LEVI DÂN 2
2
Fâkmi Thilinhlân
1“Tukhawmin Fâkmi thilinhlân, LALPA kuoma thilinhlâna ân hlân pha, a thilinhlân chu beiphit inditak a ni ding a nih; hriek bur a ta, a chungah beraw khawm sie bawk a tih;
2chun, Aron naupasal thiempuhai kuomah fepui a ta; chutaka beiphit inditak vei khat, hriek le beraw po po le chun la suok a ta; chun, thiempu chun hriet zingna dingin mâichâma chun rawng a ta; chu chu LALPA ta dinga riminhniktak, mei hmanga thilinhlân nîng a tih.
3Fâkmi thilinhlân la lâk mahlahai chu Aron le a naupasalhai ta ding nîng a tih; chu chu LALPA ta dinga mei hmanga thilinhlânhaia inthieng tak chu a nih.
4“Fâkmi thilinhlân, a urnaa ur thilinhlân în hlân chun beiphit inditak, hrieka hmet chawl ṭhanglo amanih, hrieka nâl chawl ṭhanglo beiphêk inphân amanih a ni ding a nih.
5I thilinhlân chu thlênga ur, fâkmi thilinhlân a ni chun, chawl ṭhanglo hrieka hmet beiphit inditak a ni ding a nih.
6Khawi i ta, hriek chu bur khum i ta; chu chu fâkmi thilinhlân a nih.
7I thilinhlân chu bêldara zêu, fâkmi thilinhlân a ni chun beiphit inditak le hrieka siem a ni ding a nih.
8Chuong thila siem fâkmi thilin- hlân chu LALPA kuoma chun hung lâng i ta; chu chu thiempu kuoma chun inhlân nîng a ta; chun, ama chun mâichâma chun a hungpui ding a nih.
9Chun, thiempu chun fâkmi thilinhlâna inthawkin hriet zingna chanpuol chu la suok a ta, mâichâma chun rawng a tih. Chu chu LALPA ta dinga riminhniktak, mei hmanga thilinhlân a nih.
10Fâkmi thilinhlâna lâk mahla- hai chu Aron le a naupasalhai chan- puol ding nîng a tih; chu chu LALPA ta dinga mei hmanga thilinhlânhaia thil inthieng tak chu a nih.
11“Fâkmi thilinhlân hrim hrim LALPA kuoma inhlân ding chu chawl ṭhanga siem ding a ni nawh; LALPA ta dinga mei hmanga thilinhlâna ding chun chawl amanih, khuoizu amani hrim hrim in raw ding a ni nawh.
12Rahmasa thilinhlân ding chu LALPA kuoma chun inhlân in ta; nisienlakhawm, thil rim inhnik thil- inhlân angin mâichâm chunga chun in sie ding a ni nawh.
13I fâkmi thilinhlân po po chu machi saw vawng i ta, i fâkmi thilin- hlâna chun i Pathien thuthlung machi chu i theinghil ding a ni nawh; i thilinhlân po poa chun machi în hlân sa ding a nih.
14“Rahmasatak fâkmi thilinhlân LALPA kuoma în hlân chun, i bu thar hmasataka mi, a vui tharlâma mi ngei sukphitin, meia em hminin fâkmi thilinhlân dingin în hlân ding a nih.
15Chun, hriek nâl i ta, a chungah beraw i sie ding a nih; chu chu fâkmi thilinhlân a nih.
16Thiempu chun, bu sukphita hriet zingna chanpuol le hriek a ṭhen le beraw po po le chun a raw ding a nih; chu chu LALPA ta dinga meia thilinhlân a nih.
Currently Selected:
LEVI DÂN 2: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
