EZEKIEL 36
36
Israel Ge Sunggigü Jochü
1Npugü le zo, “Silakehü temi gü, Israel kazüthun ka zo-o anyugun no ale zokebin jo nyülo. 2Aphu sokekvu Npugü le anyugun genyu zo nrün le bin le: Israel kenrhinyu le anyugun nshwen-o zo, ‘Ntsoka we nduka bin gun keryü rincho dan tsü le agun honso!’
3“Aphu sokekvu Npugü ale zokebin hi pe sidyü zo-o tesha shülo. Israel kazon nyu senye dan le anyugun kazüthun nkhen-o nke kethyü ka, anyugun aphu Israel kemeni. 4Tsügenyu ntsoka we ale Aphu sokekvu Npugü le hagun ka zokebin hi nyülo.hagun kazüthun lo rincho dan, rinyu lo ketejon dan, nkekela bin dan, hagun kehun senye dan le nke pe shwikenyü thyüo khekela nyida dan.
5“Aphu sokekvu Npugü ale anyuntasa tse hagun hun kebin senye dan ntsun bin, lo Edom gü ntsun kvu bin nyo. Anyugun dyükentsü thyü lo shwinyüo a kazü lo pe anyugun hon thyülo.
6“Tsügenyu Israel nyu ka sidyü zolo: Kazüthun, rincho, rinyu, lo ketejon ka zolo, Aphu sokekvu Npugü ale senye dan ale anyugun nshwen lo sümvu kethyü genyu anyunketegi zobin nle. 7Aphu sokekvu Npugü ale hunpvü kebin senye dan kemeni la titse zoketsin thyü bin nle. 8Ai Israel nyu kazüthun ki we senbin le a-nyüsen-o a-sha nsha pe hagun a temi Israel tsü ti. Hagun le whütse kaki ryü la tiso. 9Ale hagun denzin hü, lo ale hagun no low tsü-o ntsi pe shüni lola tsentsü ti. 10Ale hagun no chvü kenye ti. Hagun le nyida nyu yhun-o nke kela aphu thyüni loti. 11Ale temi lo senru no chonkenye loti. Hagun no himhundyü nyeki chon loti, tson-o ntsenyu kechon bin loti. Ale hagun no yhun kenyü hontse yhun loti, lo ale hagun no keri ka nyeki gwakenye loti. Tsüka hagun le ale Npugü letse shati. 12Ale hagun a temi Israel dan zenni ryüo kazü gü nyu yhunti. Tsü le hagun npvü hagun kazü thyü ti, lo hagun nyenyu no khün nyon ni loho so.
13“Aphu sokekvu Npugü ale zo: Temi dan le kazü higü lope temi tenketyü nyu letse ko kehü, lo anyugun le kezo le kazü tsü gü le ntsenyu rühu hü tse zo kehü tsü le ketsin. 14Ai ntsoka gerho tsü le temi tenketyü nyu thyüo hagun nyenyu rühu loho so. Ale Aphu sokekvu Npugü, ale zo laso. 15Kazü tsü gü le thame ka-e senye dan le a-kenkhin khwenyü nmvue mele a-shwikenyü hyu loho. A-le a-senye nyenyu rühu sin loho so. Aphu sokekvu Npugü le zo laso.”
Israel Keyhun Keshün
16Npugü le aka zo. 17“Silakehü temi gü, Israel nyu le anyugun kazü nyu yhun kehü ka anyugun keyhun jvü lo anyugun tho genyu tsü nrhula. Ale anyugun jvü tsü rüchün pe tenunyu le shye tsen tenunyu jvü thyüo nyünyü jvü nyu nshün mvukela tsü hontsela sele. 18Anyugun le kazünyu me dukeshvu kemu thyükela lo teromen pe tsü nrhu kela genyu anyugun no anyunkenta kekvu shalo. 19Ale anyugun keyhun thojvü genyu anyugun nkhin la,lo ale anyugun kenjün pe sinrünyi kazü ki shüla. 20Anyugun kegü bin aphu nyu kejokepvü khipe a zan kenshün nrhu, kechamvu temi dan le zo, ‘Temi hidan le anyugun Npugü Sunggigü le khipe anyugun ketsü kazü khela ti.’ 21Tsügenyu ale a zan kenshün gü genyu anyun nkhila, kechamvule Israel nyu le anyugun kegü bin aphu nyu a zan nrhula.
