ISAI 14
14
Babulon lal deusâwnna
1LALPA chun Jakob rawi chu lunginsiet a ta, Israelhai chu thlangin anni rama ngei chun a lân umtir ding a ni sih a; chun, ram dang mihai chun anni chu hung zâwm an ta, Jakob sûnghai chu chel tlat an tih.
2Chun, chi tin chun anni ṭhuoi an ta, an hmun ding chu intlun an tih; chuongchun, Israel sûnghai chun LALPA rama chun anni chu suokpa- ahai le suoknuahai la nei an tih; anni sala mantuhai chu salah la man an ta, anni suknawmnatuhai chunga chun ro la rêl an tih.
3Chun, i lungngainaa inthawk dâm, i buoinaa inthawk dâm, sinthaw intaktak an inthawtirna chea inthawk dâma LALPAIN ân châwltir nia che chun hieng ang hi nîng a tih,
4 #
Hab 2.6; Tp 18.16 hi tîelna thu hi Babulon lal khêkkhumin la hril i tih, “Iengtizie am a na, nêksâwrtu chu a va re ta de! Iengtizie am a na, rângkachak khawpui chu a va re ta de!
5LALPA chun mi rilo hmawl chu a suktliek tah; rorêltuhai lal hmawl chu;
6mi tin lunginsen puma vaw zawt zawt hlak a, hnam tin lunginsen puma tu ikhap khawm ngai loa suk- nawmnatnaa ro rêlpêkna hlak chu.
7Leihnuoi pumpui hi a châwl a, a re vawng vawng a; hla an sak suok phut a.
8Anih, i chungthu leiin fârhai chu an hlim a, Lebanon tlânga sidar thinghai leh; ‘Suktlâwma i um chin chu phûr thlutu ding hrim hrim kan kuomah an hung ta ngai nawh.’ tiin.
9Hnuoi tienga inthawka Seol chu i hung tlung tuok ding chein, nangma leiin a buoi mur mur a nih; mithi, hnuoia ṭhuoituhai po po chu, nangma leiin a chawktho a, hnam tin lal po pohai chu an lalṭhungphaa inthawk chun a keitho tah.
10Chuong po po chun nang chu bein, i kuomah hieng ang hin hril an tih, ‘Nang khawm keini ang bawkin i hrât naw ve tâm a nih? Keini um angin i um tâm a nih?
11I ropui bûr bûrna chu Seola ṭhuoi thlâk a ni tah, i perkhuong inri bur burhai leh; chawkchawnâl chu i hnuoiah ân phah a, thil ngêhai chun ân khum ta che a ni hi,’ tiin.
12“Aw sikhawvar, zîngkâr naupa, iengtiziea vâna inthawka tla am i ni ta leh? hnam tin sukthlutu, iengtiziea hnuoia sât thlâka um am i ni ta leh?
13I lungrila chun, ‘Vânah hang fêng ka ta, Pathien arasihai chung tienga khin ka lalṭhungpha dawm sâng ka tih; chun, inkhâwmna tlâng, hmâr tâwp rêta uma chun ṭhung ka ta;
14sûm nêka insâng lemahai khin hang fêng ka ta, Achunghnungtak angin um ka tih,’ i ti hlak vei le khan.
15 #
Mt 11.23
Nisienlakhawm, Seolah, vânsam tâwp rêta dâm chun ṭhuoi thlâkin i um ding a ni si.
16A hmu taphawt che chun en ngun an ti cheh a, ‘Ama hi maw hnuoi sukthin a, ram tin sukhnîng a,
17khawvêl thlalêr anga siem a, a khaw umhai sukbohmang a, a salhai an in tienga fe dinga insuo ngailo chu,’ tiin, i chanchin la sût an tih.
18Hnam tin lal po po, an rêngin, mâni in sengah ropuitakin an in a.
19Nang ruok chu a zung kaksuok tirdakumtak le, râl ithat, kâwlhnâma sunthleng, khursûnga lunghai laia zu fehai silfên angin i thlân ina inthawka hlatakah pei suokin i um ta lem hi; ruong ke hnuoia sirde ang elin.
20I ram i suksiet a, i khuoletuihai i that leiin anni laia phûmin um ve naw ti nih. Thil ṭha naw thawtuhai hming chu kumkhuoin sâm naw ni hai.
21A tho a, leihnuoi hi khuoa an suksip nawna dingin, an puhai suol- na leiin a nauhai that zai rêl ro,” tiin.
22Chun, anni chu thaw dingin tho ka tih, sipaihai LALPA chun a tih; Babulona inthawka hming le a la um sunhai le, naupa le a naupa naupa chu sukbohmang ka tih, LALPAIN a tih.
23Saku ta dingin roah siem ka ta, tuihai ta dinga intling khâwmnaah siem bawk ka tih; sukbohmangna hmunphiin phît bawk ka tih, sipaihai LALPAIN a tih.
Assuria sukbohmang ding a nih
24Sipaihai LALPA chun hieng anga hrilin ṭawng ân khâm tah, “Matheiloin ka ngaituo ang tak hin hung tlung a ta;
25ka ruot ang tak hin um bawk a tih: ka rama chun Assuria mi chu suksieng ka ta, ka tlângahai chun chîl hrep ka tih, ti ang hin; chu hnunga chun a rîngkawl inbâttir chu annia inthawk chun bo tâng a ta, an rik inphurtir chu anni liengkoa inthawk chun bo bawk tâng a tih.
26Chu chu a nih, hnuoi chung po poa thuruot chu; chu bawk chu a nih hnam tinrêng chunga kut phar chu.
27Sipaihai LALPA chun a ruot ta sih a, tuin am lâkpêk a ta? A kut chu pharin a um tah a, tuin am inlâk- kîrtir a ti leh?” tiin.
Philistin mihai chunga rimsikna hung tlung ding
28Lal Ahaz thi kum khan hi phurrik hi a hung um tah a.
29Aw Philistin ram pumpui, nanga vuokna che hmawl chu a tliek ta leiin lâwm naw: rûl zunga inthawk chun rûlhmuk a hung suok ding a ni sih a; a ra chu rûl chawk vuong thei la nîng a tih.
30Mi rimsi nau lutîrhai chu tla diel diel tâng an ta, mi pasiehai chu himtakin bawk tâng an tih: chun, nanga zung ruok chu ṭâmin sukhlum ka ta, i ta la um sunhai chu thatin um an tih.
31 #
Jer 47; Ezek 25.15-17; Joel 3.4-8; Am 1.6-8; Zeph 2.4-7; Zek 9.5-7 Aw kawtkhâr, khêk rak rak rawh; aw khawpui, khêk rawh; aw Philistin, i pumin, în tuihmang zo tah; hmârtienga inthawkin meikhu a hung suok sih a; an hun ruotahai chun ân hnu hrim an um ngai nawh.
32Philistin hnam palaihai chu iengtin am dawn ei ta le? “LALPAIN Zion chu ân ngîr a, a mihai laia rimsihai chu amaa chun tlulût an tih,” tiin nîng a tih.
Currently Selected:
ISAI 14: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
