INPÂKNA HLABU 119
119
Aleph Pathien Dân ṭhatnahai chu
1Kawnglama mi ṭha fam- kimhai chu an hamṭha ie,
LALPA dân hrawtuhai chu.
2A thuinhriettirhai zâwmtuhai chu an hamṭha,
Lungril po poa zawngtuhai chu.
3 #
1 Jn 3.9; 5.18 Anih, anni chun fel nawna hrim hrim an thaw nawh a,
A lampuihaia chun an fe hlak.
4Nangin i thununna thuhai chu thupêkin i mi pêk a,
Ṭhahnemngaitaka kan zâwm theina dingin.
5Aw, i thuruothai chu zâwm dingin,
Ka um dânhai hi sukdetin um ta ve sien chu aw!
6 #
1 Jn 2.28 Chu pha chun muolpho naw ning,
I thupêkhai po po ka pawisak pha chun.
7Lungril indiktak putin lawmthu hril ka ti che,
I rorêlna felhai chu kân chûk thiem pha chun.
8I thuruot chu zâwm ka ta,
Aw, mi mâksan sawng naw rawh.
Beth LALPA dân zâwm
9Tleirâwlin iengtin am a um dân sukthieng thei a ta?
I thu ang peia a um dân chu vêngṭhain,
10Ka lungril po po hin ka zawng cheh a,
Aw, i thupêkhai ka fehmangsan chu phal lul naw rawh.
11 #
Lk 2.19 I chunga thil ka suksuol nawna dingin,
I thu chu ka lungrilah kân khâwl khâwm a.
12Aw LALPA, nang chu inpâk tlâk i nih ie,
I thuruothai chu min chûktir rawh.
13I baua i rorêl suok po pohai chu,
Ka hmûrin kan hriettir tah.
14I thuinhriettir kawnga chun ka hlim a,
Hausakna po poa ka hlim ang elin,
15I thununna thuhai chu ngaituong ka ta,
I lampuihai chu ngaisak bawk ka tih.
16I thuruothai chunga chun lâwm ka ta,
I thu chu theinghil naw ning.
Gimel LALPA dâna lâwmna
17Ka hring theina dingin i siehlaw chunga hin ṭhatakin thaw la,
Chuongchun, i thu chu zâwm ka tih.
18I dân thua inthawka thilmak ka hmu theina dingin,
Ka mithai hi mi sukvarpêk rawh.
19 #
2 Kor 5.6 Hnuoia hin mikhuol ka na,
I thupêkhai chu ka kuoma chun ip naw rawh.
20Ka hringna hi kawi darin a um a,
Ienglai khawma i rorêlnahai a ngai leiin.
21Mi chapo ṭawngsephurhai chu i kâwk a,
I thupêkhai invâkhmangsan hlakhai chu.
22Hrilsietna le hmusitna hi ka kuoma inthawkin la hmang la,
I thuinhriettirhai chu ka zâwm sih a.
23Mi lienhai khawm an ṭhung a, an mi sawisêl a,
Nisienlakhawm, i siehlaw hin i thuruothai chu a ngaituo lem a nih.
24I thuinhriettirhai chu ka lâwmna a na,
Rem mi ruotpêktu khawm a nih.
Deleth LALPA dân zâwm tumna
25Ka hringna hi pilvutah a kawp tlat a,
I thu ang peiin mi sukhar rawh.
26Ka um dânhai chu kân hriettir cheh a, nangin i mi dawn a,
I thuruothai chu mîn chûktir rawh.
27I thununna kawng chu mîn hrietthiemtir la,
Chuongchun, i thilmak thaw thuhai chu ngaituong ka tih.
28Ka hringna hi lungngai leiin a zawphmang hlak a,
I thu ang peiin mi sukhrât rawh,
29Um dân indik naw hi ka kuoma inthawkin la hmang la,
I dân chu lunginsiettakin mi pe rawh.
30Umdân ringum ka thlang a,
I rorêlnahai ka hmaah kân umtir a.
