HOSEA 7
7
1“Ale atemi Israel thyü ngwa shü lo anyugun thyüpe gwakenye nishü nyü kesoka, ale anyugun rigwakemvu lo anyugun gwakemvu nti hyulo gwünzin. Anyugun le khinyunyu sa; lo khinyunyu ka rhen-o rühu; anyugun le tsonda nyu mehon seülo hü. 2Ale tha gwakemvu hi aphu rüchün binti tsonkethyü le anyugun kerüchün nyu ndi; ai anyugun kemu le anyugun hunpvübin, lo ale anyugun hyumvula loho.”
Rajabin Nyu Tedo Rhikethyü
3Npugü lezo, “Temi dan le anyugun do gwakemvu pe raja gü lo a-hensin kedanyu sahü. 4Anyugun aphu kelekelu lo mejozenmvu. Anyugun le me nrhikethyü le tensüketsen nyu le tensü le gwala kemvuthen nmhü nnyü mvula-e mah le mahphoun nyu khubun kebin hontse le. 5Rajagü keho jonkeda nyü anyugun le zu lope raja gü lo a-hensin kedadan no tsü nzeü lo phin lahü. 6Ele, anyugun le tedo pe mahphoun nyu mah hontse robin hü. Anyugun nyunkenta le khünsin khubun ntseo lonyü gü nnyülo hü nyo.
7“Anyugun nyunta ritsin-o anyugun so kekvukesennyu boshvula. Anyugun raja dan le nmeme tse boshvu bu bin laso, ai nme-e aka keche himvu.”
Israel Lo Senyedan
8Npugü le zo, “Israel temidan le tensü tsenpha kethyü hontse. Anyugun le a-nyu kehun senyedan nngüo bin hü, 9lo sinrünyi nngüo keyhun genyu anyugun kekvu ndibin kela shalomvu. Anyugun jondan sülo binso, ai anyugun le tsüe shalomvu. 10Israel temi ketekho le nrao anyugun ntsun bin. Tha lihi aphu thyüshülae anyugun le Npugü anyugun Sunggigü aki rani ryümvu. 11Israel le tha shakemvu tsegi hontse nyebin; a-temi le Ijipt keche hi teri, lo tsüsika Assiria ki tin gü! 12Ai ale joh süren shüo tegü keten hontse anyugun le gükejü ka tenlo lati. Ale anyugun tho gwakemvu genyu shaja pe tsü lati.
13“Anyugun we thyü loso! Anyugun le akhela lo a ntsun bin laso. Anyugun le nke lati. Ale anyugun kenilo nyü, ai anyugun le akerüshvu tsüle ketsinkemvu. 14Anyugun le ketsin thyüo aka himvu, ai anyugun le tsü sunka kazü nyu nkhüntsüo tero kerüshhvu nyu hontse nyungwakemvu thyü hü nyo. Anyugun le shyeni lo vainzu hikethyü ka teromenkezü kerüshvu nyu hontseo anyugun npvü anyugun jün hünyo. Anyugun le a nren pe ditsükhi thyübin yo! 15Anyugun zenchwiryü lo thyü nko keshü gü le ale, ai anyugun le a ntsun hü. 16Anyugun le akipon ranio kekvu kendi tero kipon tinla kvuri. Anyugun le tholevü njükemvu senlo kemvui hontse. Anyugun sharhinyu le ketekho-o kenthon kehü genyu anyugun le sigwakemvu thyü siti, lo Ijipt nyu le anyugun shwinyü ti.”
Currently Selected:
HOSEA 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
