PHUNGTHLÛKBIA 20
20
1Misur hang hi mi nisawhnâk a si i zureu hi buaibainâk a si; cu thil nih a hnuhmi mifim an si bal lo. 2Siangpahrang thinhun cu chiandeih a awnmi bantuk a si, a thinhunnâk chuahter lengmangtu cu amah nunnâk caah thilpawi a si. 3Buaibainâk daihtertu hi upat awktlâk an si, mihrut nih sikvelh an thawk zungzal. 4Thathu mi nih khuasih ruangah leithuan a huam lo, fângah tikah ei awk zeihmanh a ngei lo. 5Minung lungthin i remruatnâk cu a thûk ngaimi ti bantuk a si i theithiamnâk a ngeimi nih a hnuh lai. 6Mitam bik nih anmah ṭhatnâk lawng an chim tawn, asinain ahonihdah zumh awk tlâk an hmuh khawh lai? 7Miding cu zumhtlâk in a nung tawn, a fale zong nih a thluachuah an i hrawm tawn. 8Biaceihnâk ṭhutdan i a ṭhumi siangpahrang nih a mit hmuh i thilṭha lo vialte a hloh tawn. 9Ka lungthin ka thenh i ka sualnâk in ka thianghlim tiah, ahonihdah a ti khawh? 10Cuai thlainâk le tahnâk â lo lomi hi, BAWIPA mit hmuh ah fihnung an si dih. 11Ngakchia zong hi a tuahmi thil in hngalh a si i a tuahmi thil a thian le a dikmi in tah a si. 12Theihkhawhnâk hnakhaw le hmuhkhawhnâk mit hi BAWIPA tuahmi ve ve an si. 13Ihzau hi duh tuk hlah, na si a fak sual lai; na mit i au law cuticun eikhim rawl na ngei lai. 14Thil cawtu nih, “A ṭha lo,” tiah a ti; asinain a kal hnuah a cawkmi cu â hmaihngalpi ngai. 15Sui le lungvar cu tampi an um ko; asinain hngalhnâk hmurkâ cu lungvar sunglawimi bantuk a si. 16Hngalh lomi caah âmah â khângtu angki cu la law, hlawhhlang nu sinah pêk awkah biakamnâk aiawh ah pe ko. 17Hlennâk changreu cu a thaw khun, asinain a ei hnu ah a kâ cu lungte kep in a khat dih lai. 18Timhlamhmi hi remruat ṭi hnuah fehter a si tawn, felfai te i ruahhnu ah na ral kha doh. 19Mi hmursau â chawk lengmangmi nih biathi an phuan tawn, cucaah a hmur i hlawrhnâk deu kha va ngai hlah. 20Anu siseh a pa siseh chiat a serhtu cu, khuamui lakah a meiin hmihpiak a si lai. 21A hramthawkah rang tukin chawva lak hi, a donghnâk ah thluachuahnâk ah a cang bal lo. 22“Sual cu ka lehrul hrimhrim lai” ti hlah. BAWIPA hngak law, Amah nih an khamh lai. 23Cuai lung â lo lomi hi BAWIPA mithmuh ah fihnung an si i tahnâk diklo hna hi an ṭha lo. 24Minung kephau hna hi BAWIPA remruat an si, zeitindah minung nih amah lam a theih khawh lai? 25Khulrang tukin, hihi thilpêk thiang a si, ti hi minung caah rap a si, bikam hnu ah ngaihchihnâk a um tawn. 26A fimmi siangpahrang nih misuaksual hna a thlei hna i fangrialnâk in a rial tawn hna. 27Minung thlarau cu BAWIPA meiin a si, a lungthin chung muru vialte a ceuh tawn. 28Vêl le Biatak nih siangpahrang cu a kilven, a bawiṭhutdanh cu duhdawtnâk i dirter a si. 29Tlangval hna sunparnâk cu an thazâng a si, putar hna dawhnâk cu an sampar hi a si. 30Fâk lak i tuknâk nih thil ṭhalo a thenh, cubangin tukvelhnâk nih lungthin a thuhnâk bik zong a thenh tawn.
Currently Selected:
PHUNGTHLÛKBIA 20: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