31I thuinhriettirhai chu ka chel tlat a,
Aw LALPA, mi sukmuolpho naw rawh.
32 #
Is 60.5; 2 Kor 6.11 I thupêk lampuia chun tlân ka ta,
Ka lungril hi i suklien pha chun.
He Hrietthiemna hnina
33Aw LALPA, i thuruot lampui chu mîn entir la,
Chuongchun, a tâwp chenin ka hraw ding annâwm.
34Hrietthiemna mi pe la, chuongchun, i dân chu ka vawng ṭha ding annâwm,
Anih, ka lungril po po hin zâwm ka tih.
35I thupêk lampuia chun mîn fetir la,
Chutaka chun ka lâwm sih a.
36 #
Ezek 33.31; Mk 7.21; Lk 12.15; Heb 13.5 I thuinhriettir tienga chun ka lungril hi inthlêktir la,
Duâmna tiengah ni loin.
37Thil teplo mei mei en lo dingin ka mit mîn lâktir la,
I lampuihaia chun mi sukhar rawh.
38I thu chu i siehlaw kuoma hin sukdet la,
Chu chu nangma ṭinaa mi a nih.
39Mi hrilsietna ka ṭi hi la hmang la,
I rorêlhai chu a ṭha sih a.
40Ngai ta, i thununna thuhai chu hriet kân hâwk hlak a,
I felna leiin mi sukhar rawh.
Vau Lalpa dân ringsanna
41Aw LALPA, i ngilneina chu ka kuomah hung raw se,
I sandamna ngei chu, i thu ang peiin.
42Chuongchun, a mi hrilsetu dawnna ding nei ka tih,
I thu ka ring sih a.
43Chun, thutak thu chu ka baua inthawk hin la suok vawng naw la,
I rorêlnahai chu ka beisei si hlak a.
44Chuongchun, i dân chu zâwm rawp ka tih,
Kumkhawtluongin.
45Chun, hluotu neiloin lêng ka ta,
I thununna thuhai chu ka zawng sih a.
46 #
Mt 10.18; Tt 26 I thuinhriettir thuhai chu lalruol hmaah hril ka ta,
Inzak naw ningah.
47Chun, i thupêk ka ngainat chunga chun,
Lâwm ka tih.
48I thupêk ka ngainat tienghaia chun ka kuthai phar ka ta,
I thuruothai chu ngaituong ka tih.
Zain LALPA dân ringzona
49I siehlaw kuoma thutiem chu hre zing la,
Nangin i mîn beiseitir leiin.
50Chu chu ka rinumnaa khawm ka thlamuongna a nih,
I thu chun a mi sukhar ta sih a.
51Chapohai chun nasatakin an mi nuizat a,
Nisienlakhawm, i dân chu ka fe pêtsan nawh.
52Aw LALPA, tiena i rorêlhai chu ka hriet zing a,
Kei le kei kân thlamuon hlak.
53Lungninawna nasatak hin a mi tlâk khum a.
Mi rilo i dân fesantuhai leiin.
54Ka khuol inzinna ina hin,
I thuruothai chu ka hla a ni hlak.
55Aw LALPA, zâna chun i hming ka hriet zing hlak a,
I dân khawm ka zâwm hlak.
56Chuong chu ka nei a,
I thununna thuhai chu ka vawngṭhat leiin.
Cheth LALPA dân ngaisângna
57LALPA chu ka chanvo a nih,
I thu chu zâwm ka tih ti ka hril ta kha.
58Ka lungril po poin i lungin- sietna ka ngên a,
I thu ang peiin mi lunginsiet rawh.
59 #
Lk 15.17 Ka um dânhai ka ngaituoh a,
I thuinhriettir tienga chun ka ke ka pên tah a.
60I thupêkhai zâwm dingin,
Kân hmawh a, sâwt ka riel nawh.
61Mi rilohai hruihruolhai chun a mi zem hlawm zing a,
Nisienlakhawm, i dân chu ka theinghil nawh.
