EZEKIEL 1
1
EZEKIEL LE TSEMIN KI SUNGGIGÜ HYU KERIGÜ
(1:1—7:27)
Sunggigü Rajakhün
1Chen shenryü gü shyezi gü ka jonpvün nyü püshükeda gü Buzi nyugü Ezekiel, a higü le Babilon kazü nyu Judanyu donyu dan zen-o Khebar züri khoka bin. Tsüka tsang le kashü, lo ale Sunggigü hyu. 2(Tsü le Raja Jehoiakim zen-o dothyü tinkela chen pvün ka.) 3Babilon nyu tsü Khebar züri khoki Npugü le akenthon khwen nyü lo a-kekvu shalo.
4Ale nrishü kethyü ka teso kipon tsangkenbu terhi le ryü kejü hyu. Tsangkechwü le nmhukezün nyu chwiryü, lo tsü kehun tsang le nhonben bin. Tsangkechwü le chwikeryü ka tsü tha nme le lazo kenshwen hontse bin. 5Tsangkenbu terhi lvu ka tsü temi joja hontse rhünkehü nyukhu pezi le kebin ale hyu, 6tsü dan nme me tse a-mhun pezi, sekin pezi pvü hü. 7anyugun pha le njü, lo anyugun tsen le methu tsen hontse. Tsü dan le lazo shon nshwen kela hontse. 8Anyugun mhun pezi lo sekin pezi nyeki anyugun nmeme ge ben pezi le bin sekin nme hensin nyu nmeme. 9Nyukhu nmeme tse a-sekin kenyhun sükhun-o a-ra no keti pe quenzi thyü ketun bin. Anyugun le gü kethyü ka anyugun min no rani mvuo dan me thyü gü lahü.
10Rhün kehü nyukhu nmeme tse a-mhun kechacha pezi: mhundyü zin temi, njüzin shünyho, ngwazin methutse, lo sizin logi mhun. 11Nyukhu dan nmeme tse a-sekin shahvu sükhun pe a-ra le a-khoka kebin gü kensü, lo sekin shahvu keju pe a-min sun. 12Nyukhu nmeme tse quenzi nren ntsun, tsügenyu a-dan gü le lihizin ntsun nmvue anyugun le gü kenyü kipon rani mvutse gü logwa.
13Nyukhu dan nyu tsü bensa kethyü nme le nnusun bin. Lo mah keben gü le tsangkechwü nishwishü. 14Lo Nyukhu dan tsü le keben kenmhen gü zen-o tin nsin nshe hü.
15Ale nyukhu pezi dan tsü nri kebin ka ale kerükehü pha pezi hyu, lo nmeme le nyukhu nme khoka bin. 16Kerükehü pha dan aphu kenme; aphu tso minketsen hontse nshwen, lo kerüpha kecha nme le nme lvu nyu kehüsü kübin, 17lo kerüpha dan tsü le quenzi aphu gü logwa. 18Kerüpha dan ge yhütyü le kesü thyü bin. 19Nyukhu dan le nnu shülo kerüpha dan-e nnu, lo nyukhun dan le sun shülo kerüpha dan-e tson. 20Nyukhu dan le gü kenyü bin ki gü, lo kerüpha dan-e nyukhu le nyuthyü yo tsü gwünzin thyü, nyukhu dan le tsü dan ketsen kebin genyu. 21Tsügenyu nyukhu dan le nyu cheka nnu, sun, nmvue lu ge so layo kerüpha dan-e tsü hontse thyü.
22Nyukhu dan soki kristal kenshwen pe kethyü tsang hontse le bin. 23Lo tsü hensin nyu nyukhu dan le bin, aphu anyugun sekin kenyhun sükhun pe kecha gü ti lo sekin kenyhun pe anyugun min jepvü bin. 24Ale tsü dan kenye khwenyü; tsüle zükeda kentyü, rihü danda lo Kekvutsin Sunggigü khwen hontse. Anyugun le nyemvu lalo, anyugun sekin keju lola, 25ai anyugun so ge tsangki tsü thakhwen nme le ryü bin.
26Tsang tsü soki Safir pe kethyü rajakhün hontse, lo tsü ge dun kebin gü le nripe temi hontse. 27Lo tsügü joja le ben pe laso pe mah nyu ro kebin hontse. Lo tsü le ben pe aphu ben bin, 28lo tsünyu zengo jvüja aphu bin. Keben tsügü le Npugü le kehü tsinshü.
Currently Selected:
EZEKIEL 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
