ISAI 60
60
Zion la hung ropuina ding
1Tho la, var rawh, i var chu a hung tlung a; LALPA ropuina chu i chungah a hung suok ta hi.
2Ngai ta, inthimin leihnuoi hi ân khum ding a ni sih a, inthim sâmupin mihai ân khum bawk ding a nih: nisienlakhawm, LALPA chu i chung- ah hung suok a ta, a ropuina chu i chungah lân lang a tih.
3Chuongchun, hnam tin chu i var tieng chun hung an ta, lalhai khawm i hung suok varna tieng chun hung bawk an tih.
4Tang la, i mit inlên vêl la, en rawh: an rêngin an inkhâwm a, i kuomah an hung a ni hi: i naupasal- hai chu hlataka inthawkin hung an ta, i naunuhmeihai chu hung pawm an tih.
5Chu pha chun hmûng i ta, var tâng i tih, i lungril chu inthin a ta, suklienin um a tih; tuisuorieta sum- dâwngna tamtak el chun nanga tieng a pan ding a ni leiin le, hnam tin sum chun i kuom a hung tlung ding a ni leiin.
6 #
Mt 2.11
Sanghâwngsei tamtak el chun tuom dûl dûl an ti che, Midian le Epha rama sanghâwngsei tuoihai chun: chuong po pohai chu Seba rama inthawkin hung an tih; rângkachak le beraw hung phur an ta, LALPA inpâkna thu inhriettir an tih.
7Kedarhai ran ruol po po chu i kuoma um khâwmin um an ta; Nebaiothhai berâmchalhai chun i rawng bâwl an tih; ka mâichâma chun lâwmin hang fêng an ta, ka ropuina in chu chawimawi ka tih.
8Sûm anga vuong le vaṭhu anni tukver pana vuong mer mur anga vuonghai saw tuhai am an na?
9Ama chun a chawimawi che leiin LALPA i Pathien hming ta ding le Israelhai Mi Inthieng ta ding chun i naupasalhai an tangka le rângka- chak leh hlataka inthawka ṭhuoi dingin matheiloin thlierkârhai chun mi nghâk an ta. Tarsis lawng lienhai chun hmasak inchûng an tih.
10Ram dang mihai chun i kul banghai chu rem nâwk an ta, an lalhai khawma i rawng bâwl tâng an tih: ka lunginsen chun ka vuok che a, nisienlakhawm, ka ditsaknain ka lunginsiet si che a ni hi.
11 #
Tp 21.25-26
I kawtkhârhai khawm hawngin um zing a ta; asûn azânin khâr ni naw nih; mihaiin hnam tin sum chu i kuomah an hung lâk a; an lalhai khawm an hung ṭhuoi ve theina dingin.
12I rawng bâwl nuom naw hnam le ram chu a bohmang âwm sih a; anih, chuong hnamhai chu suksiet dêrin um an tih.
13Ka hmun inthieng cheimawi dingin Lebanon ropuina chu i kuom- ah hung a ta, fâr dâm, phân dâm, fârsuok dâm chu hung an tih; chuongchun, ka kein a sirna hmun chu sukropui ka tih.
14 #
Tp 3.9 Chun, nangma sukrimsituhai naupasalhai chu kûnin i kuomah hung an ta; nangma hmusittuhai po po chu chibai bûkin i kepha hnuoiah kûn an tih; nang chu, “LALPA khaw- pui, Israelhai Mi Inthieng Zion,” tîng an ti che.
15Tu khawm isir ngai lo khawpa râusan le theidaa i um aiah kumkhaw suong tak, suon tamtak lâwmnaah siem ka ti che.
16Chun, hnam tin nênetui fâwp i ta, lalhai nêne khawm nêng i tih; kei LALPA hi nangma sandamtu le nangma intlantu, Jakobhai Mi Hrât chu ka nih ti la hre bawk i tih.
17Dâr aiah rângkachak hung lâng ka ta, thîr aia khawm tangka hung lâng ka tih, thing aia khawm dâr, lung aia khawm thîr; lungmuongna chu i hotuah ruot bawk ka tih; felna chu nangma phûttuah ruot ka tih.
18Nunsetaka thil thaw ri chu i ramah hriet ni ta naw nih a, râusan- na le sietna rihâu khawm i ramri sûngah hriet ni ta naw ni; i kul chu, “Sandamna,” ti lem i tih, i kawt- khârhai khawm, “Inpâkna” ti bawk i tih.
19 #
Tp 21.23; 22.5 Nisa khi sûna nangma êntu ni ta naw nih a; thla khawm khin varna dingin sukvar ta bawk naw ni che; LALPA ruok chu i ta dingin kum- khuoa vartuah um tâng a tih, I Pathien chu i ropuina dingin um bawk a tih.
20I nisa chu tla ta naw nih a, i thla khawm chu bo ta bawk naw nih: LALPA chu i kumkhaw var a ni ding a ni sih a, i lusûn nihai chu a tâwp ta ding a ni sih a.
21I mihai khawm an rêngin mi fel nîng an ta, i ram hi hluo kumkhuong an tih; chawimawia ka um theina dingin anni chu a zung kaksuok ka phun, ka kutsuok chu nîng an tih.
22Mi chîn chu sâng khat ni tâng a ta, mi chiterek khawm hnam hrâttak ni tâng a tih; kei LALPA hin a hun pha chun intlungtir vak ka tih.
Currently Selected:
ISAI 60: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
