INPÂKNA HLABU 9
9
Pathien indikna leia lâwmthu hrilna Hla ṭhuoitu ta dingin: Muth-labben le sak ding. David Inpâkna Hla.
1LALPA, kuoma chun ka lungril po poin lâwmthu hril ka ta,
I thilmak thaw po po chu inhriettir ka tih.
2Nangmaa chun lâwmin hlim ka ta;
Aw nang Achunghnungtak, i hming inpâkin hla sak ka tih.
3A mi dotuhai chu an tlânse phingleh,
I hmaa chun an insui a, an bohmang tah a nih.
4Ka ta dinga âwm hrima le ka thua hin nangin i mi ṭan sih a;
Feltaka ro rêlin lalṭhungphaa chun i ṭhung a.
5Hnam tin chu i hal a, mi rilohai chu i sukbohmang a,
An hming chu kumkhawtluong- a dingin i thai hmang tah a.
6Dotuhai chu an beidawng zo a, kumkhuoha dingin mâkin an um tah.
I khuo sukrêmtahai chu;
Anni hriet zingna pumin a bohmang ta bawk a.
7LALPA ruok chu kumkhuoa dingin lalah a ṭhung a,
A lalṭhungpha chu rorêlna dingin a buotsai tah.
8Ama chun khawvêl hi feltakin ro rêlpêk a ta,
Thlierbîk nei loin mi tin ro chu rêlpêk a tih.
9Chuongchun, LALPA chu nêk- sâwra umhai ta ding chun kulbîng insâng nîng a ta.
Lunginzîng huna chun kulbîng insâng lo nîng a tih.
10Chuongchun, i hming hretuhai chun ring an ti cheh a,
Nang chun chu, LALPA, nangma zawngtuhai che chu i mâksan ngai si nawh a,
11LALPA, Ziona um chu inpâkin hla sak unla,
Mihai lai chun a thilthawhai chu hril ro.
12Thisen insuo suosal hlaktu chun anni chu a hriet zing hlak sih a,
Mi rimsihai khêkri a theinghil ngai nawh.
13Aw LALPA, mi lunginsiet la,
A mi theidatuhai leia ka lunginzîngna hi en ta,
Nang thina kawtkhâra inthawka mi sansuok hlaktu;
14Nangma inpâkna po po chu kân hriettir theina dingin;
Zion naunu kawtkhârahai chun,
I mi sandamnaa hin hlim ka tih.
15Hnam tin chu an khur siemahai chun an tlum a,
An lên pha inrûka chun anni ke ngei a âwk tah a.
16LALPA chun ân hriettir a, rorêlna chu a tirsuok tah a,
Mi rilo chu ama kutsuok ngeia chun a âwk hlak.
17Mi rilohai chu Seola chun kîr nâwk an ta,
Hnam tin Pathien theinghil hmang hlakhai chu.
18Pasiehai chu theinghilin um zing zing naw ni hai a,
Rimsihai beiseina chu kumkhuo chun bo sawng bawk naw ni.
19Aw LALPA, tho la, mihriem el chun ngam naw raw se,
Hnam tin chu i mithmuah ro rêlpêkin um raw se.
20Aw LALPA, anni chu sukṭi la,
Hnam tin chun mihriem el an nih ti inhre raw se.
Currently Selected:
INPÂKNA HLABU 9: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