22“Tsügenyu Israel nyu ka Aphu sokekvu Npugü ale anyugun genyu jolo le kebin pe zolo: Ale thyü titse kebin hile hagun Israel nyu genyu mvu, ai a zan kenshün gü hagun le kegü kazü aphu nyu kejokepvü pe shükela gü genyu le. 23Hagun le kejokepvü pe shükela a zan kegon gü kenshün khipe senye dan hikeshü ka anyugun le ale Npugü letse sha loti. Aphu sokekvu Npugü ale zo laso. Ale hagun sen-o senye dan mhundyü ale nshün letse hishü ti. 24Ale senye lo kazü aphu ka hagun zen niryüo hagun kazü nyu shü lati. 25Ale zü kenshün pe hagun ge kezen shüo teromen kerüshvu lo hagun nrhu kela aphu nyu hagun sükenshün shüti. 26Ale nyun keshün lo kerüchün keshün pe hagun tsüti. Ale hagun nyunkerü kenko khila-o jokezen nyun pe tsü lati. 27Ale a kapu pe hagun ge shüo hagun no ale johokeshü pe hagun ketsü tejvü aphu then loti. 28Tsonlo hagun le ale khipe hagun pvübon nyu ketsü kazü gü nyu yhun loti. Hagun le a temi thyü loti, lo ale hagun Sunggigü thyü ti. 29Ale hagun nrhu kehü aphu nyu hagun kenilo lati. Ale shyeni no chonlo lotse joho shüti, hagun no chenda thyüni mvu nrün genyu. 30Ale hagun terashapenro no nsha chonkenye loti, tson-o hagun no senye dan nyu chenda thyü pe kejopvü mvu nrün genyu. 31Hagun le hagun jvü gwakemvu lo thyüzü kela dan rüchün ni loti, lo hagun le hagun kemu lo thyüzü kela dan genyu ntsü lati. 32Israel, ale hagun no ale thyü kebin dan hile hagun genyu kemvu letse shanyü. Ale hagun no hagun le thyü kebin tho dan genyu kejo lo kemeni kethyü shalo nyü bin nle. Aphu sokekvu Npugü ale zo laso.”
33Aphu sokekvu Npugü le zo, “Ale hagun kemu aphu nyu hagun sükenshün la lo ale hagun no hagun nyida dan ka yhun nilo lo hagun no nkekela dan thyüni loti. 34Hagun lojvü pvüthü kehü nyu aphu tehen le zün lo rükela hyu kü laso, ai ale hagun no tsü dan tsüni loti. 35Temi aphu, kazü higü le tehen thyü kela le dihontseo Eden chwi hontsela, lo nyida dan nke lo lapvü tinkela dan le temi le yhun lo chwida khwenilolayo tse zoti. 36Tsüsika kazon nyu senye dan rhün kelo nyu le Npugü a higü ale nkekela nyida thyüni lo low tsümvukela nyu tsünilo hü letse sha loti. Npugü a higü le higü thyü titse zoshwila lo ale thyü ti.”
37Aphu sokekvu Npugü le zo, “Ale Israel no gwüngwa aka keche hiti, lo ale anyugun no chon pe tanyü dan hontse loti. 38Nyida ntsoka nkekela dan tsü le tsüki we temi le sü pe Jerusalem le gwüngwa tanyü le chonsa pe nga ka rora khishü kelo hontse ti. Tsüsiki anyugun le ale Npugü le tse shati.”
Currently Selected:
EZEKIEL 36: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