62 #
Tt 16.25 Zânrila chun lâwmthu hril ding chein tho ka ta,
I rorêl felhai lei chun.
63Nangma ṭituhai po po le,
I thununna thuhai zâwmtuhai ruol ka nih.
64Aw LALPA, leihnuoi hi i ngilneinaa sip a nih,
I thuruothai chu mîn chûktir rawh.
Teth LALPA dân hlutna
65Aw LALPA, i thu ang peiin,
I siehlaw hi i thaw ṭha hlak.
66Ngaituo thiemna le hrietna mîn chûktir la,
I thupêkhai chu ka ring sih a.
67Sukrinuma ka um hma khan kân vâk hmang hlak a,
Tu ruok hin chu i thu ka zâwm tah.
68Nang chu i ṭhah a, thil ṭha i thaw bawk a,
I thuruothai chu mîn chûktir rawh.
69Chapohai chun ka chungah khêl an phuokfâwm a,
Ka lungril po po hin i thununna thuhai chu vawng ṭhâng ka tih.
70An lungril chu rîlrâng thau angin a thau a,
Kei ruok chu i dân chungah ka lâwm hlak.
71I thuruothai chu kân chûk thiem theina dinga,
Sukrinuma ka lo um kha ka ta dingin a ṭha a nih.
72Rângkachak le tangka sâng tamtak nêk chun,
I baua dân suok chu ka ta dingin a ṭha lem.
Jod LALPA dân indik zie
73I kutin i mi siemin, i mîn din a nih,
I thupêkhai chu kân chûk thiem theina dingin hrietthiemna mi pe rawh.
74Nangma ṭituhai chun mi hmûng an ta, lâwm an tih,
I thu chu ka beisei hlak leiin.
75Aw LALPA, i rorêlhai chu a fel ti le,
Nang chun ringumtakin a nih i mi sukrinum chu ti ka hriet.
76I siehlaw kuoma i thutiem ang peiin,
Lunginsiettakin i ngilneina chu ka thlamuongna ding ni raw se.
77Ka hring theina dingin i lai- natnahai chu ka kuomah hung raw se,
I dân chu ka lâwmna a ni sih a.
78Chapohai chu muolphoin um raw se, indik nawtakin an mi suktlâwm ta sih a,
Nisienlakhawm, i thununna thuhai chu ngaituong ka tih.
79Nangma ṭituhai chu keia tieng hung ngha hai sienla,
Chuongchun, i thuinhriettir- hai chu an hriet ding annâwm.
80Ka muolpho nawna dingin,
Ka lungril hi i thuruothaia chun ṭha famkimin um raw se.
Kaph Sansuokna ngênna
81Ka hringna hi i sandamna ngaiin a chau tah a,
Nisienlakhawm, i thu ka beisei hlak.
82I thu thlîrnân ka mit ân vai zo tah a,
“Nangin iengtik am mi thlamuon i ta?” ka ti ka ti hlak.
83Meikhu thlûta savun peng ang chu ka hung ni tah a,
Nisienlakhawm, i thuruothai chu ka theinghil nawh.
84 #
Tp 6.10 I siehlaw kum chin ding hi iengzât am nîng a ta?
A mi suknawmnatuhai chunga hin iengtik am ro i rêl ding a na?
85Mi chapo, i dân anga um nawhai chun,
Ka tlâkna dingin khurhai an cho a.
86I thupêk po po chu ring a um a nih,
Anni chun indik nawtakin an mi suknawmna hlak hi, mi ṭhangpui rawh.
87Anni chun hnuoia hin an mi sukbohmang vâng vâng a,
Nisienlakhawm, i thununna thuhai chu ka nghatsan si nawh a.
88I ngilneina ang peiin mi sukhar la,
Chuongchun, i baua thuinhriet- tir chu ka zâwm ding annâwm.
Lamed LALPA dân ringumzie
89 #
Mt 24.34; 1 Pet 1.25 Aw LALPA, kumkhawtluonga dingin,
I thu chu vânah dettakin a um a;
90I ringumna chu suon po po chenin um a ta,
Leihnuoi hi i sukdet a, a um zing a nih.
