BIAPHUAN 11
11
1Cuticun tahnâk ṭhiangṭhunh phairuang kung bantuk hi pêk ka si. Cun vanmi cu a dir i, “Tho law Pathian ṭempal cu biakṭheng hna le a biatu hna he tah hna. 2Asinain ṭempal kulhnâk hnu deuh intual tiang cun tah hlah, zeitintiah cucu Gentel mi hna caah pêk a si cang. Cun annih nih khua thiang kha thla 42 chung an uk lai. 3Cun ka biahngaltu pahnih hna sinah thiltikhawhnâk ka pêk hna lai, cuticun buri puan aih in ni 1260 chung bia an phuan lai,” tiah a ti. 4Cu hna cu Oliv thing pahnih le mei vannâk pahnih vulei Pathian hmai i a dirmi an si. 5Cun mizei hmanhnih fahnâk pêk an duh tikah ankâ chung in mei a rak chuak i an ral kha a kangh hna. Cubantukin fahnâk pêk a timtu pauh cu hi bangin thah a si lai. 6Hi hna nih chimchung bia an phuan lioah ruahsur lo dingin van phih khawhnâk ṭhawnnâk pêk an si, cun ti kha thisen i canter khawhnâk an ngei i an duh cân pauh ah vulei hi zawtnâk rai phunphun in hrem khawhnâk an ngei, 7An hngalhternâk bia an chim dih in taw a ngei lomi khor chungin a rak chuakmi sahrang nih a doh hna lai i tei in a thah hna lai. 8Cun an ruak kha khua lianngan zatlâng lam, thlarau lei in Sodom le Ezipt an timi ah an suan lai, kan Bawipa an khenhchiahnâk hmun zong kha a si. 9Cuticun mikip le phunkip le, holhkip le miphun vialte nih nithum le a cheu chung an ruak kha an zoh lai i thlân i phum zong an siang hna lai lo. 10Vulei i a ummi minung hna cu an i lawm tuk lai i nuamhhnaihnâk kha an tuah lai, lawmhpinâk laksawng kha pakhat le pakhat an i kuat lai, zeicatiah cu profet pahnih hna cu lei i a ummi minung hna harnâk a petu an si caah a si. 11Cuticun nithum le a cheu hnu ah, Pathian sinin nunnâk thaw kha an chungah a lut i an dir, a hmutu hna kha ṭihnâk nganpi nih a tlaih hna. 12Cun van in aw thang ngai a rak chuakmi nih, “Hika hin rak kai uh” tiah an ti hna. Cun minmei lak in van ah an kai i an ral hna nih cat loin an zoh hna. 13Cu lio ah li fakpi in â hnin i khualipi cheuhra cheukhat kha a cim dih. Li hninhnâk ah cun mi 7000 an thi a nungmi hna nih thinphang ngaiin van Pathian cu sunparnâk an pêk. 14Cuticun ngaichiatnâk pahnihnâk cu a dih. Ngaihmanh ngaihchiatnâk pathumnâk kha a rak phân cawlh. 15Cuticun vanmi pasarihnâk nih a hun tum: Cun van ah khin aw thang ngaiin, “Hi vawlei siangpahrang pennâk hna cu kan Bawipa le a Krih pennâk ah â cang, zungzal in zungzal tiangin a uk lai,” tiah a au; 16Cuticun Pathian hmai ah an bawiṭhutdanh i a ṭhumi upa kul le li kha an bawk i Pathian kha an biak, 17“Maw Bawipa Zeizongtuahkho Pathian, A um liomi le A um cangmi le A um laimi na si. A liannganmi na ṭhawnnâk i bia na ceih caah lawmhnâk bia kan in chimh. 18Miphun hna cu an thin a hung i na thinhunnâk a rak phân ve ai. Mithi hna ca i na biaceihnâk a phâk lioah na sal profet hna le mithiang hna caah ṭuanman na pêk cân a si. Na min a ṭhzahtu milian le mihme hna tiangin vulei hrawktu hna na hrawh hna cân a phân cang,” tiah an ti. 19Cuticun van ah Pathian ṭempal cu â ong i a ṭempal chungah a biakamkuang kha a lang. Cun nimtlau â lek i thawngpang a thang, khua a ri, li kha â hnin i a ngan ngaimi rial kha an tla.
Currently Selected:
BIAPHUAN 11: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
