Popular Bible Verses from ISAI 60

Share

Tho la, var rawh, i var chu a hung tlung a; LALPA ropuina chu i chungah a hung suok ta hi.

Chuongchun, hnam tin chu i var tieng chun hung an ta, lalhai khawm i hung suok varna tieng chun hung bawk an tih.

Ngai ta, inthimin leihnuoi hi ân khum ding a ni sih a, inthim sâmupin mihai ân khum bawk ding a nih: nisienlakhawm, LALPA chu i chung- ah hung suok a ta, a ropuina chu i chungah lân lang a tih.

Mi chîn chu sâng khat ni tâng a ta, mi chiterek khawm hnam hrâttak ni tâng a tih; kei LALPA hin a hun pha chun intlungtir vak ka tih.

Nisa khi sûna nangma êntu ni ta naw nih a; thla khawm khin varna dingin sukvar ta bawk naw ni che; LALPA ruok chu i ta dingin kum- khuoa vartuah um tâng a tih, I Pathien chu i ropuina dingin um bawk a tih.

I nisa chu tla ta naw nih a, i thla khawm chu bo ta bawk naw nih: LALPA chu i kumkhaw var a ni ding a ni sih a, i lusûn nihai chu a tâwp ta ding a ni sih a.

Chu pha chun hmûng i ta, var tâng i tih, i lungril chu inthin a ta, suklienin um a tih; tuisuorieta sum- dâwngna tamtak el chun nanga tieng a pan ding a ni leiin le, hnam tin sum chun i kuom a hung tlung ding a ni leiin.

Tang la, i mit inlên vêl la, en rawh: an rêngin an inkhâwm a, i kuomah an hung a ni hi: i naupasal- hai chu hlataka inthawkin hung an ta, i naunuhmeihai chu hung pawm an tih.

I mihai khawm an rêngin mi fel nîng an ta, i ram hi hluo kumkhuong an tih; chawimawia ka um theina dingin anni chu a zung kaksuok ka phun, ka kutsuok chu nîng an tih.

Nunsetaka thil thaw ri chu i ramah hriet ni ta naw nih a, râusan- na le sietna rihâu khawm i ramri sûngah hriet ni ta naw ni; i kul chu, “Sandamna,” ti lem i tih, i kawt- khârhai khawm, “Inpâkna” ti bawk i tih.

I kawtkhârhai khawm hawngin um zing a ta; asûn azânin khâr ni naw nih; mihaiin hnam tin sum chu i kuomah an hung lâk a; an lalhai khawm an hung ṭhuoi ve theina dingin.

Sanghâwngsei tamtak el chun tuom dûl dûl an ti che, Midian le Epha rama sanghâwngsei tuoihai chun: chuong po pohai chu Seba rama inthawkin hung an tih; rângkachak le beraw hung phur an ta, LALPA inpâkna thu inhriettir an tih.

Ram dang mihai chun i kul banghai chu rem nâwk an ta, an lalhai khawma i rawng bâwl tâng an tih: ka lunginsen chun ka vuok che a, nisienlakhawm, ka ditsaknain ka lunginsiet si che a ni hi.

Tu khawm isir ngai lo khawpa râusan le theidaa i um aiah kumkhaw suong tak, suon tamtak lâwmnaah siem ka ti che.

Chun, hnam tin nênetui fâwp i ta, lalhai nêne khawm nêng i tih; kei LALPA hi nangma sandamtu le nangma intlantu, Jakobhai Mi Hrât chu ka nih ti la hre bawk i tih.