GALATIANYU 5

Medo Thyüsinmvu Titse Hagun Kolo Laso

1Medo thyümvu nrün genyu Khrista le nhoshü laso, tsügenyu ndo sa binlo, lo do gunda kekhen no hagun gunda khenni nya.

2Hire, ale Paul ale hagun ka zo hünyo, hagun le hagun girü pvülo la yatselo hagun le Khrista kipon kenrun thyü laso. 3Lo ale a-gikerünyu aphu rüla zonishü güzhü nyo, anyugun le tejvü gü thyü lo zen külo mvulo shvu laso. 4Hagun tejvü genyu kentsen nyu thyülo tile tse kehü ju, hagun le Khrista kipon we a-kenrun thyü laso, lo hagun le shwikenjün gü nrhi laso. 5Ai nle Kapu gü genyu tenyen-o kentsen nle nnyü kehü gü khwen bin nyo. 6Kechamvule Jisu Khrista kipon we nle girü pvü metse girü pvü mvu metse thame thyü keloi ndi, ai nyunkebwen sen-o tha thyü kehü ketenyen gü le.

7Hagun le nduka we hagun yhenthyü so are; segü le hagun no ketsin gü jo zen nyalo tseo hagun khinla ole? 8Hagun nyun thyü pe hihontse keshü hile hagun ko kehü gü kanyu loho. 9Kebu keshanyu nme genyu tensü pvü aphu punlo hünyo. 10Ale hagun no hagun nyun kecha thyüla nyalo tseo Npugü genyu hagun tenyen hünyo. Ai lihigü thyüe hagun ketekhi kehügü tsüno kenjünthyü ti.

11Ai apvünyu ju, ale ntsoka we gikerü zope me senthyü hü yatselo mele nyu tsethyüo a nshwen hü nla? Tsü zope me senthyü hü yatselo, krus le me ketekhi kethyü gü le bin mvu lati so. 12Hagun nyun thyü nshvu kethyü nyu no a-npvü a-khikholo kela we akenyü kvula ti.

13Lo hire, apvünyu ju, medo thyü mvu nrün genyu hagun kolo laso, ai hagun le dothyü kemvu tsügenyu nthyü nmin kendo thyüla mvule, nyunkebwen sen-o khinyunyu lothyülo nye. 14Kechamvule n kazonkazin nyue sope n npvü nkeso hontselo, tsonkethyü jo nme hinyu tejvü aphu penlo kela genyu. 15ai hagun dan nyu kenka, keten ketyü, le bin yatselo hagun peha le nkela mvu nrün genyu hagun petsülo nye.

Kapu Rasha Lo Thyümin Tho

16ai ajo le hi, Kapugü no hagun zen binlo, tsonlo yatselo hagun le nthyü nmin kendo kenyü thyü tinla loho. 17Nthyü nmin gü tsüle Kapugü kenyü kemvu tsü nnyü hünyo, tsühontse Kapugü ko nthyü nmin kenyü kemvu gü tsü nnyü hü, kechamvule tsühvu tsüle keshwi rüchün kethyü genyu. Tsügenyu hagun le hagun kendo thyüla loho. 18Tson-e Kapugü no hagun zen hü yatselo hagun le tejvü gü hensin bin mvu laso.

19Lo nthyü nmin le thyü kehü ju tsüle gingvü tse bin hünyo. 20Lo tsüdan tsü le keyüla, nshünkemvu, teromen züshüo rüshvu kethyü, temvu kethyü, keshwi kerüchün, kega kethyü, me kegwa shwipe nyhükethyü, nyunkenta, dan kechacha kethyü, kejozen kemvu, kendo kechacha kethyü, meno nnyeki gwanyü kemvu, nzeü kethyü, nzeüo kengüo kejokepvü tho kethyü, hidan hi lo tsühontse kethyü kecha-e sin. 21Tsüdan tsü genyu ale nduka hagun ka zokeshü hontse nthu ko hagun senthyü shü güzhü nyo, temi lihigüe tha tsühontse kethyü thyü kehünyu le Sunggigü keda nyu a-jün hyulo ho.

22ai keso, nkenyü kethyü, kengü kegwa, nnyun thon kethyü, me shwinjün, njvü kegwa, kejotsin, kvukemvu, kekheni kethyü, hidan hile Kapugü rasha dan. 23Tejvü nme-e hidan hi shwipe a-kenyü kemvu ndi. 24Tsüntimvule temi lihigüe Khrista Jisu no nkekheni pe a-hon thyülo kehünyu le nthyü nmin lo nle nnyü kehü gü sin pe krus ge hü laso. 25Nle Kapugü genyu rhün hü yatselo, Kapugü no nzen binlo nu! 26Nle khinyunyu kenyü kemvu thyü lo khinyu no khinyu nyeki gwanyü mvuo kvu nthün mvulo nu.

Currently Selected:

GALATIANYU 5: REGSBSI

Highlight

Copy

Compare