NASEPTE 24
24
Judate'n Paul Ahekna Uh
1Huan ni nga nung in siampu lianpen Ananias ahong tungsuk a, upa kuate hiam toh, amin Tertullas thugen siam khat toh; Paul tung a thubuai gam-ukpa kiang ah agen uhi. 2Paul asapkhiak nung un Tertullas in amah ahek pan a, “Felik hoihpen, nangmah vang a khamuang petpet a ka om ziak un leh na hon kepna ziak a hiai namte a ding a kipuahthakna a-om zel ziak in, 3chik lai peuh in koipeuh ah leng lungkimtak in ka pom gige uhi. 4Akoi abang hitaleh, nang a dia chimtakhuai hih ka ut kei hi, na migitna in thu kam khat ahihleh hon ngaihkhiaksak ding in ka hon ngen hi. 5Hiai mihuathuaipi, khovel a Judate tengteng tokbuaipa leh Nazarit mite pawl a amakaipen khat uh ahih ka thei uhi. 6Tempul hihbuah leng atum a; huaiziak in ka man uhi. 7Ka dan bang ua atung a vaihawm tum zaw hi ung a, himahleh sepaih heutu lianpen Lisias ahong kuan a, thagum suah in ka khut ua kipan alakhia a, atung a thubuai neite na kiang a hong pai ding in thu apia hi. 8Nangmah ngei in amah dongtel in ka hekna tengteng uh na theithei ding hi,” achi hi. 9Huan Judate'n leng huai thu huchibang ahi, chi in apanpih uhi.
Felix Leh Drusilla Ma A Paul Thugen
10Huan gam-ukpa'n thugen ding a Paul akhutvantak in, hichi in adawng a, “Ama'n nang kum tampi hiai namte vai hawmsakpa na hi chih ka theih ziak in kipaktak in ka siamna thu ka gen ding ahi. 11Jerusalem a Pathian be ding a ka hohtouh nung ni sawm-le-nih aval nai kei ding chih na na thei ding hi. 12Tempul ah hiam sinagog ah hiam, khua ah leng mi kuahiam ka sel leh mipi ka hanthawn lam amau zong ahon mu kei uh. 13Tu'n ah leng ahon hekna thu uh na theih in abul asuikhe thei kei ding uh. 14Himahleh hiai thu na kiang ah ka genkhe ding, Dan leh zawlneite thugelh tengteng gingta in, pawl tuam achihte uh Lampi dan bang in ka pipute uh Pathian ka be zel hi. 15Pathian ah lametna nei in, hiai mite'n leng huai agintak sam uh, midiktatte leh diktatloute thohnawnna a-om ding hi. 16Huchi ahih ziak in Pathian leh mihing tung a hihkhial lou ding in sia-le-pha siangtak nei ding in ka kibawl gige hi.
17“Huan kum tampi nung in ka chipihte kiang ah thilpiak ding leh thillat ding hon tawi in ka hong hi. 18Huai thil ka piak lai in, Asia gam a kipan Juda mi khenkhatte'n mipi pang lou leh buaina om lou in, tempul ah kisiangsak in ahon mu uhi. 19Hiai mite'n ka tung a thubuai nei hi le uh na ma ah hong pai in ahong hek khinta ding uhi. 20Ahihkeileh hiai mite ngei in vaihawmte ma a ka din lai in, ka hihkhelh bang ahia amuh uh, gen uhen. 21Alak ua dingh a, ‘Misi thohnawnna thu ah tuni in na ma uah salh in ka om ahi,’ ka chih a hiai thu kam khat ziak houh ahih kei ngalleh, chi in adawng hi.”
22Huan Felik hiai thilte azak a, Lampi thu atheihchet ziak in, “Sepaih heutu lianpen Lisias ahong tunsuk hun chiah na thu uh ka lem ding,” chi in akoih tadih hi. 23Sepaih zaheutu kiang ah, Paul zalentak leh alawmte amah hong veh leh nek-tak abawlsak utte kham lou a, vensak ding in thu apia hi. 24Huan ni bangzah hiam nung in Felik ahong nawn a, azi Drusilla, Juda numei toh, Paul asamsak a, Khrist Jesu ginna thu angaikhia hi. 25Paul in diktatna thu, kidek thu, thukhen vaihawmna hong tung dingte asuipih detdet lai in, Felik in lauhuai asa mahmah a, “Pai nawn phot inla, hunlem ka neih hun chiang in ka hon sam ding,” achi hi. 26Paul in dangka apiak peuh alamen a, huaiziak in asam mun hial a, ahoupih zihzeh hi. 27Himahleh kum nih akivei sung in Porsias Festas in Felik mun ahon kheng a; Felik in Judate deihsakna ngah a-ut ziak in, hensa in Paul anuseta hi.
Currently Selected:
NASEPTE 24: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
