EZEKIEL 11
11
Jerusalem Nmu Laso
1Sunggigü kapu gü le azen-o Kershvuka khinrun nphozin gü. Tsünyu khinrun khoka ale temi nkio pvün lope Azzur nyugü Jaazaniah lo Benaiah nyugü Pelatiah senye sharhi hvu sin-o hyu. 2Sunggigü le aka zo, “Silakehü temi gü, temi hidan hile nyida higü nyu gwakemvu rhi, tsontsin zü kehü dan le. 3Anyugun le zo, ‘Agun le whütse ka dan thyüni tiso, Nyida gü le henla hontse, lo ngun le tsünyu thyü hontse le, ai tsü le mah nyu ngun nokhin shü hü.’ 4Tsügenyu silakehü temi gü, anyugun keni lalo.”
5Npugü kapu gü le a ketsenlo, lo Npugü le ano jolo higü zoshü lotse shü: “Israel temi dan, hagun le nyu zo lo rhibin yo ale shabin. 6Hagun le nyida higü nyu temi chonritsin dushvu lao tsonda nyu simin le sü laso.
7“Tsügenyu, Aphu sokekvu Npugü a higü le hagun kazo bin nle. Nyida higü le henla ketsin, ai thyü gü le nyu la? Hagun le dushvu kenjü simin dan tsü le! Hagun le hinyu bin loho- ale nyida hinyu hagun khishwi lati! 8Hagun le zhethon nshvu hü le? Ale zhethon kepen temi zenryüo hagun wheti. 9Ale nyida nyu hagun khishwi lao pe sinrünyi nyu ben nyu shü lati. Ale hagun no sila titse laso. 10Hagun no hagun kazü hinyu terinyu si lati. Tsonlo temi aphu ale Npugü letse shati. 11Nyida higü hile la le mahnyu thyü nokelo hontse hagun no loho. Ale hagun le Israel kazü lihika bin-e shaja pe tsüti. 12Hagun le ale Npugü letse sha loti, kechamvule hagun le hagun khoka kebin senye dan jvü zen kethyü nyu a tejvü gwünrho lo ajohokeshü zenmvu laso.”
13Ale sidyüjo zo nsen, Pelatiah le chetsü gü sila. Ale kazü nyu nkhünrün tsü gü nrao, “Kemvui, Aphu sokekvu Npugü! Nle Israel nyu nsen kenjü aphu boshvu titse bin le?”
Sunggigü Le Zoshwi pe Donyu Kebindan Ketsü.
14Npugü le aka zo. 15“Silakehü temi gü, Jerusalem nyu keyhun temi dan le nle lo npvünyu Israel nyu me kazü ki yhun kebin nyu rüla kerabin. Anyugun le zo, ‘Donyu me kazü ki yhun tinkela nyu le Npugü rüshvu titse kethyü le nithen sa laso. A-le ngun no kazü gü lo laso.’
16“Tsügenyu ale zokebin jo hi lope me kazü ki yhun tinkela npvünyu ka zoshü lo. Anyugun no nithen ki senye dan kazü ki yhunlo tse nishü kela gütsü le ale. Tson-e gwünkho keshanyu jaka we anyugun le gü kela kazü ki tsü anyugun zen bin ti.
17“Tsügenyu Aphu sokekvu Npugü a higü le zokebin hi lope anyugun ka zoshü lo. Ale anyugun hükezen shü kela kazü dan nyu anyugun kequen lo lati, lo Israel kazü khi nipe anyugun tsü lati. 18Anyugun le rani ryü lo, anyugun nshünkemvu lo kentsükenchen, teromen, anyugun le sen kehü dan khela ti. 19Ale nyun keshün lo kerüchün keshün pe anyugun tsü lati. 20Tsonlo anyugun le ajvü dan then lo joketsin nyu a johokeshü dan zentin lati. Anyugun le a temi lo ale anyugun Sunggigü thyü ti. 21Ai ale nshünkemvu lo kentsükenchen teromen rüshvu nyü kehü dan shaja pe tsü lati. Anyugun le thyü keshü dan genyu shaja pe tsüti.” Aphu sokekvu Npugü le zo laso.
Sunggigü Zankechwi Kethyü Le Jerusalem Nkenla
22Cherubim le nyeso, lo kerüpha dan le tsü dan sithen gü. Israel Sunggigü kehü keben gü le anyugun ge bin. 23Keben gü le nyida kheo kelu sen-o nphozin kazüthun ki gü la. 24Tsemin ki tsü Npugü kapu gü le azen nigü Babilon nyu kazü ki shüla. Tsüselo tsemin gü le ndila, 25lo ale Npugü le pe ahikeshü aphu pe me kazü ki kebin dan ka zo.
Currently Selected:
EZEKIEL 11: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
