MIKAH 1
1
1Jotham, Ahaz, lo Hezekia hidan le Juda raja thyükehü ka jo higü lope Moresheth rünyi nyu keryü gü Mika tsüshü. Npugü le Samaria lo Jerusalem genyu hidan aphu pe Mika tsü shü.
Samaria lo Jerusalem Genyu Nyungwakemvu
2Hi nyü shülo, senyedan;
higü nyüshülo, kazünyu yhun kehü nyu aphu!
Aphusokekvu Npugü le nmuti.
Nyülo! A-le A-kenshün Kerüshvuka nyu bin-o zobin nyo.
3Npugü le a-kenshün Kerüshvuka nyu bin-o ryüjü;
a-le tsüryüo kazüthundan gen kedüti.
4Tsonlo chün le mah ka zunla kehü
hontse kazüthundan le zun lati;
tsüdan rincho gen züle tsun tsü kebin hontse
kazüketejon ki tsü lati.
5Hidan aphu thyüti, Israel nyu le mu lo Sunggigü nren kethyü genyu. Israel le Sunggigü nrenkela genyu segü nmu zü ola? kazü nyidagü Samaria le! Segü le Juda nyu keyüla kemu thyüla? Jerusalem a-npvü! 6Tsügenyu Npugü le zo, “Ale Samaria nke kebin pe kendo thyüo, vainlow ketsü bin thyü lati. Ale nyida gü nyu tso dan no kazüketejon gü nyu nsotsü lati, tson-o nyida gü no a-npvü ndo lati. 7Tsünyu teromenkezü kegwa dan vüren kebun la, tha khipe a-kershvuka nyu keyüla chün ketyü rüshvu kela dan tsü mah no rola, lo teromen kezü aphu khe kendo lati. samaria le a-keyüla chün ketyü tho genyu tsüdan hyulo, lo ntsoka we shwikerüchün nyu le rüshvu nrün genyu tsüdan pvüo bin peha ki tinla tiso.”
8Tsüselo Mika le zo, “Higü genyu ale nyungwamvu lo chechü ti. Anyun kenjünkethyü pe hishü nrün genyu ale apha kenchon lo kenben tsonchüti. Ale mesükerun hontse nra lo Ostric hontse khun ti. 9Samaria tejünshvu le pon loho, lo Juda jo tsühontse kenjün thyüti. Kenke le atemi le yhunkehü Jerusalem khinrun ti laso.”
Shwikerüchün Le Jerusalem Kho Nni Bin laso
10Agun le kvulomvu kela pe Gath ki shwikerüchün nyu ka zo nya; anyugun no nkechü hyunya. Beth Leaphra temidan, kemphü nyu yhon-o nshekese pe hishülo! 11Shaphir temidan, kenben lo kejo-o me kazü ki tinla lo. Zaanan ki yhunkehü dan no pecheo anyugun nyida nken chwiryü nya. Hagun le Bethezel temidan le nyungwakemvu khwen nyülo yatselo tsünyu keno ndi so le tse shalo ti. 12Maroth temidan le ryüye kelo khwenloho bin, kechamvule Npugü le nmhesa kethyü kenke senryüo Jerusalem kho nni bin laso. 13Keru lope kerugari gen dyüshülo. Nle Israel kemu hontse thyüo Jerusalem no muhü. 14Tsügenyu Juda temidan, Moresheth Gat rünyi zenkekho jo zo lalo. Israel rajadan le Achzib rünyi ki keche hyulo kemvui le.
15Mareshah temidan, Npugü le hagun khipe hagun shwikerüchün nyu, hagun lola nrün nyu ben ka shüla tiso. Israel sharhi zan chwisa kethyü nyu le tin gü Adullam kazü kü ki kebuti. 16Juda temidan, hagun le sokehü nyenyu genyu nyungwamvuo hagun pethu lalo. Güda hükendi hontsela lo, kechamvule hagun nyenyu tenzen-o me kazü ki tin lati.
Currently Selected:
MIKAH 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