91Chuonghai chu vawisûn hin i rorêlhai angin an um zing a,
Thil po po chu i siehlawhai an ni sih a.
92I dân chu ka lâwmna ni naw sienla chu,
Ka rinumnaa khan ka bohmang ta ding a nih.
93I thununna thuhai chu ieng- tika khawm theinghil naw ning,
Nangin chuong chun mi i sukhar ta sih a.
94I ta ka ni hi, mi sandam rawh,
I thununna thuhai chu ka zawng sih a.
95Mi rilohai chun mi sukbohmang tumin an mi nghâk sih a,
Nisienlakhawm, i thuinhriet- tirhai chu ngaituong ka tih.
96 #
Mt 5.18 Ṭhat famkimna po po tâwpna chu ka hmu tah a,
I thupêk ruok chu a lien khawp el a nih.
Mem LALPA dân ngainatna
97Aw, i dân hi ka va ngaina de aw!
Sûnnithlâka ka ngaituo hlak chu a nih.
98I thupêkhai chun a mi dotuhai nêka var lemin a mi siem a,
Kumkhawtluonga ka kuoma a um zing hlak leiin.
99 #
2 Tim 3.5 A mîn chûktirtuhai po po nêkin varna ka nei lem a nih,
I thuinhriettirhai hi ka ngaituo a ni hlak leiin.
100Tarhai nêk chun ka hriet thiem lem a nih,
I thununna thuhai hi ka vawng ṭhat leiin.
101 #
Tv 1.15 I thu ka zâwm theina dingin,
Lampui suola hrim hrim chun ka kehai hi pên ka phal nawh.
102I rorêlnaa inthawk chun ka pêt hmang nawh a,
Nangin i mîn chûktir leiin.
103I thuhai hi ka bau ta dingin a va thlum de;
Anih, ka bau ta ding chun khuoizu nêkin a thlum lem.
104I thununna thuhai leiin hrietthiemna ka nei hlak,
Chuleiin, um dân indik naw tinrêng hi ka theida a nih.
Nun LALPA dân chu khâwnvar a nih
105I thu hi ka kehai ta dingin khâwnvar a na,
Ka lampuia dingin var a nih.
106I rorêlna feltakhai chu zâwm dingin,
Ṭawng kân khâm a, ka sukdet bawk a.
107Nasataka sukrinumin ka um a,
Aw LALPA, i thu ang peiin mi sukhar rawh.
108 #
Hos 14.2; Heb 13.15 Aw LALPA, lunginsiettakin, ka baua nuomthua thilpêkhai hi la la,
I rorêlnahai chu mîn chûktir rawh.
109Ka hringna hi ka kutah a um rawp hlak a,
Nisienlakhawm, i dân chu ka theinghil ngai nawh a.
110Mi rilohai chun ka âwkna dingin châng an kam a,
Nisienlakhawm, i thununna thuhai chu kân vâk hmangsan nawh.
111I thuinhriettirhai chu kum- khawtluonga ka ro dingin ka lâk a,
Ka lungril suklâwmtu a ni sih a.
112Kumkhawtluongin, a tâwp chenin,
I thuruothai anga thaw dingin ka lungril kân thlêktir a.
Samek LALPA dân chu himna a nih
113Lungril mumal neilo mihai chu ka theidah a,
I dân ruok chu ka ngaina a nih.
114Nang chu kân bîkhmangna le ka phaw i na,
I thu ka beisei a nih.
115 #
Mt 7.23 Nangni thil ṭha naw thawtu- hai, mi mâksan ro,
Ka Pathien thilpêkhai ka vawng ṭhat theina dingin.
116 #
Rom 5.5 Ka hring theina dingin i thu ang peiin mi chel zing la,
Ka beisei chunga hin inzakin mîn umtir naw rawh.
117Mi kei la, chuongchun, him ka ta,
I thuruothai chu ka pawisa rawp ding a nih.
