NASEPTE 23
23
1Paul in vaihawmte a-en kilkel a, “Unaute aw, tuni tan in Pathian mitmuh a ahoih lam hi a ka theih peuhmah hih in ka om hi,” achi hi. 2Huan siampu lianpen Ananias in, Paul kiang a dinghte kiang ah, akam betsak ding thu apia hi. 3Paul in akiang ah, “Nang baang nuhngou bang lelpa, Pathian in ahon beng zaw ding, nang dan bang a vaihawm ding a tu a, dan lou bang a mi bet ding na chi vial maw?” achi hi. 4Huan akiang a dinghte'n, “Bangziak a Pathian siampu lianpen tai?” achi uhi. 5Paul in, “Unaute aw, siampu lianpen ahi chih ka thei kei a ahi; na chipihte vaihawmte tung ah thuhoih lou gen ke'n, chih gelh ahi ngal a,” achi hi.
6Paul in akhen Saddukaite, akhen Pharisaite ahi uh chih atheih in vaihawmte lak ah akikou a, “Unaute aw, Pharisai ka hi, Pharisai tapa leng ka hi; misi lametna leh thohnawnna thu ah vaihawmte mai a dinsak a om ka hi,” achi hi.
7Huai agentak in, Pharisaite leh Saddukaite ana kisel ua, vaihawmte akilangkhenta uhi. 8Saddukaite'n, misi thohnawnna a-om kei, angelte, khate leng a-om tuan kei, achi ua; Pharisaite'n huaite teng a-om vek chih agen uhi. 9Huai thu in nakpitak in abuaita ua; Pharisaite lam a mi laigelhmite khenkhat adingh ua; asel ua, “Hiai mi bangmah agitlouhna i mu kei uh; kha hiam angel hiam in akiang a thu gen hileh, eite Pathian dou suak ding i hi uh,” achi uhi.
10Huan kituahlouhna lianpi ahong omtak in, sepaih heutu lianpen in Paul abohzan khak uh alau a, sepaihte kiang ah, ava hohsuk a, alak ua kipan giahbuk a va pitouh teitei ding achi hi.
11Huan azan in, Paul kiang ah Toupa adingh a, “Khamuangtak in om in, Jerusalem a ka thu na theihsak bang in Rome ah leng na theisak ding hi,” achi hi.
Paul Thah Sawmna
12Huan khua ahong vaktak in Judate apanghuan ua, Paul athah masiah uh bangmah ne lou dawn lou ding in akichiamta uhi. 13Huai thubawlte sawmli sang a tamzaw ahi uh. 14Amau siampu liante leh upate kiang ah ahoh ua, “Paul ka thah masiah uh bangmah chiam lou ding in ka kichiam uh achi uhi. 15Huaiziak in nou vaihawmte toh athu kichian nawn sem a ngaihtuah tum bang in, na kiang ua pekhe ding in sepaih heutu lianpen kiang ah ahem deuh in va gentou un; kou bel na kiangnai uh ahong tun ma a amah that dia mansa ka hi uh,” achi uhi.
16Himahleh Paul sanggamnu tapa in athusawm uh ana za a, giahbuk ah ava lut a, Paul ava hilhta hi. 17Paul in sepaih zaheutu khat asam a, “Hiai tangval sepaih heutu lianpen kiang ah pi in, akiang ah thu banghiam gen ding nei ahih tuak,” achi hi. 18Huchi in sepaih heutu lianpen kiang ah api a, “Paul, hentapa'n ahon sam a, hiai tangval na kiang a hon pi ding in ahon sawl a, na kiang ah thu banghiam gen ding nei ahih tuak,” achi hi.
19Sepaih heutu lianpen in akhut in alen a, asim in atuam paipih a, “Bang ahia hon hilh ding na neih?” chi in adong hi.
20Ama'n, “Paul tungtang kichian nawn sem a na ngaihtuah ding mah bang in, zingchiah vaihawmte kiang ah pisuk ding in Judate'n hon nget hoih asa chiat uh. 21Himahleh athu uh na gingta ke'n; alak ua mi sawmli sang a tamzaw in thah asawm ua, huai mite'n amah athah masiah uh bangmah ne lou dawn lou ding in akichiam uh; tu in na thu ngak in mansa in a-om uhi,” achi hi.
22Sepaih lianpen in tangval apaisak a, “Hiai thute na hon theisak chih kuamah hilh ke'n,” achi bikbek hi.
Kaisaria Ah Paul Sawl In A-om
23Huan sepaih zaheutu nih asam a, “Zan ihsip hun in Kaisaria kho pha a pai ding in sepaih zanih, sakol tungtuangmi sawmsagih, tei tawimi zanih mansa in koih un, achi hi. 24Huan Paul tuanna ding sakol leng na ngaihtuahsak unla, gam-ukpa Felik kiang ah bittak in tun un,” achi hi. 25Huan hichibang in lai agelh hi.
26“Klaudias Lisias in Felik gam-ukpa hoihpa chibai abuk hi. 27Hiai mi Judate'n amu ua, athah dek lai un akiang uah sepaihte pi in ka hoh a, Rome mi ahi chih ka theih in ka hunkheta hi. 28Huan ahekna uh theih ut in, vaihawmte kiang ah ka pisuk a, 29huchi in adan uh banghiam a hek a om ahi chih ka thei a, himahleh ahekna thu uah sihna leh henna ding bangmah ka thei kei hi. 30Huan Judate'n amah tang uh ahi chih theihsak a ka omtak in, na kiang ah amah ka hon sawl ngal a, amah hekte leng atung a thubuai aneih peuh uh na ma a gen ding in thu leng ka pia hi,” achi hi.
31Huchi in sepaihte'n athupiak bang in Paul azanzan in api ua, Antipatris atunpih uhi. 32Huan azing in sakol tungtuang mite akiang a pai zel ding in anusia ua, amau giahbuk ah akik nawnta uhi. 33Huan amau Kaisaria khua atung ua, gam-ukpa kiang ah lai apia ua, Paul leng ama ah adingsak uhi.
Felix Ma Ah Paul
34Gam-ukpa'n asim khit in, Paul omna gam adong hi. Huan Silisia gam a pan ahi chih atheih in, 35“Nang hon hekte ahong tun chiang un na thubuai ka ngaihtuah ding,” achi hi. Herod thukhenna inn a ven ding thu apia hi.
Currently Selected:
NASEPTE 23: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
