EZEKIEL 10
10
Npugü Zankechwi Le Kershvuka Nkenla
1Ale Cherub soki tsangneki tsü nrishü, lo tsü soki tsü Safir pe kethyü rajakhün hontse nme le bin. 2Sunggigü le linen phi ben kehü gü kazo, “Nyukhu dan hensin ki kerüpha janyu yüo mahgi kenhon pe nben sülo. Tson-o mahgi tsü pe nyida gü ge kezen shülo.” Ale a-le gü kethyü nri bin. 3A-le yü kethyü ka cherub le Kershvuka tesinzin sobin, lo khülukesü le a-nyuzin tsennu gü sü bin. 4Npugü keben gü tsü le cherub dan ge chwiryü lo ketu sen-o Kershvuka nyu keyütson ki güla. Tsüselo khülukesü le Kershvuka gü süla, lo tsennu tsügü nyu keben gü le ben shü. 5Cherub kenye khwen gü le tsennu ngwen gü ki-e nyülo. Tsü le Kekvutsin Sunggigü khwen hontse.
6Npugü le linen phi ben kehü gü no cherub dan ki kerüpha jaka mahgi kenhon peha khülo lo tse johokeshü ka, temi güle güo kerüpha nme khoka solo. 7Cherub nme le a-ben keto pe anyugun dan nyu mah le kebin bin nyu shüo mahgi peha khü pe temi linen pi keben gü ben nyu shü. Temi gü le mahgi khilo-o tinla.
8Cherub nmeme sekin hensin nyu temi ben hontse kethyü kebin ale hyu. 9-10Ale tsünyu kerüpha pezi le kebin ko hyu, aphu kenme, lo nmeme le cherub nmeme khoka bin, kerüpha dan tsü le tso minketsen hontse ben bin, lo tsü dan aphu kerüpha nme le nme kehüsü kü bin. 11Cherub le nnu keshü ka rani mvutse lihikie gülo. Anyugun aphu kentsin -o rani mvu tse gükenyü denzin gü. 12Anyugun min, seren, ben, sekin lo kerüpha aphu yhütyü le sü. 13Kerüpha hidan hile ale tsemin kerigü ka kehyu kenme.
14Nmeme le a-mhun pezi zi, keri gü le methutse, kenyhun gü le temi, kenshen gü le shünyho lo pezi gü le logi mhun hontse. 15(Tsü dan tsü le ale Khebar züri khoka kehyu dan.) Nyukhu dan tsü le tsangneki soshü, 16lo nnushü, lo kerüpha dan-e tsü dan then. Anyugun le sikin sükhun shü, lo kerüpha dan-e anyugun then bin. 17Nyukhun dan le sunla lo kerüpha dan ko suntin la; lo nyukhu dan le nyelo, kerüpha dan le tsü dan then, nyukhu dan le tsü dan ketsen kehü genyu.
18Tsüselo Npugü kehü keben gü tsü le Kershvuka nyu keyütson tsü khelao nyukhun dan soki küla. 19Ale nribin nsen anyugun le nye sen-o kazü so küla, lo kerüpha dan le tsü dan then hü. Anyugun le Kershvuka khinrun nphozin ki tsü, sun gwa tinla, lo keben gü tsü le anyugun soki bin. 20Ale Tsü dan kehyu le Khebar züri ki Israel Sunggigü hensin nyu nyukhu kehyu dan tsü le tse shalo.
21Anyugun nmeme le mhun pezi, sekin pezi, lo nmeme sekin hensin temi ben hontse kethyü le bin. 22Anyugun mhun le Khebar züri nyu ale nyukhu kehyu mhun gwünzin. Nyukhu nmeme tse njüo gü.
Currently Selected:
EZEKIEL 10: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
