KI KAM 17

Ha Thessaloni

1U Paul bad u Silas ki la leit lyngba ka Amphipolis bad ka Apollonia, bad ki la wan poi sha Thessaloni, ha kaba la don ka synagog. 2Kumba u ju leh, u Paul u la leit sha ka synagog. Hangta, ha ki lai tylli ki sngi Sabbaton u la ïatainia bad ki paidbah, 3da kaba sot bad batai ïa ki Jingthoh Bakhuid bad pynshisha na ki ba U Messaïah u la dei ban shahshitom bad ban mihpat na ka jingïap. “Une U Jisu ïa uba nga pynbna ha phi, u dei U Messaïah,” u Paul u la ong. 4Katto katne ngut na ki, ki la sngewïahap bad ki la ïasoh bad u Paul bad u Silas; kumta ruh ka la long ïa kiba bun ki kynthei kiba pawkhmat bad ka kynhun bah jong ki Grik kiba la mane ïa U Blei.

5Hynrei ki Jiw ki la bishni bad ki la lumlang ïa ki riewkhñium bymsalia na ki lynti bad na u paidbah. Ki la pynkhihwin ïa ka shnong baroh kawei bad ki la tur ïa ka ïing jong u briew uba kyrteng u Jason, ha ka jingpyrshang ban lap ïa u Paul bad u Silas bad ban wallam ïa ki shabar sha u paidbah. 6Hynrei haba kim shym lap ïa ki, ki la paring ïa u Jason bad ïa ki katto katne ngut kiwei pat ki parabangeit ha khmat ki bor synshar jong ka nongbah bad ki la pyrta, “Kine ki briew ki la thaw jingkulmar kylleng kylleng! Mynta ki la wan sha ka nongbah jong ngi, bad u Jason u la pynsah ïa ki ha ka ïing jong u. 7Ma ki baroh ki la pynkheiñ ïa ki aiñ jong u Patsha, da kaba ong ba don uwei pat u syiem, uba kyrteng U Jisu.” 8Da kine ki ktien ki la pynkhihwin ïa u paidbah bad ïa ki bor synshar jong ka nongbah. 9Ki bor synshar ki la pynlong ïa u Jason bad ïa kiwei pat ban siew ïa ka pisa kaba donkam ban ïohlait, bad nangta ki la pyllait ïa ki.

Ha Beria

10Mar ïapoi ka miet, ki parabangeit ki la phah ïa u Paul bad u Silas sha Beria. Haba ki la poi hangta, ki la leit sha ka synagog. 11Ki briew hangta ki long kiba kham ïar jingmut ban ïa ki briew kiba ha Thessaloni. Ki la shahshkor ïa ka khubor da ka jingangnud bakhraw, bad man ka sngi ki ju pule bniah ïa ki Jingthoh Bakhuid ban khmih lada kaei kaba u Paul u ong ka long kaba shisha. 12Bun na ki, ki la ngeit, bad bun ki kynthei Grik kiba ha ka kyrdan ba-halor ha ka imlang ka sahlang bad bun ki rangbah Grik ruh ki la ngeit. 13Hynrei haba ki Jiw ha Thessaloni ki la ïohsngew ba u Paul u la ïalap ïa ka ktien U Blei ha Beria ruh, ki la ïawan shata bad ki la sdang ban pynkhih bad pynkulmar ïa u paidbhur. 14Mar kumta hi, ki parabangeit ki la phah noh ïa u Paul sha ka rud duriaw; hynrei u Silas bad u Timothi ki la sah ha Beria. 15Ki rangbah kiba la ïalam ïa u Paul ki la ïaleit bad u haduh Athens bad nangta ki la wan phai sha Beria lem bad ki jingbthah na u Paul ba u Silas bad u Timothi ki dei ban leit sha u kloi katba lah.

Ha Athens

16Katba u Paul u dang ap ha Athens ïa u Silas bad u Timothi, u sngew shitom jingmut shikatdei eh haba u la ïohi ba ka nongbah ka shlei da ki bleithaw. 17Kumta u la ïaphylliew jingmut ha ka synagog bad ki Jiw bad ki Jentil kiba mane ïa U Blei, bad ruh ha ki jaka paidbah man ka sngi bad ki briew kiba jia ryngkhat ki ïaid nangta. 18Katto katne ngut ki nonghikai na ka skul jong ki Epikuri bad ki Stoik ki la ïatainia ruh bad u. Katto katne ngut na ki, ki la kylli, “Aïu une u sarong bieit u pyrshang ban kren?”

