SALM 37
37
Ka jingkut jong uba bymman bad uba bha#37:0 Ka kyrteng Hebru jong kane ka Salm ka long Da u Dabid.
1Wat pynkhuslai namar ki bymman,
wat bishni ïa ki nongleh bymhok.
2Shen shen kin sa jah noh kum u phlang ba-tyrkhong,
ki ïapstai kum ki jingthung kiba jlop.
3Shaniah ha U Trai bad leh ïa kaba bha;
shong ha ka ri, bad shongshngain.
4Wad ïa ka jingsuk ha U Trai,
bad un ai ha phi ïa ka jingkwah ka dohnud jong phi.
5Ai ïa lade ha U Trai;
shaniah ha u, bad un ïarap ïa phi.
6Un pynlong ïa ka hok jong phi ban tyngshaiñ
kum ka sngi ha ka por shiteng sngi.
7To ïaishah bad ap ïa U Trai ba un trei;
wat pynkhuslai namar kito kiba manbha,
lane ïa kito kiba jop ha ki buit sniew jong ki!
8Wat ai ban khuslai ne ban bitar;
ka ïalam tang sha ka jingjynjar.
9Kito kiba shaniah ha U Trai kin ïohkynti ïa ka ri;
hynrei ki bymman kin shah beh noh.
10Shen shen ki bymman kin sa jah noh;
phi lah ban ïohi ïa ki, hynrei phin ym lap ïa ki.
11 #
Mat. 5:5
Kiba jemnud kin ïohkynti ïa ka ri,
bad kin lehkmen ha ka jingdap kyrhai bad ka jingsuk.
12U briew bymman u sylla pyrshah ïa u briew babha,
bad u peitsuh ïa u da ka jingisih;
13hynrei U Trai u rkhiebeiñ ïa ki bymman,
namar u tip ba shen kin sa shah pynjot.
14Ki bymman ki sei ïa la ki waitlam, bad ki wiat ïa la ki ryntieh,
ban pynïap ïa kiba duk bad kiba kyrduh,
ban pynïap ïa kito kiba leh ïa kaba dei;
15hynrei kin shah pynïap da la ki jong ki waitlam,
bad ïa ki ryntieh jong ki yn pynkheiñ.
16Kaba khyndiat ba u briew bahok u don
ka kham kordor shibun ban ïa ka spah jong ki bymman baroh.
17Namar U Trai un shim noh ïa ka jingkhlaiñ jong u bymman,
hynrei un ïada ïa kito kiba bha.
18U Trai u sumar ïa kito kiba kohnguh ïa u,
bad ka ri kan long ka jong ki junom.
19Kin ym shahshitom haba ki wan ki por basniew,
kin ïoh kyrhai ha ka por jong ka 'nemsniew.
20Hynrei ki bymman ki ïap duh;
ki nongshun U Trai kin jah noh kum ki syntiew khlaw,
ki shu jah noh kum ka tdem.
21U bymman u shim kylliang, bad um ju pynphai shuh;
hynrei u briew uba bha u sbun da ki jingai sngewbha jong u.
22Kito kiba la kyrkhu da U Trai kin ïohkynti ïa ka ri,
hynrei kito kiba la tim da u kin shah beh noh.
23U Trai u ïalam ïa u briew ha ka lynti ba u dei ban leit,
bad u ïada ïa kito kiba pynsngewbha ïa u.
24La ki kyllon, kin ym sah hajuh,
namar U Trai un ïarap khyllie ïa ki.
25Nga long mynta u riewtymmen; nga la im slem bha,
hynrei ngam pat ïohi ba u briew uba bha un shah iehnoh ha U Trai,
lane ba ki khun jong u ba ki khrong jingbam.
26Ha ki por baroh u ai ei bad u ai kylliang sha kiwei,
bad ki khun ki kti jong u ki long ka jingkyrkhu.
27To phai noh na kaba sniew bad leh ïa kaba bha,
bad ki khun ki ksiew jong phi kin ïaishong ïaisah ha ka ri;
28Naba U Trai u ieit ïa kaei kaba dei;
bad un ym iehnoh ïa ki briew jong u kiba ïaineh skhem.
U ïada ïa ki junom,
hynrei ïa ki khun ki ksiew jong ki bymman yn beh noh.
29Kiba hok kin ïohkynti ïa ka ri
bad kin shong kin sah ha ka junom.
30Ki ktien u briew uba bha ki long ka jingstad,
bad u long borabor uba shai.
31U sumar ïa ki aiñ U Blei jong u ha ka dohnud jong u;
bad um ju kynriah na ka.
32U briew bymman u ap siar ïa u briew uba bha,
bad u pyrshang ban pynïap ïa u;
33hynrei U Trai un ym iehnoh ïa u ha ka bor u nongshun jong u,
lane un ym shah ba yn rai pynrem ïa u haba la tian bishar ïa u.
34Buh ïa ka jingkyrmen jong phi ha U Trai, bad kohnguh ïa ki hukum jong u,
un pyndonburom ïa phi da kaba ai kynti ha phi ïa ka ri,
bad phin ïohi ïa u bymman ba la beh noh.
35Shisien nga la tip ïa u briew bymman ba u leh donbor,
ba u ïeng pynwit ïa baroh kum u dieng Kedar ka Lebanon.
36Hynrei hadien nga ïaid lynti nangta, um don shuh;
nga wad ïa u, hynrei ngam shem shuh.
37Khmih thuh ïa u briew uba bha, wad bniah ïa u briew uba hok,
u briew uba shongsuk shongsaiñ un don ki khun ki ksiew;
38hynrei ki nongpop kin shah pynjot khoit;
bad ïa ki khun ki ksiew jong ki yn pynduh noh.
39U Trai u pynim ïa ki briew kiba hok;
bad u ïada ïa ki ha ki por ka jingjynjar.
40U ïarap ïa ki bad u pyllait ïa ki;
u pyllait im ïa ki na ki bymman,
namar ba ki leit sha u ban ïoh jingïada.
Currently Selected:
SALM 37: KHACLBSI
Highlight
Copy
Compare
Share
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
