ROMETE 3
3
Kalhnate Dawnna
1Ahihleh Juda mi'n hamphat tuamna bang ahia aneih tuan? Zeksum leng bang ahia aphattuamna? 2Bang lam peuh ah aphatuam hi; Pathian thute akiang ua kepsak a a-om ziak ahi pen. 3Mi khenkhatte'n ginna nei kei mah le uh, bang ahi tuan a eita? Agintaklouhna un Pathian muanhuaina bangmah lou in abawl tuan a hia? 4Bawl tuan lou hial! Pathian midiktak hita hen, michih zuauthei hi uhen:
“Nang na thugen in siam na tang thei a,
vaihawm a na om in leng na zohtheihna ding in,”
chih gelh bang in.
5Himahleh i diktatlouhna in Pathian diktatna a hihlat semleh bang i gen dia? Pathian in mi agawt in, midiktat lou ahi hia? Mihing dan bang in ka gen ahi. 6Hilou hial! Huchibang hitaleh, Pathian in khovel vai bangchi in ahawm dia?
7Himahleh ka zuauthu gen ziak a Pathian thu dikdan amah hih thupi khop hial a alat sem ngalleh bang achia kei leng mikhial bang a siam louh tansak a om lai ka hia? 8Bang achia, ahon hek ua, mi khenkhat in gen louhpi hon gensak bang un, “Thil hoih ahong tuntheihna ding in thil gilou i hih ding uh,” chi a i gen zawk louh? Huchibang ching mite'n siam louh atan uh adik him ahi.
Mi Tengteng Chinlouhna
9Ahihleh amau sang in i hoihzaw khol ua hia? Hoihzaw lou hial. Judate leh Grikte khelhna sikha a om vek in tuma in leng i ngohta vele;
10“Kuamah midiktat himhim
a-om kei uh, khat leng a-om kei uh;
11kuamah theisiam himhim a-om kei uh, kuamah Pathian
zong himhim a-om kei uh.
12Ahilou lam ah apial khinta ua,
bangmah phatuam lou in a-om khinta ua,
kuamah thil hoih hih himhim a-om kei uh,
khat lel leng a-om kei uh,”
13Agawl uh han kihong ahi a;
alei un khemna thu agen uhi.
Akamsung uah gulgu a-om hi.
14Akam uh hamse lohna leh thukha in adim hi.
15Akhete uh sisan suah ding in akinsuan uhi;
16Alampite uah manthatna leh gimthuakna a-om a;
17khamuanna lampi athei kei ua,
18amit uah Pathian launa a-om kei, chih gelh bang in.
19Dan in bangpeuh agen a, dan thuthu a omte kiang a agen ahi chih i thei uhi; kam chiteng adaihsak theihna ding in leh khovel a mi tengteng Pathian vaihawm a a-omtheihna ding un. 20Huchi in “Dan thilhihte ziak in mi kuamah amitmuh in siamtang in a-om kei ding uhi,” dan tawn in khelhna theihna ahong om hi.
Ginna Ziak A Diktatna
21Himahleh tu'n bel dan leh zawlneite na theihsak Pathian dikna dan tel lou in hihlat in a-omta hi. 22Huai tuh Jesu Khrist gintak ziak a, agingtate tengteng a dia Pathian diktatna ahi. Lamdanna himhim a-om kei. 23Mi tengteng in thil ahihkhelh ziak ua Pathian thupina atan zoh louh nung un, 24Khrist Jesu a om tatna ziak in, hehpihna a athawn a siamtansak in a-om uhi. 25Amah tuh asisan ziak a thuphatawina hi in, ginna a muh ding in Pathian in aluikheta hi. Hiai tuh Pathian dikna latsakna ding ahi, ama'n adohtheihna ziak a nidanglai khelhnate apaikan tak ziak in. 26Huan amah ngei adik a, chih leh Jesu a ginna neimi siam atangsak chih chetna ding in.
27Na ki-otsakna uh koi a om ahia le? Posiah in a-omta. Bang dan in ahia le? Thilhihna dan in hia? Hilou hial, ginna dan in ahi zaw hi. 28Huchi in dan thilhihte ziak hilou in, ginna in mihingte siamtansak in a-om chi in i sep uhi. 29Pathian, Judate Pathian kia ahi hia? Zentelte Pathian leng ahi sam kei a hia? Hi e, Zentelte Pathian leng ahi. 30Pathian khat kia ahih ziak in; ama'n zeksumte aginna ziak un, zeksumlouhte aginna ziak un siam atangsak ding hi. 31Huchi ahihleh hiai ginna ziak in dan bangmah lou a bawl i hi uhia? Bawl lou hial! Dan tuh i hihkip zaw uhi.
Currently Selected:
ROMETE 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
