HOSEA 4
4
Npugü Le Israel Nyu Nmu Kethyü
1Npugü le kazü higü nyu yhunkebin nyu nmu kethyü jo nme le bin. Npugü le zokebin jo nyüshülo, Israel: “Kazü günyu joketsin kesen nmvue keso ndilaso, lo temidan le alope Sunggigü letse mvu laso. 2Anyugun le swe-o gwünrho lahü, anyugun le nku, dushvu, rühu lo keyüla hü nyo. Thyüzükela le chonkvu bin, lo me dushvu zin bin nyo. 3Tsügenyu kazü gü le sin lati, lo tsünyu yhunkebin tha lihie silati. Nyukhu, tegü, lo tsehü-e aphu silati.”
Npugü le Peshükedanyu Nmu Kethyü
4Npugü le zo, “Nme-e no temi dan nmu nmvue tsinrho nya ale hagun Peshükedanyu ge kenya kethyü le bin. 5Kheje khentsenyü hagun le zozübin, lo sidyükeshanyu-e hagun nyeki kegwa thyümvu. Ale hagun jvu Israel nke lati. 6Atemidan le thyülo binso, kechamvule anyugun le ale tse shahü kemvu genyu. Hagun peshükedanyu le ashalo nyümvu lo asenkethyü khela, tsügenyu ale hagun khela lo hagun nyenyu le adenzin peshükedanyu letse kemvuiso.
7“Hagun peshükedanyu le chon kvulo kemu thyüpe a ntsun chon kvu gwünzin, tsügenyu ale hagun kerühvu kelupe kejokepvü thyü shüti. 8Hagun le atemi kemu nyu nnyakenye bin nyo, tsügenyu hagun le anyugun no kemu thyüchon kelo hagun kenyü bin laso. 9Hagun le temidan shaja hontse hyuloti! Ale shaja pe hagun tsüo hagun no hagun tho gwakemvu thoti. 10Hagun le kerüshvu tho nyu hagun jün tyüti, tson-e nnyon binti. Hagun le yhun chvukelo tero rüshvuti, tson-e hagun nyenyu nditi, kechamvule hagun le tero kecha rüshvu titseo rani laso.”
Npugü Le Terokecha Kerüshvu Nkhin Kethyü
11Npugü le zo, “Zu, keshün lo a-when-e tsüpvüo atemi no ntsenkelo thyülo mvu laso! 12Anyugun le tesen keshen nme ka thape anyugun teshashü lotse hihü! Thün nme le anyugun le shanyü kebin gü pe zoshü hü! Anyugun le akhelaso. Nyeginyu nme le keyülachün ketyünyu thyütin kela hontse anyugun le anyugun khipe tero kecha tsü laso. 13Kazüthun gen bin kenshün dan ka anyugun le kerüshvu tho thyühü, lo rinchodan ki anyugun le senbin kethon lo a-shwakechon le kebin hensin rünkenyi rohü nyo, kechamvule tsüdan sun le nyunyü!
“Tsü genyu hagun nyu tenunyu ju le keyüla chün tyü, lo hagun monyu dan ko keyüla tho thyü hü nyo. 14Ai ale tsügenyu shaja pe anyugun tsü loho, hagun le kerüshvuka nyu keyülachün ketyü nyu zen-o tinla, lo tsüdan zenkerhün-o hagun le tero kecha kerüshvu tho thyü. Thakesha jo nyu zokehü hontse, ‘Thashalo kemvu temi le nke lati.’
15“Hagun Israel temi le aka joketsin senlo mvula-e, Juda we no tsü hontse thyüzüla nyata, Gilgal nmvue Bethaven ka rüshvu nya, nmvue tsünyu rhünkehü Npugü zan nyu keswe thyü nya. 16Israel temi le gada nyu nyunkerü hontse. Ale dihontse tanyü nyu le shonphu sütyü kehü hontseo anyugun ginthyü lo mon? 17Israel temi le teromenkezü kekvu hensin nyu bin laso. Anyugun no anyugun tson nyu gülo. 18Zu kechon tsükelo sika, anyugun le anyugun keyülachün ketyü thonyu anyugun kenyü tin lao, kerü-hvu gümvuo kejokepvü gü le anyugun kenyü lahü. 19Anyugun le tsangkenbu le whünsen tinkela hontse lati, tson-o anyugun le terokecha kerüshvu thodan genyu keja lati.
Currently Selected:
HOSEA 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
