ROMETE 2
2
Judate Khelhna
1Huaiziak in mihing aw, miselhat kuapeuh himah lechin paulam himhim na nei kei hi. Midang na selna mah ah nangmah leh nangmah siam louh na kitan hi. Nang selhat in leng huchibang thilte na hih sam ngal hi. 2Huchibang thilhih nakte tung ah Pathian' vaihawmna diktak in atung, chih i thei uhi. 3Mihing aw, huchibang thilhih nakte gensia, nang leng huchibang na hih sam ngal nak a, Pathian' vaihawmna pelh na kigingta a hia? 4Ahihkeileh Pathian hoihna kisikna a nang hon pi ding a om ahi chih thei lou in, ahoihna, athuaktheihna leh adohtheihna hauhnate na ngaineu a hia? 5Himahleh na lungtang khauh leh kisik utlouhnate ziak in, na tung ah thangpaihna na kholkhawmte Pathian' vaihawmna diktat hong kilatna, thangpaihna ni chiang a ding a kholkhawm ahi zaw hi. 6Pathian in michih athilhih bang zel un ahawmsak ding; 7Thil hoih hih teitei a, thupina leh pahtawina leh manthat theihlouhna zong mite kiang ah tangtawn hinna ape ding hi. 8Himahleh genhakte, thutak zui lou a, gitlouhna zui zawte tung ah, hehna leh thangpaihna, haksatna leh lungkhamna thupitak a-om dia; 9mihing thil hihkhial tengteng kha tung ah a-om ding, Juda mi kha tung ah a-om masa ding a, huan, Grik mi kha tung ah a-om nawn ding hi. 10Himahleh, thil hoih hih peuhmahte kiang ah thupina, pahtawina, khamuanna piak ahi ding, Juda mi kiang ah piak ahi masa ding a, huan, Grik mi kiang ah ahi nawn ding hi.
11Pathian in mi deihsak tuam anei ngal kei hi. 12Kuapeuh dan nei lou a thil hihkhial, dan lou in amangthang ding hi; kuapeuh dan nei a thil hihkhial, dan bang in vaihawm in a-om ding. 13Dan zami phette Pathian mitmuh in midik ahi kei ua; dan zuite midik ahi zaw ding uhi. 14Dan nei lou Zentelte'n amau pianpih a dan thilte ahih un, amau dan nei kei mah le uh, amau leh amau dan in akinei tawm uhi. 15Alungtang uah dan thilhih gelh ahi chih langsak ding in asia-le-pha theihna un atheihpih hi; alungsimte un leng theihpih ahih ziak in angaihtuahna un siam louh atangsak hiam siam atangsak zel hi. 16Ka tanchinhoih gen bang in, Pathian vaihawm ni chiang in mihing thugukte, Jesu Khrist ah angaihtuah ding hi.
Judate Leh Mosi Dan
17Himahleh nang Juda na kichi a, dan a kinga in Pathian na suang hi. 18Adeihlam na thei a, thil hoihzawte hoih na sa a, dan a hilh in na om a, 19nangmah mittawte pipa, mial lak a omte vakna hi in na kigingta hi. 20Dan ah pilna leh thutak omdan na theih ziak in, mipilloute hilhpilpa, naungekte hilhpa in na kigingta hi. 21Huchibang na hih ngalleh nang midangte hilhpa, nangmah na kihilh kei a hia? Nang guta lou dia mite hilhpa, nang na gu nak maw? 22Nang angkawm lou dia hilhpa, nang ang na kawm maw? Nang milim hopa, nang milim tempul a thilte na gu nak maw? 23Nang dan suangpa, nang dan a na tatlek ziak in Pathian na hihminse zel ahi maw? 24“Pathian min noumau ziak in Zentelte lak ah gensiat in a-omta hi,” chi a kigelh bang in.
25Dan zuipa na hihleh zeksum aphatuam ngial hi; dan a talekpa na hihleh bel, na zeksum sum louh bang phet ahong hita hi. 26Huaiziak in zek sumloumi in dan thusehte azuihleh azeksum louh, sum bang a sim ahi kei dia hia? 27Huan amau sa a zeksum louh in dan azuih kim uleh, nang dan thu gelh leh zeksum nei ngal a dan a talekpa ahon mohpaih kei ding ua hia? 28Alang lel a Juda mi hih zaw Juda mi tak ahi kei a; alang a sa lel a zeksum zaw zeksum tak ahi tuan sam kei hi. 29Himahleh alang lel hilou a, Juda mi zaw, Juda mi tak ahi; huan zeksum tak, lungsim a sum ahi, laigelh thu phet ah hilou in, kha ah ahi; huai mi'n mihing phat aloh kei a, Pathian phat aloh zaw ahi.
Currently Selected:
ROMETE 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
