BIAPHUAN 21
21
1Cubangin van thar le lei thar kha ka hmuh, zeitintiah van hmasa le lei hmasa cu an um ti lo. Rili zong a um ti lo. 2Cuticun kei Johan nih, a thiangmi khualipi, Jerusalem thar cu, a vâ hmuh awkah dawh ngaiin ṭamhmi mo bantukin Pathian sin in van i a rung ṭum kha ka hmuh. 3Vanin a thang ngaimi aw nih, “Zohhmanh, Pathian biakthlâm cu minung sinah a um ai, Anih cu an sinah a um lai, annih cu ami le an si lai. Pathian hrimhrim nih a umpi hna lai i an Pathian a si lai. 4Cun an mit i mitthli vialte Pathian nih a hnawhpiak hna lai; thihnâk a um ti lai lo, ngaihchiatnâk le ṭahnâk zong a um ti lai lo. Fahnâk zong a um ti lai lo, zeitintiah thil hmasa hna cu an lo dih cang. 5Cuticun bawiṭhutdan i a ṭhumi nih, “Zohhmanh, thil vialte a thar in ka ser dih cang.” Cun ka sinah, “Ṭial tuah,” zeitintiah hi bia hna hi biatak le zumhtlâk an si,” tiah a ti. 6Cun ka sinah, “Lîm a si cang! Keimah cu Alpha le Omega, Hramthawknâk le Donghnâk. Ati a hâlmi kha nunnâk cerhti man lo tein ka pêk hna lai. 7Teitu nih thil vialte hi an co dih lai, a Pathian ka si lai, amah cu ka fapa a si lai. 8Asinain miralchia, zumlotu, fihnungmi, lainawngmi, horduh cuaimi, doihthiammi, milem biami hna le lih chimmi vialte umnâk ding cu mei le kât mei tili, thih voihnihnâk cu a si. 9Cuticun vanmi pasarih lak i pakhat hremnâk i a khatmi hrai pasarih â putmi nih a hun ka chawnh i ka sinah, “Ra tuah, Tuufano nupi, a mo cu kan hmuh sak lai,” tiah a ti. 10Cun anih nih a ngan i a sâng ngaimi tlâng ah Thlarau in aka kalpi, Pathian sin in van i a rungṭummi Khualipi lianngan, a thiangmi Jerusalem kha a ka hmuhsak, 11Pathian sunparnâk a ngeimi, a ceuning cu a sunglawi bik lungvar bantuk, jasper le crytal lungvar bantuk a si. 12Kutkâ hleihnih ngeimi a lianngan i a sângmi hau in kulhmi a si, cun kutkâ hram ah vanmi hleihnih le min ṭialmi kha an um, cu hna cu Israel miphun hleihhnih hna min an si; 13nichuah lei ah kutkâ pathum, chak leiah kutkâ pathum, thlang leiah kutkâ pathum, nitlak leiah kutkâ pathum an um. 14Cubangin khualipi nih hrambunhnâk hleihhnih a ngei, cuka ah Tuufano lamkaltu hleihnih hna min a um. 15Cun aka chawntu nih khualipi kulhnâk le kutkâ hna tahnâk sui hluang kung a ngei. 16Khualipi cu killi a ngei i a tung le avang â khat. Cun thluang kung cun khualipi kha atah i meng 1500 a si, a tung le a vâng le a sân lei kha â khat dih. 17Cuticun kulhnâk vampang kha a tah i minung tahnâk ningin, cucu vanmi tahnâk zong a si i dong 144 a chah. 18Kulhnâk vampang caah hmanmi cu jasper lungvar a si i khualipi cu a fiangmi thlalang bantuk sui thiang a si. 19Khualipi vampang hrambunhnâk hna cu a sunglawimi lungvar a phunphun in ṭamhmi an si, hrambunh pakhatnâk cu jasper a si, pahnihnâk cu sapphire a si, pathumnâk cu chalcedony a si i palinâk cu emerald a si, 20panganâk cu sardonyx, paruknâk cu sardius, pasarihnâk cu chrysolite, pariatnâk cu beryl, pakuanâk cu topas, pahranâk cu chrysoprase, hleikhatnâk cu jacinth le hleihnihnâk cu amethyst lungvar an si. 21Kutkâ hleihnih hna cu rili lungvar an si i kutkâ pakhat nih rili lungvar pakhat cio an ngei. Cun khualipi laifang lamhluan cu lanko i zohkhawhmi thlalang bantuk sui thiangmi a si. 22Asinain a chungah ṭempal ka hmu lo, zeitintiah Zeizongtuahkho Bawipa Pathian le Tuufano cu an ṭempal an si. 23Khualipi nih ceuhtu dingah ni le thla a herh lo, zeitintiah Pathian sunparnâk nih a ceuh dih. Tuufa cu an meiin a si. 24Cun miphun hna sin in khamhmi hna cu a ceunâk ah an lêng lai, cun vawlei siangpahrang hna nih an sunparnâk le hmaizahnâk cu an i luhpi lai. 25A kutkâ hna cu chunah an khar bal lo ( cuka ah cun zan a um ti lai lo ). 26Cun miphun hna nih sunparnâk le upatnâk an luhpi lai. 27Asinain cuka ah cun a thurhnawmmi zeihmanh a lut lai lo, fihnungmi thil chuahtertu le lihchimmi zong an lut lai lo, Tuufano Nunnâk Cauk i min ṭialmi lawng an lut lai.
Currently Selected:
BIAPHUAN 21: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
