PHUNGTHLÛKBIA 25
25
1Hi hna zong hi Solomon phungthlukbia, Judah siangpahrang Hezekiah mi hna nih an ṭial chinmi cu a si. 2Thil thuh hi Pathian sunparnâk a si i thil hlathlai hi siangpahrang sunparnâk a si. 3Van a san bantuk le lei a thuh bantukin siangpahrang lungthin zong hi dahhriah khawh dih an si lo. 4Ngun chung i a ekchia kha hlawnh law, sosertu nih dawh ngaiin a ser khawh lai. 5Siangpahrang hmai i misuaksual kha hloh hna ulaw, a bawiṭhutdan cu dinnâk in fehter a si lai. 6Siangpahrang hmaiah nangmah le nangmah i santer hlah, mi ropi hna hmunhma zongah dir ve hlah. 7Milianngan hna ṭhutnâk kenh awkah ṭhialmi si nâk cha cun “Hika lei ah hin ra,” tiah kawhmi si cu a ṭha deuh. 8Biaceihnâk hmun ah rianrang tukin kal hlah, zeitintiah na innpa hna nih ningzak in na zo an in langh lai i a donghnâk ah zeitindah na tuah lai? 9Nabia cu na innpa he chimṭi hmasa ulaw, biathli cu midang sinah phuang hlah u. 10Culoahcun, a theitu hna nih an phuan chin lai i na min chiatnâk kha phuan dih a si sual lai. 11Chim awk a tlâkmi bia chim hi ngun bel chung i sui epal chiah bantuk a si. 12Fim ngai i chimhringtu biangaitu cu sui hnatonh le suiṭha phun ṭamhmi bantuk a si. 13A thlahtu ca i zumhtlâk lamkaltu cu fâng zun lio i hawhra bantuk a si, zeitintiah a pu le lungthin a thar ter. 14A pêk lomi pêk bangin a chim i a hmaihngal pimi cu, ruahti a zawi lomi khuadawm le thli bantuk a si. 15Lungsaunâk nih biaceihtu cu teikhawh a si, bia nem nih ruh a khiah khawh. 16Khuaihliti na hmu bal maw? na herhzat lawngin ding; culoahcun an simh lai i na luak dih sual lai. 17Na innpa innah lengkai tuk hlah; culoahcun an ning lai i huat na tong sual lai. 18Mah innpa ralchanh lei in biahngaltu deu si cu, tanbo le, vainam le, a zummi thal bantuk a si. 19Buaibai lio i zumh awk a tlâk lomi i bochan cu habeuh le keruh a pelhmi bantuk a si. 20Ngaihchiami sinah hla satu cu, khuasih lio angki phoihtu le, hma i cangal toih bantuk a si. 21Na ral a rawl aṭam ahcun, ei awk pe law, a ti ahal ahcun din awk pe. 22Cubangin natuah ahcun a lu cungah meiṭil na pumh a si lai i BAWIPA nih laksawng an pêk lai. 23Thlanglei thli nih ruah a ratpi, mi congoih a hmangmi mithmaiah thinhunnâk a um. 24Phunzai a hmangmi nu he inn kaupi i um nâk cha cun, inn cung zim a kil te i um hmanh a ṭha deuh. 25Ram hlapi in thawngpang ṭha theih hi, aba ngaimi caah tikik hraikhat bantuk a si. 26Misuaksual hmai i miding bia chimsual cu, chuahtâkmi tikhor le ti hna hrawh bantuk a si. 27Khuaihliti tamtuk ei hi a ṭha lo, cubantuk in mi nih amah sunparnâk a kawlmi hi sunparnâk a si lo. 28Mah le thlarau a uk kho lomi cu khualipi kulhnâk a cim i kulh a ngeiti lomi bantuk a si.
Currently Selected:
PHUNGTHLÛKBIA 25: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
