ISAI 40
40
Zion kuoma Lalpa thlamuongna thu
1Thlamuon ro, ka mihai hi thla- muon ro, in Pathien chun a tih.
2Jerusalem mihai kuomah thla- muongna tieng pangah thu hril unla, an indona chu a tâwp a, an suolna chu ngaidam an nih a, an thil suksuol po po aiah LALPA kuta inthawkin a let hniin an hmu tah ti hril ro.
3 #
Mt 3.3; Mk 1.3; Lk 3.4; Jn 1.23 Mi khêk râwl chun, “Thlalêrah LALPA lampui buotsai unla, ram ṭâwla chun ei Pathien ta dingin lamlien sukruol ro.
4Ruom tin suksâng ni vawng a ta, tlâng tin, muol tin sukhnuoi ni bawk a tih; lampui kâwihai chu suktlûn nîng an ta, ân ṭum nawna laihai chu sukruol ni bawk a tih;
5 #
Lk 3.5-6
chun, LALPA ropuina chu suk- lang nîng a ta, mi po poin chu chu hmu seng an tih; LALPA bau chun a hril ta sih a,” a ta.
6Râwl chun, “Khêk rawh,” a tih a. Chun, kei chun, “Ieng thu hrilin am khêk ka ta?” ka ta.
7“Mi po po hlohna ang an na, an ropuina po po khawm phûl pâr ang a nih: LALPA thuok chun a mût leiin hlohna chu a vuoi a, a pâr chu a ṭuoi hlak; mihai chu hlohna ang an ni ngei el.
8 #
1 Pet 1.24-25
Hlobet chu a vuoi a, a pâr chu a ṭuoi hlak: ei Pathien thu ruok hi chu chatuonin um zing a tih.”
9 #
Is 52.7; Nah 1.15; Tt 10.36; Rom 10.15 Aw Zion kuoma chanchin ṭha hriltu, tlâng insângtaka hin hang fe rawh, aw Jerusalem kuoma chanchin ṭha hriltu, inringtakin i râwl insuo rawh; insuo rawh, ṭi naw rawh; Juda khuohai kuoma chun, “En ta u, in Pathien hi!
10En ta u, Lalpa PATHIEN chu mi hrâttak angin a hung ding a ni hi; a bân chun a aiah ro rêl a tih; en ta u, a lâwmman chu a kuomah a um hi, a thungna chu a hmaah a um bawk a.
11Ama chun berâm vêngtu angin a pâwl chu châwm a ta, berâmtehai chu a bânin pawm khâwm a tih, a âng- sûnga siein fepui a ta, te ṭhuoi laihai chu damtêin ṭhuoi diel diel a tih,” ti rawh.
Khaikhin ruollo Israel Pathien chu
12Tuin am tuihai chu a kutpha zâwla chau inkhih a, vân khi khâp chaua inkhih a, hnuoia pilvut hi te- khâwng pakhat chaua thun vawng a, tlânghai chu khaina chaua bûk a, muol pâwng hai chu bûkna chaua bûk kha le?
13 #
Rom 11.34; 1 Kor 2.16 Tuin am LALPA thlarau chu thil thaw dân ding a khîkhmu hlak a? Annawleh, tu am a remruotpêktu nia ama inchûktir hlak?
14Ama chun tu am a râwn a, tuin am ama chu inhriettir a, rorêlna kawng inentir a, hrietna inchûktir a, hrietthiemna kawng inentir hlak?
15Ngai ta, hnam tin chu bâlṭina tui far khat ang chau an na, bûknaa thil nawi mahla kai ang chaua ngai an nih; ngai ta, ama chun thlierkârhai chu thil chiterek angin a lâk nel nel el hlak a.
16Lebanon meu khawm ti khawp a ni nawh a, a rama ranhai khawm pumrawhmanga inthâwina khawp an ni bawk nawh.
17Hnam tinrênghai chu a hmaa chun iengkhawm an ni nawh a, ama ngai chun iengkhawm ni lo nêka tlâwm lem, boruok el an nih.
18Pathien chu tu lêm hrilkhîng in ta? Annawleh, ieng lim am ama le chun hrilkhîng in ta?
19Mi lim siemfâwm hi, sinthaw mi chun a sung a, rângkachak sut mi chun rângkachakin ân luon a, chu chu ding chun tangka khaidiethai a sungpêk hlak.
20Chuong ang thilpêk pe zo loa, pase taluo chun thing hmawn lo ding a thlang hlak; milim siemfâwm, inhnîng lo ding, a ta dinga inngîrtirpêktu ding ama ta dingin a zawng hlak.
21In lungrilin in hriet ngai naw am a nih? In nain in hriet ngai naw am a nih? A tira inthawk khan an hril naw cheu am a nih? Leihnuoi insieng tira inthawk khan in hrietthiem naw am a nih?
22Ama chu leihnuoi inkuolkhum- na chunga ṭhung chu a nih; a mit- hmua chun hnuoi chunga umhai chu khâuhai ang chau an nih, ama chu vân khi puon in chung anga keiphar a, puon in umna ding hmuna zâr a;
23mi lienhai iengkhawm ni loa siem hlaktu chu a nih; ama chun hnuoia rorêltuhai chu boruokah a siem hlak.
24Anih, phun an ni nawh a, anih, tu an ni nawh; anih, an kûng chun hnuoiah zung a kei nawh; chu nawa khawm, ama chun anni chu a mût a, an vuoi a, thlivirin busi a lâk hmang angin a lâk hmang hlak.
25Tu lêm mi hrilkhiin, tu tluk ang chau âm in mi ruot ding a na? Mi Inthieng chun a tih.
26Chungtienga khin in mithai hang inlên unla, khienghai khi tu siem am an na, en ta u: ama chun sipaihai khi indawt peiin a ṭhuoi suok hlak a, an hmingin a ko seng hlak a; a hrâtna nasat lei le, thilthawtheina tienga a hrât leiin pakhat khawm kim naw an um ngai nawh.
27Iengdinga, aw Jakobhai, hieng anga in thaw am a na, iengdinga, aw Israelhai, hieng anga in hril am a na, “Ka lampui hi LALPAA inthawka thup a na, ro a mi rêlpêkna hi ka Pathiena inthawka lâk hmang a ni tah,” ti hi?
28In lungrilin in hriet zing hlak nâwm a nih? In nain in hriet ngai nâwm a nih? Kumkhaw Pathien, LALPA, kâwlkawdawng chen Siemtu chu, a châu ngai nawh a, a sâwl ngai bawk nawzie hi; a hrietthiemzie chu zawng suok ruol a ni nawh.
29Châuhai kuoma chun thilthaw- theina a pêk hlak a; hrâtna hrim nei nawhai chu a sukhrât hlak.
30Tleirâwlhai meu khawm sâwlin châu an ta, tlangvâlhai khawm chu tlu dêr an tih;
31LALPA nghâktuhai ruok chun an hrâtna chu siem ṭha nâwk an ta, mupuihai angin thlain hang vuong an ta, sâwl loin tlân an ta; châu loin kein fêng an tih.
Currently Selected:
ISAI 40: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
