EZEKIEL 35
35
Sunggigü Le Shaja Pe Edom Ketsü
1Npugü le aka zo. 2“Silakehü temi gü, Edom kazü nkhin shülo. 3Temi dan ka Aphu sokekvu Npugü ale zokebin hi lope zoshülo:
Ale nkenrhinyu le, Edom kazüthun dan!
Ale n nkeshü lati.
4Ale nnyida dan no nke pe khela
Lo n kazü no nrun lati;
Tsüsiki nyu nle ale Npugü letse sha loti.
5“Nle Israel nyu nrhizin hü lo a-kemu genyu shaja kenkhin gü a-kenke gwünkho ka me no a-temi dushvu. 6Tsügenyu Aphu sokekvu Npugü ale rhün kehü Sunggigü, kesi tsü le njün, lo nle tsü nrhi loho. Nle me dukeshvu genyu thyüzü laso, lo dukeshvu tsü le nthen ti. 7Ale Edom kazü rincho dan tsü no nke lati lo lihigüe tsünyu njwen kehü gü boshvu lati. 8Ale simin lope kazüthun kesü thyü lati, tson-o kega kethyü nyu sikela nyu le rincho dan lo ketejon sü ti. 9Ale nthyü pe kethonthen kenke thyü lati, lo nme-e nnyida nyu yhunni loho. Tsü ka nle ale Npugü letse sha loti.
10“NLe Juda lo Israel senye lo au kazü tsü le nhon lo nle tsü pe nhon thyü ti tse hü nyo, ale Npugü, au Sunggigü thyü kehü kae. 11Tsügenyu ale Aphu sokekvu Npugü, ale rhün kehü Sunggigü ketsin genyu ale nnyunkenthün, nnyunketegi, lo a temi ntsü kethyü chün pe ntsü ti. Anyugun le nle anyugun ka thyü keshü tho genyu ale shaja pe ntsü bin nle tse sha loti. 12Tsüsika nle, Israel nyu kazüthun dan le nke laso, lo nle tsü lola titse nkhin-o zokeshü tsü Npugü ale nyülo la letse shati. 13Nle rigwamvu lo kemakin-o a zenkentsun a nkhin kethyü jo ale nyülo.”
14Aphu sokekvu Npugü le zo, “Ale n nkesa shüo kazü apentha nle chekela genyu sherhün ti, 15nle a hon, Israel nyu nkekela genyu n sherhün kethyü hontse. Seir kazüthun dan, e. Edom kazü aphu nke lati. Tsonlo temi aphu ale Npugü le tse sha loti.”
Currently Selected:
EZEKIEL 35: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
