AMOS 2
2
Moab
1Npugü le zo, “Moab temi le mu lo muni laso, tsügenyu ale shaja pe anyugun tsü tsentsüti. Anyugun le Edom rajagü rudan rühvu mvuo tsüdan rope mahchu thyüla. 2Ale mah nipe Moab kazü gen shüo Kerioth chwida kekhwen roshe lati. Moab temi le shüpahü nyu le shü khun lo teri khwen thyüo nra keshü ka silati. 3Ale Moab so kedagü lo kazü tsünyu sharhi aphu boshvu lati.”
Juda
4Npugü le zo, “Juda temi le mu lo muni laso, tsügenyu ale shaja pe anyugun tsütsentsüti. Anyugun le a senkethyü jo rühvu mvu lo a johokeshüdan zenmvu laso. Anyugun bonnyu tero kenku dan no anyugun tsontsin kecha laso. 5Tsügenyu ale mah nipe Juda gen shüo Jerusalem chwida kekhwen roshe lati.”
Israel gen Sunggigü le Kenjünkethyü Khikeshü
6Npugü le zo, “Israel temi le mu lo muni laso, tsügenyu ale shaja pe anyugun tsü tsentsüti. Anyugun le gonyu, mepu tholo kehonyu, rhodyüo phaje-e hilomvu nrün nyu pe jwela hü. 7Anyugun le kvukemvu nyu lo keche kendinyu kedülao tsünyu rhokedyü chwenshwi lahü. Pechenyu nme lo a-pvü au le gogi nme zen-o serimvula, tson-o azen kenshün bo nrhu. 8Kerüshvu bin aphu nyu pechenyu le rhokedyünyu le a-pu thokeshü phi ben-o jü. Anyugun, mele pisa pe anyugun tsü nrün nyu ka zu khi kelo pe anyugun Sunggigü kerüshvuka nyu tsü.
9“Ai, a temi dan, hagun genyu ale Amor nyu sedar sen hontse thon, lo teshosen hontse kenko dan nkebula. 10Ale Ijipt nyu hagun zenchwiryü, chen henzi hagun zen-o kazü kesi nyu gü, tson-o Amor kazü pe hagun hon thyü lotse pe hagun tsü. 11Ale hagun nyu peche peha kejü pe sidyükeshanyu thyü, lo hagun selo peha no Kenshün nyu thyü lotse shü. Tsüle ketsin le mvu la, Israel nyudan? Ale Npugü, tsü zo laso. 12Ai hagun le Kenshün nyu no zu tsü, lo sidyükeshanyu no ajo zonya lotsela. 13Tsügenyu ale hagun boshwen pe kazü nyu shü lati, tson-o hagun no gari le shye pe a-khvu jon nsusa pvü kehü hontse nrati. 14Tin nmhenlo kehünyue nrhilo mvu lati; kenko nyu le a-kenko ndila, lo shüpahü nyu le a-npvü a-keyhun-e kenilomvu lati. 15Levü kepen nyu le a-bin thyülo mvu lati, lo keru gen tin kehü nyu-e rhün loho. 16Tsüjonyü shüpahü kenkotsin nyu-e a-kanyü hoshü lao tinti.” Npugü le zo laso.
Currently Selected:
AMOS 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
