselo kaki rani la tile.”
35Ai Tsangge lokethyü gü le zoshü, “Temi hidan zen gülo, ai ale nno nyu zolo tseshü yo tsü nti zolo.” Tson-o Balaam le anyugun zen gun.
Balak Le Balaam Zenkelo
36Balaam le ryükejü Balak le nyülo njüo gü Moab terhi ki Arnon züri seki Ar nyida ka a-teno. 37Balak le a-ka zoshü, “Nyuthyüo ale me nishü keri gü ka ryümvula? Ale nchün thyü kekü pe ntsü lomvu ado tse rüchün ole?”
38Balaam le a-jokenishü, “ale ryüla mvu ole? Ai ale nyu kekvu le bin mon? Sunggigü le ano nyu zolo tseshüyo ale tsü zo keloi gwenzin.” 39Tson-o Balaam le Balak zen-o Huzoth nyida nyu gunla, 40tsünyu Balak le methu lo tanyü dushvuo thyü peha pe Balaam lo a-zen kehü sharhi dan tsüshü.
Balaam Sidyüjo Kerigü
41Tsüsinyü lonyü gü Balak le Balaam zen-o Bamoth Baal ki kü, tsüka bin-o Balaam le Israel nyu peha hyu.
Currently Selected:
TSIPWESWÜ 22: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
