THUHRILTU 4
4
1Chun, ka thlîr a, nisa hnuoia nêksâwrna thawa umhai po po chu ka hmuh a; chun, nêksâwra umhai mitthlihai chu ka hmu bawk a; thlamuontu hrim an nei nawh; nêk- sâwrtuhai tienga chun thilthaw- theina a um a, nisienlakhawm, anni chun thlamuontu hrim an nei nawh.
2Chuleiin, mi hring la dam zing- hai nêk hmanin, mi thi, thi ta hnung- hai chu vângnei lemah ka ngai tah a;
3anih, chuhai ve ve nêk chun, nisa hnuoia thawa um sin rilo la hmulo le, la um ngailo ni chu a ṭha lem a nih.
4Chun, mi chu a tuolbâwmin a thîkna hlak san, sinthaw hlawtling le sininrimna tinrênghai po po chu ka hmuh a. Hi khawm hi teplo el, lungril rimsikna el a nih.
5Mi invêt chun a kuthai a kuoh a, ama tisa ngei chu a fâk a.
6Lungril rimsikna#Lunginkhâwkna le insahla rak rakna manih, Inhuot rak le insahla raknaa le sinrimnaa kut sip hni nêkin, dei#Sâwldam taka manih “hrilsep um loa” zawta kut sip khat chu a ṭha lem.
7Chun, ka thlîr nâwk a, nisa hnuoia chun teplo el chu ka hmuh a.
8Mi pakhat naupasal amanih, unaupa amanih khawm pakhat khawm nei lo a um a; ana hlak chu, a sininrimna po po chun tâwp hrim a nei nawh a, a mithai chu hausaknaa chun a tlai ngai bawk nawh a. “Tu ta ding taka hienga mâni inhawitirna chân raka sininrim am ka ni lie?” khawm a ti ngai nawh. Hi khawm hi teplo bawk a nih; anih, tuorna natak a ni chau a nih.
9Pakhat nêk chun pahni chu an ṭha lem a, an sininrimnaa chun lâwmman ṭhatak an hmu leiin.
10An tlu chun, a pakhat chun a ruolpa chu a keitho ding a ni sih a; makhâta um ruok chu a chung a rik, a tlûk lai khawma ama keithotu ding khawm nei lo chu.
11Chunawa khawm mi pahni zâl hmunkhat chu an insuklum a; pakhat chau ruok chu iengtin am insuklum a ta?
12Mi makhâta um chu hne el thei ni sien khawm, pahni chun lo dodâl thei an tih. Hruol zai thum neia siem chu awlrawnga suktan a ni ngai nawh.
13Lal tar invêt, thurâwn khawm pawm nachâng hre ta lo nêk chun tleirâwl var le rimsi khawm chu a ṭha lem,
14lungina inthawka lal ni dinga hung suok amanih, a lalram sûng ngeia mi rimsia pieng hrim khawm ni sien.
15Nisa hnuoia mi hring inzi nuoi nuoi po po chu lal aia la hung ngîr ding tleirâwl#Hebraiah “tleirâwl pahni” zui ruokin ka hmuh a.
16Mi an chunga a umnahai po po chu hriet sêng ruol an ni nawh a, amiruokchu, ama hnunga hunghai chu amaa chun hlim chuong naw ni hai. Matheiloin hi khawm hi teplo el a na, lungril rimsikna el a nih.
Currently Selected:
THUHRILTU 4: HMARCLBSI
Highlight
Copy
Compare
Share
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
