BIAPHUAN 19
19
1Hithil hna hnu ah hin vanah mitampi aw thawng ka theih, “Haleluia! Khamhnâk le sunparnâk le upatnâk le ṭhawnnâk hna cu Bawipa kan Pathian ta a si! 2Zeitintiah a biaceihnâk kha a dik i a ding, zeicatiah a liannganmi hlawhhlângnu a horduhcuainâk in vawlei a hrawktu cu bia a ceih cang i a sal le hna thisen a chuahnâk kha a lehrulh ve cang.” 3“Haleluia, a meikhu cu zungzal in zungzal tiang a kai lai,” tiah an ti ṭhân. 4Cun upa 24 le thilnung pali hna cu an bawk i, “Amen! Haleluia” ti in bawiṭhutdanh i a ṭhumi Pathian kha an biak. 5Cuticun bawiṭhutdanh in aw a rung chuak i, “Nannih a sal le hna, Amah ṭihzahtu vialte a hme he a ngan he kan Pathian cu thangṭhat u,” tiah a ti. 6Cun mibu tampi aw thawng bantuk le, ti tampi aw thawng bantuk le a liannganmi khuari thawng bantuk kha ka theih, “Heleluia! Zeizongtuahkho Bawipa Pathian nih a uk,” tiah an ti. 7I lawm in i nuam u sih, Amah cu sunparnâk pe u sih, zeitintiah Tuufano nupi ṭhit cân kha a phân cang, a nupi ding zong â tim cang.” 8Puanrâng, a thiangmi le a tleumi aihnâk nawl an pêk, puanrâng cu mithiang hna tuahmi dinnâk a si. 9Anih nih ka sinah, “Tuufano nupi ṭhitnâk i sawmmi hna cu mithluachuak an si,” tiah ṭial tuah, a ka ti. Cun ka sinah, “Hi hna hi Pathian chimmi taktak an si,” tiah a ti. 10Cun ake hram in biak ka timh. Asinain ka sinah, “Hitihin tuah hlah! Keimah cu nanmah le nan unau Jesuh hngalhternâk bia cohlangtu nan sal hawi ka si ve ko. Pathian tu bia! Zeitintiah Jesuh hngalhternâk cu chimchungnâk thlarau a si,” tiah a ti. 11Cubangin van â ongmi ah, zohhmanh, rang râng ka hmuh. Cun a cungah a ṭhumi cu Zumhtlâk le Biatak tiah kawhmi a si i dinnâk in bia a ceih i ral a doh tawn. 12A mit cu mei alh bantuk a si i Alu cungah bawiluchin tampi â chinh. Amah dah tilo ahohmanh nih an hngalh lomi min ṭialmi a ngei. 13Thisen ah ciahmi puan â aih i a min cu Pathian Bia ti a si. 14Cun van ralkapbu, puanrang â aihmi hna nih, rang râng hna cungah cit in Amah kha an zulh. 15Cubangin akâ chungin miphun hna a tuknâk ding a hârmi vainam a chuak. Cun thirfung he a uk hna lai. Zeizongtuahkho Pathian thinhunnâk ṭih a nungmi in misur nennâk khor ah a lamhchih hna lai. 16A puan le a phei ah: SIANGPAHRANG HNA SIANGPAHRANG LE BAWI HNA BAWI tiah ṭialmi a ngei. 17Cuticun ni ah a dirmi vanmi ka hmuh; cun aw thangpi in a au i van i a zuangmi vate vialte sin ah, “Ra u law, Pathian rawldanghnâk nganpi ah rak i pum u, 18siangpahrang sa le ralbawi sa, mi lianngan hna sa le rangtum le a cungah â citmi hna le mi vialte miluat le sal a ngan le a hme he, an sa nan ei khawh hna,” tiah a au. 19Cun sahrang, vawlei i siangpahrang hna le an ralkap hna he, rang râng cungah â citmi le a ralkap hna ralchanh le doh awkah an i pumh kha ka hmuh hna. 20Cuticun sahrang cu an tlaih, profet deu a mithmuh ah hmelchunhnâk a rak tuahtu le, khuaruahhar thil a tuah khawh ruangah sahrang hmelchunhnâk ngeitu le a lem a biaktertu hna zong a sinah an tlaih chih ve hna. An pahnih in an nungna in mei le kât in a kangmi tili ah an hlawnh hna. 21Cun a dang vialte hna cu rang râng cungah â citmi kâ chungin a chuakmi vainam in thah an si. Cuticun vanva vialte kha an sa in khimter an si.
Currently Selected:
BIAPHUAN 19: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
