SALM 34
34
Kaba rwai ïaroh ïa ka jingbha U Blei#34:0 Ka kyrteng Hebru jong kane ka Salm ka long Da u Dabid, uba la mihnoh na khmat u Abimelekh hadien kaba leh kum uba lamwir bad ba la phah noh da u.
1Ngan ïai ainguh ïa U Trai borabor;
ngan ym sangeh ban ïai ïaroh ïa u.
2Ngan ïaroh ïa u ïa kaei ba u la leh
ai ba kiba shah lehbeiñ baroh kin shahshkor bad kin kmen.
3To pynbna ryngkat bad nga ïa ka jingkhraw U Trai,
to ngin ïaroh lang ïa ka kyrteng jong u!
4Nga la duwai ha U Trai, bad u la jubab ïa nga,
u la pyllait ïa nga na ki jingsheptieng jong nga baroh.
5Kiba shah banbeiñ ki khmih sha u bad ki kmen;
kin ym kutlad lano lano.
6Ki bym don jingïarap ki kyrpad ïa u, bad u jubab;
u pyllait im ïa ki baroh na ki jingjynjar jong ki baroh.
7U angel jong u, u ap phira ïa kito kiba pyndonburom ïa U Trai,
bad u pyllait ïa ki na ka jingma.
8 #
1 Pet. 2:3
To mad da lade katno U Trai u long uba bha.
Suk kita kiba shem jingshngain ha u!
9To pyndonburom ïa U Trai, phi ki briew jong u baroh;
kito kiba kohnguh ïa u kin ïoh ïa baroh kat kaba ki donkam.
10Wat ki sing ki shahthngan namar ba ki kyrduh jingbam,
hynrei kito kiba kohnguh ïa U Trai kin ym duna ïa kaei kaei kaba bha.
11Ale, ko ki paralok samla jong nga, to shahshkor ïa nga,
bad ngan hikai ïa phi ban pyndonburom ïa U Trai.
12 #
1 Pet. 3:10-12
Hato phi kwah ban lehkmen ha ka jingim?
Hato phi kwah ban im slem bad im suk?
13Te sumar na kaba kren sniew,
bad na kaba kren lamler.
14To phai noh na kaba sniew bad leh ïa kaba bha;
wad ïa ka jingsuk da ka dohnud jong phi baroh.
15U Trai u khmih sumar ïa kiba hok,
bad u shahshkor ïa ki jingïam jong ki;
16Hynrei u ïaleh pyrshah ïa kito kiba leh bymman,
khnang ba haba ki ïap, ïa ki la klet noh shen shen.
17Kiba hok ki khot kyrpad ïa U Trai, bad u shahshkor,
u pyllait ïa ki na ki jingjynjar jong ki baroh.
18U Trai u don hajan jong kito kiba tlot mynsiem;
u pyllait im ïa kito kiba duh lut ïa ka jingkyrmen.
19U briew uba bha u mad bun ki jingjynjar,
hynrei U Trai u pyllait im ïa u na ki baroh.
20 #
Ïoan. 19:36
U Trai u tyngkai pura ïa u;
wat kawei na ki shyieng jong u kan ym kheiñ.
21Ka jingsniew kan pynïap ïa ki bymman;
kito kiba isih ïa kiba hok kin shah pynshitom.
22U Trai un pyllait im ïa ki briew jong u;
kito kiba phet sha u ban ïoh jingïada kin lait im.
Currently Selected:
SALM 34: KHACLBSI
Highlight
Copy
Compare
Share
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
