JOEL 1
1
1Higü hile Npugü le jolo khipe Pethuel nyugü Joel ketsü.
Temidan Le Shyeni Nkekela Genyu Kechü
2Hagun peshünyu ju, nyüshü lo;
Juda kazü nyu kebin aphu nyülo.
Tha hihontse kethyü le hagun bonnyu
nmvue hagun gwünkho ka thyü ole?
3Hagun nyenyu ka tsü rüla pe zolo;
anyugun le anyenyu ka zoti,
tsüdan le shenhe kechagü ka zolo ti.
4Tsekhvudan kechacha le hagun low jebin;
a-dan nme le khekela gü tsüle dan kechagü le tyüla.
5Chonso-o chülo, hagun kenzeü nyu;
nralo, hagun zu ketsünyu;
vainzu keshün thyülo nrün dan nke laso.
6Tsekhvu dan nme le ngun kazü whenlo laso;
a-nyugun le kvusa lo sülobu keho;
a-nyugun hü le shünyho hüyi kegwa hontse.
7Tsüdan le ngun vainyhun nkela
lo ngun khürobindan tyübu laso.
Tsüdan le a-yhü tsobula
a-rodan le chonla kemvuthen.
8Chülo, hagun temidan, lünyu nme le
a-lo titse kebin peche gü kesi chechü kebin hontse.
9Shyeni lo vainzu lope Kerüshvuka nyu
rüshvu nrün ndi laso;
Peshükedadan le nyugwamvubin,
anyugun le thape Npugü rüshvu nrün ndi kela genyu.
10Low dan le ndo laso,
Kazü gü le nyungwamvu laso kechamvu le low nkela,
vainsha le tsenla, lo oliv bin le rügu kela genyu.
11Nyunkenjün thyülo, Low ketsünyu;
Chülo, vainlow nucha kehüdan,
kechamvule thoshe lo barley,
ele, shyeni aphu nke laso.
12Vain lo khürobin le rügu laso;
terasha bin aphu pen-o sila so.
Temidan shekerhün le ndiso.
13Ronphi ben-o chülo,
kershvubin nyu lotho thyü kehü ju!
Kerüshvuka nyu güo khünsin chülo!
Shyeni nmvue vainzu pe hagun Sunggigü rüshvu nrün ndiso.
14Nyün nrün ahza hoshülo;
temi kokequen shü!
Sharhidan
lo Juda temi aphu kequen pe
Npugü hagun Sunggigü Kerüshvuka nyu shüo a-ka hilo.
15Npugü jon le khonni laso;
Kekvutsin gü le kenke senryü nrün jon gü tsüle.
Tsüjon tsü ketetsin kethyü dihontse ryü tiyono!
16Ngun shyeni nkekela ka ngun keche ndila.
Ngun Sunggigü Kerüshvuka nyu shekerhün ndiso.
17Thatsidan le kazü kesin nyu tenla.
Shyeni pe kequen keloi ndila,
tsügenyu süsen kenrun dan le renla.
18Methu dan le kenjünthyüo nhobin,
a-nyugun chvu ndikela genyu,
tanyü dan-e kenjünthyü binso.
19Ale chüo nka hibin le, Npugü,
kechamvule jonyü lo senbin le silaso,
mah le rokela hontseo.
20Tehenthyüe chü nrao nka hibin nle
kechamvule rinyu dan-e sinlaso.
Currently Selected:
JOEL 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
