LEVI DÂN 22
22
Inthâwina thilinhlânhai inthiengna
1LALPA chun Mosie a biek a, 2“Aron le a naupasalhai kuomah hril la, Israel thlahaiin thil inthieng ka kuoma an inhlân laiin insiekieng raw hai se, ka hming sukse rawi an tih. Kei hi LALPA ka nih.
3An kuomah, ‘In suonhai chena in thlahai po po lai tukhawm inthieng- naw puma Israel thlahaiin LALPA kuoma an inhlân thil inthieng hung hnai taphawt chu keimaa inthawka tuithlârin a um ding a nih. Kei hi LALPA chu ka nih.
4Aron thla tukhawm inphârna amanih, thipût amani chun ân thieng hmakhat chun, thil inthienghai laia mi chu a tâwk taphawt le,
5tukhawm ama sukpawrche thei, a bawka invâk chi hrim hrim amanih, pawrchena kai thei tâwk taphawt chu,
6chuong ang tâwktu chu zântieng chen chun inthieng naw nîng a ta; chun, ân sil naw chun thil in- thienghai laia mi chu a fâk ding a ni nawh.
7Nisa a tlâk hnung ruok chun inthieng tâng a ta, chu hnung chun thil inthienghai laia mi khawm chu fa thei tâng a tih; a fâk ding a ni leiin.
8Insukpawrche dingin mânia thi amanih, sa se amanih a fâk ding a ni nawh. Kei hi LALPA chu ka nih,’ tiin hril rawh.
9Chuleiin, ka thupêk chu an pawm ding a nih, chuong naw chun suol maw chu phurin, anni insuk- pawrchein thi pal rawi an tih: Kei hi LALPA anni sukthiengtu chu ka nih.
10“Ram dang miin thil inthieng chu a fâk ding a ni nawh; thiempu kuoma khawsa amanih, inhlawfa amani chun thil inthieng chu a fâk ding a ni nawh.
11Thiempuin ama suma an châwk ruok chun fa thei a tih; chun, a ina pienghai chun a fâk ding chu fa thei an tih.
12 #
Lev 7.31-36 Thiempu naunuin ram dang mi a nei chun, thêna thilinhlân, thil in- thienghai laia mi chu a fâk ding a ni nawh.
13Amiruokchu, thiempu naunu chu nau boin hmeithaiin amanih, mâkin amanih a hung um a, a pa in tieng a kir nâwk chun, a nunghâk lai ang bawk khan a pa fâk ding chu fa vêng a tih; nisienlakhawm, ram dang mi chun an fâk ding a ni nawh.
14Mîn hre loa thil inthieng chu a fâk chun, a hmun ngaa ṭheha hmun khat chu sie sâng a ta, thil inthieng chu thiempu a pêk ding a nih.
15Israel thlahai thil inthieng, LALPA kuoma an inhlân chu, thiem- puhai chun an sukpawrche ding a ni nawh a,
16chuong ang chun, an thil inthienghai fapêkin rîtlona le baw- sietna maw an inphurtir ding a ni nawh; Kei hi LALPA anni sukthieng- tu chu ka ni sih a,’ ti rawh,” tiin.
17LALPA chun Mosie a biek a,
18“Aron le a naupasalhai le Israel thlahai po po be la, an kuomah, ‘Israel sûngkuo laia mi amanih, Israelhai laia um ram dang mi amanih, tu- khawma thilinhlân thutiemna khawm, nuomthua thilinhlân khawm, LALPA kuoma pumrawhmang thilinhlâna a hung inhlân pha,
19pawm tlâk dingin bâwng amanih, berâm amanih, kêl amanih demkailo a chal in inhlân ding a nih.
20Demkai hrim hrim chu in inhlân ding a ni nawh; pawmpêk tlâk cheu a ni âwm si nawh a.
21Tukhawmin thutiem sukpui- tling dingin amanih, mâni nuomthua thilinhlâna dingin amanih, LALPA kuoma inremna thilinhlâna dinga, ran ruol laia amanih, berâm ruol laia mi amanih ân hlân chun, pawm tlâk a ni theina dingin demkai dêrlo a ni ding a nih; demkaina hrim a um ding a ni nawh.
22A mitdel dâm, a ru tliek dâm, a silawng dâm, inpânna nei dâm, pang inthakna nei dâm, pang inhlip dâm chu LALPA kuomah in inhlân ding a ni nawh a, LALPA kuoma mei hmanga thilinhlâna dingin buotsai ding a ni nawh.
23Mâni nuomthua thilinhlâna ding chun, bâwngchal khawm, be- râmte khawm, kut ke sei taluo amanih, tawi taluo amani khawm inhlân thei in tih; thutiemnaa ding ruok chun pawm ni naw nih.
24A tilmu sukduk amanih, sukpêr amanih, sukkawi amanih, lâk amani chu LALPA kuomah in inhlân ding a ni nawh a; in rama hin chuong ang chu inthâwina dingin in hmang ding a ni bawk nawh.
25Ram dang mihai kuoma in- thawka lain chuong ang laia mi hrim hrim chu in Pathien fâk ding thilinhlânah in inhlân ding a ni nawh, chuonga chun sietna le dem- kaina a um lei chun, pawmpêk thei cheu ni naw ni,’ ti rawh,” tiin.
26LALPA chun Mosie a biek a,
27“Bâwngchal amanih, berâm amanih, kêl amanih a hung piengin, a pui kuomah ni sari a um ding a nih; ni riet nia inthawka hnung tieng chun LALPA kuoma mei hmanga thilin- hlânah pawm thei nîng a tih.
28Bâwngpui amanih, berâmpui amanih, a tê leh ni khat sûng in that ding a ni nawh.
29Lâwmthu hrilna inthâwia LALPA kuoma in inthâwi pha, pawm tlâk in ni theina dingin in inthâwi ding a nih.
30Chu ni chun fâk zo ding a na, a zînga chena dingin iengkhawm in khêk ding a ni nawh: Kei hi LALPA chu ka nih.
31“Chuleiin, ka thupêkhai hi in pawmin in zâwm ding a nih: Kei hi LALPA chu ka nih.
32Chun, ka hming inthieng hi in suksiet ding a ni nawh a, Israel thlahai laia chun chawimawiin ka um ding a nih;
33Kei hi nangni sukthiengtu in Pathien ni dinga Aigupta rama inthawka ṭhuoi suoktu cheu ka nih: Kei hi LALPA chu ka nih,” tiin.
Currently Selected:
LEVI DÂN 22: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
