BIAPHUAN 3
3
1“Sardis kawhhran vancungmi sinah hitihin ṭial. Pathian Thlarau pasarih le arfi pasarih a ngeitu nih hi bia hi a chim. Na tuahmi kha ka hngalh. A nungmi min nâ put nain na thi. 2I ralring law, an thih cuahmah lio ah a tangrihmi hna kha ṭhawnter hna. Na tuahmi kha Pathian hmaiah a tlingmi ka hmu hna lo. 3Cucaah na theihmi le na ngeih cangmi kha philh hna hlah, fek tein i tlaih law, i ngaihchih. Cucaah nâ ralrin lo ahcun, mifir bangin ka ra lai, zei cân ahdah kan rat hnawh lai kha na hngal lo. 4Sardis khua ah khan mi tlawmte an puan a thûrter lomi nan ngei; annih cu puanrang aih in ka sinah an leng ve lai, zeitintiah â tlâkmi an si. 5A teitu cu puanrang aihter a si lai i Nunnâk cauk chungin amah min kha ka hrawk lai lo, ka Pa hmai le a vanmi hna hmaiah a min kha ka ṭanh lai. 6Thlarau nih kawhhran hna sin i a chimmi hi hnâ a ngeimi nih thei ko seh,” tiah a ti. 7“Cun Filadelfia kawhhran vancungmi sinah hitihin ṭial, Mithiang, Mi taktak, David tawh ngeitu, ahohmanh khar lo dingin a hung i ahohmanh hun lo dingin a khartu nih khan hi bia hi a chim.” 8“Na tuahmi kha ka hngalh. Zohhmanh, ahohmanhnih khar khawh lomi inkâ on cia nahmai ah ka chiah, zeitintiah ṭhawnnâk tlawmte lawng na ngei nain ka bia fek tein nâ tlaih i ka min zong na hlaw lo. 9Ngaihmanh Satan sinagog i â pummi, Judah mi â ti nain a si taktak lomi, lih a chimmi hna kha na kehram ah kan biakter hna lai i zeitlukindah kan dawt hna ti kha ka hngalhter hna lai. 10Zeicatiah lungsau in ka nawlpêk nâ tlaih caah, lei minung hna hneksak dingin vawlei dihlak i a phân hngami teminnâk chungin kei zong nih kan luatter ve lai. 11Ngaihmanh, ka ra zau lai! Na bawiluchin kha ahohmanhnih an in chuh nâkhnga lo, na ngeihcia kha fek tein i tlaih. 12A teitu hna cu ka Pathian ṭempal tungah ka ser hna lai i cu hmun in a chuak ti lai lo. Amah ah ka Pathian he, ka Pathian khua, Jerusalem thar, ka Pathian sinin van i a rungṭummi min he ka ṭial lai. Cun amah cungah ka min thar ka ṭial lai. 13“Thlarau nih kawhhran hna sin i a chimmi hi, hnâ a ngeimi nih thei ko seh,” tiah a ti. 14“Cun Loadisia kawhhran vancungmi sinah hitihin ṭial, ‘Amen, Zumhtâk le Hngalhpitu Taktak, Pathian sermi thil hna Hrampi nih hitihin a chim. 15Na tuahmi kha ka hngalh, kih zong na kik lo, sat zong na sa lo. Na kih siseh na sat siseh ka duh. 16Cuticun sa ṭung lo, kik ṭung lo, a lum menmen nasi caah ka kâ chungin kan châk lai. 17Zeicatiah ka rum ko, chawva ka ngei, zeihmanh ka baulo, na ti, mi sifak, zângfah awktlâk, zeihmanh ngei lo, mitcaw, taklawng i a ummi na si kha nâ hngal lo. 18Cucaah na rum taktak nâkhnga ka sinah meiin thian termi sui rak caw dingin ruahnâk kan cheuh, taklawng i na ummi ningzah phentu dingah puangrâng le, na mit nih khua a hmuh nâkhnga mitfah sî zong ka sinah rak caw. 19Ka dawtmi cu ka sîk hna i ka chimhhrin tawn hna. Cucaah i zuam law i ngaihchih; 20Ngaihmanh inkâ hramah dir in ka kingh. Ahohmanh ka aw a theih i inkâ a hun ahcun a sinah ka lut lai i a sinah zanriah ka ei lai, anih zong kasin ah a ei ve lai. 21Teitu sinah ka bawiṭhutdan cungah ka pawng i ṭhutnâk nawl ka pêk lai, kei zong nih ka tei i ka Pa sinah a bawiṭhutdanh cung i ka ṭhut bantukin. 22“Thlarau nih kawhhran hna sin i a chimmi hi hnâ a ngeimi nih thei ko seh,” tiah a ti.
Currently Selected:
BIAPHUAN 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
