THUHRILTU 7
7
Varna ṭhatna chu
1 #
Tv 22.1 Hming ṭhat chu hriek hlutak nêkin a ṭha lem a;
Mi a thi ni chu a pieng ni nêkin a ṭha lem bawk.
2Ruoiṭhena ina fe nêkin, lusûnna ina fe chu a ṭha lem;
Chu chu mi po po tâwpna a ni sih a:
Mi dam chun a lungrilah sie tlat a tih.
3Innuina nêk chun lungngaina a ṭha lem a,
Hmêl lungngaina chun lungril a siemṭha sih a.
4Mi var lungril chu lusûn inah a um a;
Mi invêt lungril ruok chu hlim hlapna inah a um.
5Mi invêthai hlasak ngai nêk chun,
Mi var kâwkna ngaithlâk a ṭha lem.
6Bêl suong hnuoia hlinghai puok ṭak ṭak ang hi,
Mi invêt innuina khawm chu a nih;
Hi khawm hi teplo el a nih.
7Matheilovin, nêksâwrna chun mi var chu a sukvêt a,
Thamna chun lungril a suksiet.
8Thil chu a ṭanna nêkin a tâwp chu a ṭha lem a;
Lungrila zaidawthei mi chu lungrila chapo nêkin a ṭha lem.
9 #
Tv 14.17; Jak 1.19 Lunginsen dingin i lungrilah inhmaw naw rawh,
Lunginsenna chu mi invêthai ângsûnga um a ni sih a.
10“Tulai hun nêk hin tienlai nihai kha ieng ieng leia ṭha lem am a nih a?” ti naw rawh,
Chu thil în dawnna chu varnaa inthawk a ni si nawh a.
11Varna hi rochan ang bawka ṭha a na,
Anih, nisa hmutuhai ta ding lem chun a ṭha nasa zuol a nih.
12Tangka chu inhliekhuna a ni ang bawkin varna khawm chu inhliekhuna a na;
Hrietna ṭhatna chu: varna neitu hringna chu a vawng himpêk a nih.
13Pathien sinthaw chu ngaituo ta;
A kâwia a siem ta chu tuin am suktlûn thei a ta?
14Hlawtling nia chun hlim la, vângduoi nia chun ngaituo rawh; miin ama hnunga ding iengkhawm a hriet nawna dingin Pathien chun pakhat chu a dang ang bawkin a siem a nih.
15Ka teplo nihaia chun hi po hi ka hmu tah a; mi fel ama felnaa thi bohmang chu a um a; mi rilo a thil suol thaw pum zinga dam sâwt hrep chu a um bawk a.
16Intifel talaw naw la, insukvar talaw bawk naw rawh; iengdingin am nang le nang insukbohmang i ta?
17Rilo talaw naw la, invêt talaw bawk naw rawh; i hun tlung hmain iengdingin am thîng i ta?
18Hi hi i chel tlat hi a ṭha a nih, chutaka inthawk chun i kut khawm la kîr naw rawh; Pathien ṭîtuhai chun an la hung suoksan vawng ding a ni sih a.
19Varna chu mi var ta ding chun khawpuia rorêltu sâwm umhai nêk chun hrâtna a ni lem.
20Indiktakin, hnuoi chunga hin mi fel thil ṭha thaw a, thil suksuol ngailo an um nawh.
21Chun, mi thuhril nazawng ngaisak naw rawh, chuong naw chun, i siehlawin ṭawngsie ân phur che hre rawi i tih;
22nang ngei khawma chuong ang bawk chun mi danghai ṭawngsie în phur rawp hlak ti i lungrilin i hriet rawp sih a.
Varna ṭhatna chu
23Hi po po hi varnaa chun ka lo fie tah a, “Var tâng ka tih,” ka ta; amiruokchu, keimaa inthawk chun hlatak a nih.
24Chuong a hlata hla le nasataka inthûk chu tuin am hmu suok thei a ta?
25Ka ngha kîr a, ka lungril chun, hre ding le, zawng ding le, varna zawng suok dingin le; rîtlona hi invêtna a nih ti hre ding le, invêtna chu intlâwkna a nih ti hre dingin ka thlîr vêl a.
26Chun, nuhmei a lungril chu chânghai le lênhai, a kuthai chu hnâng ang el neitu chu, thina nêka ṭha lem ka hmu suok a; tukhawm Pathien suklâwmtu chu amaa inthawk suok thleng an ta, amiruokchu, mi suol chu amanu chun man a tih.
27Thuhriltu chun, Ngai ta, hi hi ka hmu suok tah, a nizât hmu suok dinga thil pakhat zoa a dang la um pei hi;
28chu chu ka lungril hin a zawng zing a, nisienlakhawm, ka la hmu suok nawh a; pasal pakhat sâng khat laia chu ka hmu suok a; amiruokchu, chuonghai lai po poa nuhmei pakhat chu ka hmu suok zo nawh.
29Ngai ta, hi chau hi ka hmu suok a, Pathien chun mi chu mi ngîl ni dingin a siem a, amiruokchu, anni chu mâni nuom dân dânin an khawsa ta lem a.
Currently Selected:
THUHRILTU 7: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
