AMOS 3
3
1Israel temi, a-le Ijipt nyu senye apentha zen-o chwiryü keladan, Npugü le hagun rüla zokeshü jo higü nyülo: 2“Kazü senye aphu ka ale sha lo nucha kehü le hagun npvü. Tsühontse kethyü genyu hagun kemudan le ketetsin thyü laso, tsügenyu ale shaja pe hagun tsümvu loshvu.”
Sidyükezogü Tho
3Mihvu le keteno titse ndo mvuo njwe kentsin hü ole?
4Shünyho le thame tenlo mvutse chün nyu nra hü ole?
Shünyho nyu le tha hyulo mvuo a-kü nyu nho hü le?
5Tegü le mele chwa pe nsenkemvu sen ka mila hü ole?
Chwa le thame bokhe shümvuo kela hü ole?
6Nyida nme nyu terikethyü shu khun shülo temi dan le nshvu mvula hü ole?
7Npugü le nishü mvutse kenke le nyida gen ryüla hü ole?
Aphusokekvu Npugü le a-kerüchün pe a-gonyu sidyüjo kezonyu teshamvuo thame thyü hümvu.
8Shünyho le nho shülo segü le nshvu mvulo gwa tila?
Aphusokekvu Npugü le jozoshülo, segü le a-jo zomvula lo mon?
Samaria gen Kenjünkethyü
9Ijipt lo Ashdod rajabin nyu yhunkehünyu ka zoshülo: “Samaria hunkebin rinchodan ki kequenlo, tson-o tsünyu kevüsa lo thyüzüsa kebin tsü nrishülo.”
10Npugü le zo, “Temi hidan le thyüzü lo tha gwakemvu thyüo khikelo kanyü pe anyugun kedabin kesü thyübin. Anyugun dihontse joketsin zotiyo shamvu. 11Tsügenyu shwikerüchün nyu le anyugun kazü hunlo-o anyugun chwida boren-o kedabin nyu kanyü dan pvütin lati.”
12Npugü le zo, “Tanyükekhwenyu le shünyho le tanyü tentyü kela siki a-phashahvu nmvue a-nyetin nme nti hyulo kehü hontse, Israel temi kerho ntile Samaria nyu noh minketsen gen nngü kebin hyuloti. 13Nyülo, lo Jakob tsipwen ka zoshü,” Aphuso Kekvu Npugü le zo. 14“Ale Israel nyu kemu genyu shaja pe anyugun ketsü jonyü, Bethel ka kershvubin nke lati. Kershvubin a-quen aphu bokholao kazünyu chekü lati. 15Ale kenda ka lo ntsükerin ka nkelati. Chunhü pe nthyü kenjü kadan le cheo nkelati; ka kedadan aphu nkelati.”
Currently Selected:
AMOS 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
