CHWEKETIN 40
40
Npugü Kehü Phika Gü Thyüpen lo-o Khikho Pe Npugü Ketsü
1Npugü le Mosa ka zoshü. 2“Shye kerigü Jon kerinyü Npugü kehü Phika gü tsü thyülo. 3Johokeshü kon tseryü le kebin Kejozenkelo Khinpha pe shü la-o kesunphi gü pe sunla. 4Miz gü senryü shüo tsü kanyü dan pe a-soge shüla. Lo makenben bin senryü makhin pe a-ge dunla. 5Tharün kegwa ro nrün suna pe kethyü kershvubin gü senryü Kejozenkelo Khinpha gü mhundyü ka shüo Phika gü khenpvü nyu kesunphi pe hüsü shü. 6Rope rüshvu kehü kershvubin gü pe Phika gü mhundyü ka shü. 7kesüla khunda gü pe Phika lo kershvubin au jaka shüo zü pe sü shü. 8Kamhun kehun thyülo-o khenpvü ka kesunphi hüsüshü.
9“Tson-o yün kehü terzü kenshün gü pe Phika gü lo tsünyu kanyü dan aphu yün-o thyü kenshün la lo tsüle nshün lati. 10Tsüsika kershvubin gü lo tsü kanyü aphu yün-o thyü kenshün la, lo tsü le nshün pen lati. 11Tsühontse kesü khunda gü lo a-kedunbin ko thyü kenshün lati.
12“Aaron lo anyu dan zenryü Phika gü khenpvü ka shüo, anyugun no zülu kenshün la lotse zoshü. 13Püshükeda phinya pe Aaron nben shü, terzü pe a-yün shülo, tson-o a-no püshükeda thothyü alothyü nrün genyu a-thyükenshün lo. 14A-nyudan zenryüo bola pe anyugun nbenshü. 15Tson-o terzü pe anyugun pvü keyün hontse anyugun yünshü, anyugun no püshükeda tho thyü alothyü nrün genyu. Anyugun yünkeshü hile ryükejü gwenkho aphu nyu anyugun no püshükeda thyü lati.”
16Mosa le Npugü le zokeshü hontse aphu thyülo. 17Tsügenyu anyugun le Ijipt nkenchwi keryü chenhvu ka shye kerigü jon kerinyü, Npugü kehü phika gü penso shü. 18Mosa le a-phasin penshe shü, a-rundan pe dunshü, kenpere dan pe shülo tson-o kachon penso shü. 19Npugü le zokeshü hontse a-le kehen phi gü sükhun pe henshü, lo tegwenzin a-so kehen pe hen shü. 20Tson-o a-le tsopon hvu tsü khipe Kejozenkelo Khinpha gü nyu shü. A-le kepenvü pe Khinpha gü raho nyu nnashü lo shwikenjün bin gü pe a-so shü. 21Lo a-le Khinpha gü pe Phika günyu shüo kesunphi hüsüla. Npugü le zokeshü hontse a-le Kejozenkelo Khinpha gü süsun la.
22A-le miz gü pe Phika nyu kesunphi tegwenzin teso kipon shü, 23lo Npugü kerüshvu tensü gü pe tsüge shüla, Npugü le zokeshü hontse. 24A-le makenbenbin pe Phika günyu tesin zin miz gü kepento ka shü, 25tson-o tsüka Npugü mhundyü nyu makhin dan nbenshü, Npugü le zokeshü hontse. 26A-le suna pe kethyü kershvubin gü pe Phika günyu kesunphi mhundyü ka shü, 27lo Npugü le kezo hontse tharün kegwa roshü. 28A-le Phika gü khenpvü nyu kesunphi gü pe hüsüshü, 29lo kesunphi gü mhundyü ka rope rüshvu kehü kershvubin pe shü. Npugü le kezo jontse tsüge rope kerüshvu lo shyeni pe kerüshvu thyüshü. 30A-le kesü khunda gü pe phika lo kershvubin au jaka shüo zü pe tsü sü shü. 31Mosa, Aaron lo a-nyudan tse tsüka anyu pha-ben süla. 32Npugü le anyugun ka kezo hontse, lihi gwenkho ka-e anyugun le Phika gü nmvue kershvubin ka kegü ka, 33Mosa le kamhun kehun thyüpe Phika lo kershvubin gü hunshüo kamhun nyu keyü khenpvü ka kesunphi hüsü shü. Tson-o a-le thatho aphu thyü penlo.
Nmhu le Npugü Kehü Phika Gü Sokebin
(Tsip 9:15-23)
34Tsüselo nmhu gü le Phika gü hen la lo Npugü kehü keben güle tsü sü lola. 35Hi genyu Mosa le Phika gü nyu yülo mvula. 36Israel nyu le Phika gü so nmhu gü le kü lalo anyugun kensenbin kelao kechaki gü hü. 37Nmhu gü le kebin then anyugun le kensenbin tsünyu ketu tin hümvu. 38Anyugun le njwen kehü then Phika gü so ge Npugü le kehü nhenyu lo nmhu le bin lo kheje ki lo mah le nnyü kebin hyu hü.
Currently Selected:
CHWEKETIN 40: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