Kiwei pat ki jubab, “U i kumba u kren shaphang ki blei nongwei.” Ki la ong ïa kane namar ba u Paul u la ïalap shaphang U Jisu bad ka jingmihpat. 19Kumta ki la shim ïa u Paul, ki la wallam ïa u ha khmat ka dorbar jong ka nongbah, ka Ariopagos, bad ki la ong, “Ngi kwah ban tip kaei kane ka jinghikai bathymmai kaba me kren. 20Katto katne kiei kiei kiba ngi ïohsngew ba me kren ki long kiba sngewphylla ïa ngi, bad ngi kwah ban tip aïu ki kit jingmut.” 21(Naba baroh ki traishnong jong ka Athens bad ki nongwei kiba shong basah hangta ki sngewtynnat ban pynlut ïa ka por jong ki baroh ha kaba ïathuh bad sngap ïa kaei kaei kaba thymmai tam.)

22U Paul u la ïeng ha khmat jong ka dorbar jong ka nongbah bad u la ong, “Nga ïohi ba ha ki liang baroh ma phi ki nong Athens phi long kiba kit niam bha. 23Naba katba nga dang ïaid lyngba ka nongbah jong phi bad khmih ïa ki jaka ha kiba phi mane, nga la lap ïa ka duwan ha kaba la thoh, ‘Ha U Blei uba ngim tip.’ Te ïa uta ïa uba phi mane, wat haba phim tip ïa u, ïa une keiñ nga pynbna mynta ha phi. 24#1 Syiem. 8:27; Isa. 42:5; Ki Kam. 7:48U Blei, uba la thaw ïa ka pyrthei bad ïa kaei kaei baroh kaba don ha ka, u long U Trai jong ka bneng bad ka pyrthei bad um shong ha ki templ ba la thaw da ki kti jong ki briew. 25Lymne ba u donkam ei ei kaba ngi lah ban ai da kaba trei na ka bynta jong u, namar ba u long ma u hi uba ai ka jingim bad ka jingpyrsad mynsiem bad ïa kaei kaei baroh ha uwei pa uwei. 26Na uwei u briew u la thaw ïa ki jaitbynriew baroh ha ka pyrthei bad u la pynlong ïa ki ban shong ban sah ha kylleng ka pyrthei. U hi da lade u la pynskhem lypa ïa ki por kiba biang bad ïa ki pud jong ki jaka ha kaba kin shong kin sah. 27U la leh ïa kane khnang ba kin wad ïa u, bad lehse kin shem ïa u haba ki tba shane shatai ïa u. Pynban U Blei da shisha um long jngai na uno uno na ngi; 28kumba don uba la ong,

“ ‘Ha u ngi im, ngi khih bad ngi long.’ ”

Ka long kumba katto katne na ki myllung jong phi kiba la ong,

“ ‘Ngi ruh ngi long ki khun jong u.’

29Namar ba ngi long ki khun U Blei, ngim dei ban tharai ba ka jinglong jong u ka long kaei kaei kaba kum ka dur da ka ksiar lane rupa lane maw, ba la pynwandur da ka jingstad bad ka buit briew. 30U Blei u la peit lyndet ïa ki por haba ki briew kim shym la ithuh ïa u, hynrei mynta u hukum ïa ki baroh kylleng sawdong ban phai noh ïa ki lynti bymman jong ki. 31Naba u la buh ka sngi ha kaba un bishar ïa ka pyrthei baroh kawei da ka jinglehhok, da uta u briew ïa uba u la jied. U la ai ka jingpynshisha ïa kane ha uwei pa uwei da kaba pynmihpat ïa uta u briew na ka jingïap!”

32Haba ki la ïohsngew ba u Paul u kren shaphang ka jingmihpat na ka jingïap, katto katne na ki, ki la rkhiebeiñ ïa u, hynrei kiwei pat ki la ong, “Ngi kwah ban ïohsngew ba men kren biang ïa kane.” 33Bad kumta u Paul u la mihnoh na ka jingïalang. 34Katto katne ngut ki rangbah ki la ïasoh bad u, napdeng jong ki, u dei u Dionysius, u dkhot jong ka dorbar; la don ruh ka briew kaba kyrteng ka Damaris, bad kiwei pat ki briew.

Currently Selected:

KI KAM 17: KHACLBSI

Highlight

Copy