118I thuruothai invâkhmangsantuhai po po chu i hmusit a,
An hlêmna chu khêl a ni sih a.
119Hnuoia mi rilohai po po chu thilêksie angin i sukbohmang hlak a,
Chuleiin, i thuinhriettirhai chu ka ngaina a nih.
120Ka tisa hi nangma ṭîin ân thin a,
I rorêlnahai chu ka ṭî bawk a.
Ain LALPA dân thu awina
121Ro ka rêl a, feltakin ka thaw hlak a nih,
A mi nêksâwrtuhaia inthawkin mi thlathlam naw rawh.
122I siehlaw chungchâng thuah, a ṭhatna dingin a bul tum la,
Chapohaiin mi nêksâwr naw raw se.
123I sandamna thlîrnân ka mit ân vai zo tah a,
I thu feltak thlîrna leh.
124I ngilneina ang peiin i siehlaw chunga hin thaw la,
I thuruothai chu mîn chûktir rawh.
125I siehlaw ka na, hrietthiemna mi pe la,
I thuinhriettirhai chu ka hriet theina dingin.
126LALPA, sinthaw a hun tah,
I dân hi ieng ni loin an siem ta sih a.
127Chuleiin, i thupêkhai chu rângkachak nêkin ka ngaina a nih,
Anih, rângkachak inthieng nêk khawma.
128Chuleiin, kawng tinrêng thuah, i thununna thuhai po po chu indikin ka hriet a,
Um dân indik naw tinrêng hi ka theida a nih.
Pe LALPA dân zâwm nuomna
129I thuinhrietirhai chu a mak a nih,
Chuleiin, ka hringna hin a vawng ṭha hlak.
130I thu hrilfie hin mihai a sukvar a,
Mi mâwlhai chu ân hrietthiem- tir hlak.
131Ka bau ka ka lien a, kân thuok hlawp hlawp a,
I thupêkhai chu ka châk leiin.
132 #
2 Thes 1.6 Keia tieng hung ngha la, mi lunginsiet rawh,
I hming ngainatuhai i lunginsiet ang khan.
133Ka ke pênhai hi i thuah sukdet la,
Suolna hrim hrim ka chungah thu inneitir naw rawh.
134 #
Lk 1.74 Mihriem nêksâwrnaa inthawk chun mi sanhim la,
Chuongchun, i thununna thuhai chu ka zâwm ding annâwm.
135I hmêlin i siehlaw sunvar la,
I thuruothai chu mîn chûktir rawh.
136Ka mitthli hi vadung tui angin a luong thlah a,
I dân an zâwm naw leiin.
Tzade LALPA dân indikna
137Aw LALPA, nang chu i fel a,
I rorêlhai khawm ân dik a nih.
138I thuinhriettirhai chu feltak le,
Ringum êm êmin thu i pêk a.
139Ka ṭhahnemngaina hin a mi sukbohmang tah a,
A mi dotuhaiin i thu an theinghil leiin.
140I thu hi ân thieng êm êm a nih,
Chuleiin, i siehlaw hin a ngaina a nih.
141Mi chîn mi hmusit ka na,
Nisienlakhawm, i thununna thuhai chu ka theinghil ngai nawh.
142I felna chu kumkhawtluong felna ding a na,
I dân khawm thutak a nih.
143lunginzîngna le thlaphâng- na chun a mi tlâk khum tah a,
Nisienlakhawm, i thupêkhai hi ka lâwmna a nih.
144I thuinhriettirhai chu kumkhuoa dingin a fel a nih,
Hrietthiemna mi pe la; chuongchun, hring zing ka tih.
Koph Sansuok hnina
145Ka lungril po poin ka ko cheh a,
Aw LALPA, mi dawn rawh;
I thuruothai chu ka vawng ṭha ding annâwm.
146Ka ko hlak cheh a, mi sandam rawh;
Chuongchun, i thuinhriettirhai chu ka zâwm ding annâwm.
