INPÂKNA HLABU 68
68
Sinai le hmun inthienga Pathien chu Hla ṭhuoitu ta dingin: David Inpâkna Hla.
1Pathien chu tho sienla, ama dotuhai chu sukdarin um raw se,
Ama theidatuhai khawm chu a hmaah tlânse raw se.
2Meikhu hi lên hmanga a um ang hin, anni chu lên hmang la;
Khuoihlu hi mei luma ân tuihmang angin,
Mi rilohai chu Pathien hmaah bohmang raw se.
3Mi felhai ruok chu lâwmtakin um sienla,
Pathien hmaa hlim raw hai se;
Anih, lâwmtakin hlim raw hai se.
4 #
Dt 33.26; Ex 6.3 Pathien chawimawiin hla sak unla, a hming inpâkin sak ro;
Tawlailîr thlalêrhai fethleng ding ta ding chun lamlien ding sung pâwng unla,
A hming chu JAH a nih, a hmaa chun hlim ro.
5Pathien a umna inthienga um chu,
Pa nei lohai pa le hmeithaihai ngaituotu a nih.
6 #
1 Sam 2.5; Sm 107.4,7,34; Tt 12.6 Pathien chun mi malhai chu sûngkuo laiahai ân ṭhangtir hlak a;
Mi intânghai chu a ṭhuoi suok a, vângneinaah a ṭhuoi lût hlak:
Helhmanghai ruok chu ram ṭâwlah an um hlak.
7Aw Pathien, i mihai hma ṭhuoia i hung suok a,
Thlalêra i fethleng lai khan,
8Hnuoi hi ân hnîng dur dur a,
Vânhai khawm khi Pathien hmaa chun a far a,
Sinai tlâng meu khawm saw Pathien hmaah,
Israelhai Pathien hmaa chun ân hnîng dur dur kha.
9Aw Pathien, nang chun ruo tamtak în sûrtir a,
I rochan chu a chau lai khan i sukdet a.
10I rawihai chun chutaka chun umhmun an khuor a,
Aw Pathien, nang chun i ṭhatnain rimsihai ta dingin i buotsai a.
11LALPAIN thu chu a pêk hlak a,
Chanchin hriltu nuhmeihai chu pâwl lientak an nih.
12Sipaihai lalhai chu an tlânsie an tlânsieh a,
In nghâktunu chun râllâk sum chu a sem a.
13Vaṭhu thla tangkaruoa tuoma,
A thla hmawr khawm rângkachak engtaka tuom angin,
Berâm huon kârahai dâm i zâl ding am a nih?
14Iengkimthawtheiin chutaka chun lalhai chu a sukdar lai chu,
Zalmon tlânga vûr sûr lai ang a nih.
15Basan tlâng chu Pathien tlâng a na,
Basan tlâng chu tlâng insângtak a nih.
16Tlâng insângtakhai,
Pathienin a umna dinga a tlâng dit chu,
Iengdinga îtthika in mel am a na?
Anih, LALPA chu chutaka chun kumkhuoin a um zing ding a nih.
17Pathien tawlailîr chu a sînga sîng, a sânga sâng tamtak a nih.
LALPA chu Sinai tlânga a um ang khan, chuong laia chun hmun inthiengah a um tah.
18 #
Eph 4.8 Nang chu chungtieng i hang feh a, i manhai chu salah i ṭhuoi a,
Mihriemhai lai chun thilpêkhai i dawng a,
Anih, helhmanghai lai khawm,
LALPA Pathien chu an kuoma a um theina dingin.
19LALPA ei phur ni tina a mi phurpêktu,
A mi sandamtu Pathien chu inpâkin um raw se.
20Pathien chu ei ta dingin sanhimtu,
Pathien a nih,
Thinaa inthawka suoknahai chu LALPA Jehovah ta a ni bawk.
21 #
Hab 3.13 Nisienlakhawm, Pathienin ama dotuhai lu chu sât khawi phawk a tih,
A thiemnawnaa la fe pei, lu vun sam inbuktak chu.
22LALPAIN, “Basan rama inthawkin ṭhuoi nâwk ka ta,
Tuisuoriet mawng inthûktaka inthawk chu ṭhuoi nâwk ka tih.
23 #
1 Lal 21.19 I ke chu thisena i phûm thei a,
I ui leihai chun i dohaia inthawk chan a nei theina dingin,” a ta,
24Aw Pathien, i fe lai dâm an hmuh a,
Ka Pathien ka Laltak hmun inthienga a fe laihai chu.
25 #
1 Chr 13.8 Nunghâk khuongtê benhai laia chun,
Hlasaktuhai an fe hmasah a, iengkhat mûttuhai chun an zui a.
26 #
Dt 33.18; Is 48.1 Inkhâwmnaahai hin Pathien inpâk unla,
Israel tuihnâra suokhai, LALPA chu inpâk ro.
27Chutaka chun nau mitlum Benjamin an rorêltu a um a,
Judahai mi lien le an upahai,
Zebulunhai mi lienhai,
Naphtalihai mi lienhai leh.
28I Pathien chun i thilthaw- theina chu thu a pêk a,
Aw Pathien, kan ta dinga thil i mi thawpêk chu sukhrât rawh.
29Jerusalema i biekin leiin,
Lalhaiin lâwmmanhai la hung chawipêk an ti che.
30Tangkahai chu sirin, Phairuong laia sahrâng chu kâwk la,
Bâwngchal tamtak, mi tin bâwngtêhai leh,
Indo inhâwk mi tin chu a sukdar tah a.
31Aiguptaa inthawkin mi lienhai hung suok an ta,
Ethiopiahai chu an kut Pathien tienga phar dingin inhmâwng an tih.
32Leihnuoi ramhai, Pathien chawimawiin hla sak unla,
Aw LALPA inpâkin hla sak ro.
33Vânhai vân, tiena umhai chunga chuong chu,
Ngai ta, a râwl ân suo ie, râwl nasatak el chu.
34Pathien kuoma chun hrâtna pe ro,
A ropuina chu Israelhai chungah a um a,
A hrâtna chu vân dumhaia khin a um.
35Aw Pathien, i hmun inthieng- haia inthawk chun ṭi i um a;
Israelhai Pathien, ama ngei chun a mihai kuomah hrâtna le thilthawtheina a pêk hlak.
Pathien chu inpâkin um raw se.
Currently Selected:
INPÂKNA HLABU 68: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
