PHUNGTHLÛKBIA 23
23
1Uktu hna he rawl nan dumṭi tikah, nahmai ah ahodah a ṭhu ti kha ṭha tein ruat. 2Narawl a ṭamtuk zongah i sûm hrâm ko. 3A thawtnâk lawng kha ruat hlah, zeitintiah hlennâk rawl an si. 4Rum i timtuk hlah; nangmah theithiamnâk ruangah i sûm deuh. 5Asi kho lomi tiangin nâ ruahchan lai maw? rumnâk nih hin anmah tein thla an i ser i Mupi bantukin vanlei ah a zuanpi dih tawn. 6Mi khiarmi rawl cu ei piak hlah, a thawmi rawl a ngeihmi zong hngar hlah. 7Zeitintiah a lungin â ruahning tein a si ko, ei law ding, an ti lai, asinain a lungthin cu na sinah a um lo. 8Na ei chun hna zong na luak hna lai i amah na hlawrhnâk bia zong pakpalawng an si lai. 9Mihrut hna theih ah bia chim hlah, zeitintiah a fimmi na bia kha zei ah an rel piak lai lo. 10Hlanlio pi rikham mi cu ṭhialhlah, ngakṭah hna ram zong va tawng hlah. 11Zeitintiah anmah tlanhtu hna cu a ṭhawng i anmah lei ah ṭangin an ralchanh sual lai. 12Cawnpiaknâk lei ah na lungthin pe law, hngalhnâk bia thei dingin na hnâ chi. 13I sûmṭhen lo in ngakchia cu chimhring hna, tu lengmang ko a thi lai lo. 14Fungin na tuk lai i a nunnâk kha hell chungin na khamh lai. 15Ka fapa, na lungthin a fim ahcun, ka lungthin hi â lawm taktak lai. 16Asi, na hmurkâ nih biadik a chim ahcun, ka chunglei hi â lawm taktak lai. 17Na lungthin in misual hngar hlah seh, nitlâk tein BAWIPA ṭih kha hngar deuh. 18Zeitintiah donghnâk ni a phân te lai i na ruahchanmi cu pakpalawng a si lai lo. 19Ka fapa, ngai law fim; na lungthin cu lamdik ah chia. 20Misur hang a rammi kom hna hlah; sa a rammi zong kom hna hlah. 21Zeitintiah zuri mi hna le sarammi hna cu an si a fak lai, ngutnâk nih puanchia a aihter hna lai. 22An hringtu napa bia ngai law, na nu atar tikah zomhtaih hlah. 23Biatak cu caw law, zuar ti hlah, fimnâk le, cawnpiaknâk le theihthiamnâk hna he. 24Mifel nih apa fak piin a lomhter lai, fapa fim a hringtu zong afa kongah â lawm taktak lai. 25Nanu le napa cu lunglawm in um hna seh, an hringtu hna cu i lawm hna seh. 26Ka fapa, na lungthin ka pe, na mit in ka umtuning hi zoh seh. 27Hlawhhlang cu a thuk ngaimi khor a si, nu ṭhalo cu a bimi tikhor a si. 28A tlaih khawhmi a bawh tawn, patung hna lakah zumhtlâklonâk a karhter. 29Ahodah a van a sang tawn? ahodah a ngaihchia tawn? ahodah â si tawn? ahodah bia a ngei tawn? ahodah ruang um loin hliamhma a tuar tawn? ahodah mit sen kerkur in a um tawn? 30Zuhmun i a umpeng mi, zu a phunphun a cawhtawnmi hna an si. 31Sen kirker in a ummi zu khi zoh hlah; hraichung i phuan hliahmah i a um lio le, a luan thliahmah lio khi a zoh zong zoh hlah. 32A donghnâk ah rul bangin an cuk lai i rawchawk bantukin mi a cuk tawn. 33Na mit nih thilmak ngai a hmuh hna lai i nalungthin in â ngerhngawi mi thil hna a chim lai. 34Asi, rili cung i a itmi bantuk na si lai i tilawng puanzar cung i a itmi bantuk men na si lai. 35“Anka tuk i a fak fawn lo, anka velh i a fah ka hngal lo; zeitikah dah kâ hlauh lai i ka rit ṭhân lai,” tiah na ti lai.
Currently Selected:
PHUNGTHLÛKBIA 23: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