147Varṭien chu ka khal a, ka khêk hlak a,
I thuhai chu ka beisei hlak.
148I thu ka ngaituo theina dingin,
Ka mitin zân vêng hunbihai chu a meng khal hlak.
149I zainêmna ang peiin ka râwl hi ngai la,
Aw LALPA, i rorêlnahai ang peiin mi sukhar rawh.
150Ngaituona suol hnawttuhai chun an hung hnai a,
Anni chu i dân hlata um an nih.
151Aw LALPA, nang chu i hnai a,
I thupêk po po chu thutak a nih.
152Tienlaiin, i thuinhriettirhaia inthawkin,
Chuong chu kumkhawtluonga dingin i sukdet ti ka lo hriet tah.
Resh Ṭhangpui hnina
153Ka rimsikzie hi ngaituo la, mi sanhim rawh,
I dân chu ka theinghil ngai si nawh a.
154Ka thu mi hrilpuiin mîn tlan la,
I thu ang peiin mi sukhar rawh.
155Sandamna chu mi rilohaia inthawk chun a hla a nih,
I thuruothai chu an zawng naw leiin.
156Aw LALPA, i lainatnahai chu a nasa a nih,
I rorêlnahai ang peiin mi sukhar rawh.
157A mi suknawmnatu le a mi dotuhai chu tamtak an nih.
Nisienlakhawm, i thu inhriettirhai chu ka pêt san nawh.
158Vervêktaka thawtuhai chu, ka en a, ka lungni nawh a,
I thu an zâwm naw leiin.
159I thununna thuhai ka ngainatzie hi ngaituo la,
Aw LALPA, i ngilneina ang peiin mi sukhar rawh.
160I thu inpawl khâwm chu thutak a nih,
I rorêlna fel tinrêng khawm hi kumkhawtluongin um zing a tih.
Shin LALPA dâna inpêkna
161Mi lienhaiin a san um loin an mi suknawmna a,
Nisienlakhawm, ka lungril chun i thuhai a nih a ṭî chu.
162I thua hin ka hlim a nih,
Thil ropuitak râllâka hmutu angin.
163Khêl hi ka theidain ka tirdak a,
I dân ruok chu ka ngaina a nih.
164Ni khatah vawi sari kân pâk hlak che a nih,
I rorêl felhai leiin.
165I dân ngainatuhai chun thla- muongna nasatak an nei a,
Tlûkna hrim hrim an nei nawh.
166Aw LALPA, i sandamna ka beisei zing a,
I thupêkhai angin ka thaw hlak.
167Ka hringna hin i thuinhriet- tirhai chu a zâwm hlak a,
Ka ngaina êm êm a nih.
168I thununna thuhai le i thuinhriettirhai chu ka zâwm hlak a,
Ka um dân po po khawm hi i hmaa um a ni sih a.
Tau Ṭhangpui hnina ṭawngṭâina
169Aw LALPA, ka khêkri hi i hmaah hung hnai raw se,
I thu ang peiin hrietthiemna mi pe rawh.
170Lunginsiet ka hnina hi i hmaah tlung raw se:
I thu ang peiin mi sanhim rawh.
171Ka hmûr hin inpâkna thu hril raw se,
Nangin i thuruot thuhai chu i mîn chûktir hlak leiin.
172Ka lei hi,i thu inpâkin hla sak raw se,
I thupêk po po chu felna a ni leiin.
173I kut chu mi ṭhangpui dinga inzosain um raw se,
I thununna thuhai chu ka thlang sih a.
174Aw LALPA, i sandamna chu ka châk hlak a,
I dân chu ka lâwmna a nih.
175Ka hringna hi hring raw se; chuongchun, ân pâk ding che annâwm,
I rorêlnahai khawmin mi ṭhangpui raw se.
176 #
Is 53.6 Berâm inhmang angin kân vâkhmang a, i siehlaw hi zawng rawh.
I thupêkhai chu ka theinghil ngai si nawh.
Currently Selected:
INPÂKNA HLABU 119: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
