ISAI 57
57
1Mi fel chu an bohmang hlak a, tukhawma an lungrilin an ngaituo ngai nawh a, Pathien ngaisak mihai khawm lâk hmangin an um hlak a; mi fel chu thil ṭha lo hung tlung dinga inthawka lâk hmang an ni hlak ti tukhawma an ngaituo bawk nawh a.
2Lungmuongnaa chun an lût hlak a; an khumahai chun an zâl sâwldam hlak, indiktaka fe taphawthai chu.
3Nisienlakhawm, nangni dawi- thiemnu naupasal, uire le nawchi- zawr thlahai, hitaka hin hung hnai ro.
4Tu am nuiza siemna dingin in hmang hlak a? Tu am in hner in phen khum a, in lei in thlâk khum hlak a? Bawsietna nau, khêlinhlipna thlahai ni lo am in nih?
5Nangni thingsaisuo laia, thing buk hnuoi tina insukthafâna, ruom sûnghaia lung kak bula dâm naupang thattuhai.
6Vadung ruom lung innâm lai chun i chanvo a um a; chuong, chuonghai ngei chu; i chanpuol chu a nih, chuonghai ta ding ngei chun thil inhlân dâwn mi i buok a, thilpêk khawm în hlân kha. Chuong thila chun suklungawiin ka um ding am a nih?
7Tlâng insâng inzotak chunga chun i khum chu i sieh a, chutaka bawk chun inthâwina inhlân dingin i fe hlak.
8Kawtkhârhai le kawtkhâr bieng phênahai chun i hriet zingnahai chu în tung a, keia kuomah ni loin, mi dang kuomah în hlîp a, i hang fe sih a; i khum i zau a, an kuomah thu i thlung a; an khum chu i hmûnaa chun i hmangai a, an saruokna chu i en a.
9Chun, hriek leh lal kuomah i feh a, i riminhnikhai chu i thaw nasa zuol a, i palaihai chu hlatakah i tir a, Seol tlung rakin în sukhnuoi kha.
10I fena lampui hlat leiin i sâwl a, nisienlakhawm, “Beiseina hrim hrim a um nawh,” i ti si nawh a; i hrâtna sukharna i hmuh a; chuleiin, i châu ta naw kha.
11Tu am i ṭih a, în lau a, khêl i hril hlak a, kei i mi hriet ta nawh a, i lungrila i ngaituo ta naw hi? Sâwttak ka to zing an nâwm a nih? Ṭi khawm i mi ṭi naw hi.
12I felna thu hi hril ka ta, i thil- thawhai chu i ta dingin ienga ṭha- hnem ni naw nih.
13I khêk pha chun i lâk khâwmhai chun sanhim raw se che; nisien- lakhawm, anni rawi chu thliin lâng a ta, thuokin lên hmang vawng a tih; kei mi ringtu ruok chun ram hi nei a ta, ka tlâng inthieng hi hluong a tih.
14Chun, ama chun, “Sung pâwng ro, sung pâwng ro, lampui buotsai ro, ka mihai lampuia an tlûkna ding chu pei ro,” tîng a tih.
Pathien ṭhangpuina le a sukdamna
15 #
Mt 5.3 Mi chunghnung, chawisâng, chatuona um, a hming inthieng chun hieng ang hin a ti sih a; “Kei hmun chunghnung le inthiengah ka um a, mi thuhnuoirawlhai lungril sukhar ding le insîr ngawi ngawihai lungril sukhar dingin mi lungrila insîr ngawi ngawia thuhnuoirawltak kuoma khawm ka um a nih.
16Kumkhuoin ka do âwm si nawh a, lunginsen rawp bawk naw ning ah; chuong naw chun, mi lungril ka hmaah châu a ta, hringna ka siemhai khawm chu châu bawk an tih.
17A duâm khawhlona leiin ka lunginsen a, ka vuok a, ka hmai ka hip a, ka lung a sen a nih; ama hlak chu a lungril um dân pângngaihaiah kâwmâwtakin a um pei a.
18A um dânhai chu ka hmuh a, ama chu sukdam ka tih; ṭhuoi bawk ka ta, ama le a sûnpuituhai kuomah lungmuongnahai pe nâwk ka tih.
19 #
Tt 2.39; Eph 2.13,17 Kei chun hmûrhai ra ka siem hlak a, ‘Inremna, inremna, hlataka um kuoma le hnaitaka um kuoma chun um raw se,’ LALPAIN a tih, ama chu sukdam ka tih.
20Mi rilohai ruok chu tuisuoriet fâwn fâwn hlakhai ang chu an na; an um ṭawk ṭawk thei si nawh a, a tuihai chun hmunhnawk le chirhak a vawr suok hlak,” tiin.
21Ka Pathien chun, “Mi rilohai ta ding chun lungmuongna hrim hrim a um nawh,” a tih.
Currently Selected:
ISAI 57: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
