PHUNGTHLÛKBIA 10
10
1Solomon phungthlûkbia: fapa fimnih a pa a lomhter i fapa hrut cu a nu ngaihchiat tertu a si. 2Suahsualnâk in khawnmi chawva nih hlawknâk a ngei lo, asinain dinnâk nih thihnâk in a khamh. 3BAWIPA nih miding hna nunnâk pâmter a siang lo, asinain misuaksual hna duhnâk cu a hlawnh tawn. 4Thathutnâk nih sifahnâk a chuahter i taihmaknâk kut nih rumnâk a chuah pi tawn. 5Ṭhal cân i facang pumh a hngalmi cu fapa fim a si, asinain facang ṭuan lioah â hngilhmi cu ningzahnâk chuahtertu fapa a si. 6Miding lu ah thluachuahnâk a um i misuaksual hna hmurkâ cu zângennâk nih a khuh tawn. 7Miding philhlonâk hi thluachuahnâk a si i mi suaksual hna min cu a mot dih lai. 8Mifim nih a lungthin in nawlpêk a cohlan hna, asinain bia a tamhmi mihrut cu a tlu lai. 9Diknâk he a kalmi cu him tein a kal, asinain alam a ngawitertu hna cu hngalh an si te lai. 10Mit ṭhehhnawh a hmangmi nih buainâk an chuahter i mihrut biatam cu a tlu lai. 11Miding hmurkâ cu nunnâk tikhor a si i misuaksual hmurkâ cu zângennâk nih a khuh. 12Huatnâk nih remlonâk a chuahter i dawtnâk nih sualnâk vialte a khuhpiak dih. 13Theihthiamnâk ngeimi hmurkâ ah fimnâk hmuh a si i tuknâk fung cu theihthiamnâk a baumi hna kengah a um tawn. 14Mifim hna nih hngalhnâk an pumh luaimai, asinain mihrut hmurkâ nih rawhralnâk a naih peng. 15Mirum rumnâk cu a caah a fekmi khuapi a si i misifak hna rawhralnâk cu an sifahnâk kha a si. 16Miding rianṭuannâk nih nunnâk a chuahpi i misuaksual hna hlawh cu sual tuahnâk a si. 17Cawnpiaknâk a zultu hna cu nunnâk lam an si i chimhhrinnâk eltu cu lampialmi a si. 18Huatnâk a thuptu cu lih chimtu hmur a si i congoihnâk bia a karhtertu cu mihrut a si. 19Bia a tam ahcun palhnâk zong a tam, a hmur a kilvengtu cu mifim a si. 20Miding lei cu a ṭhami ngun bantuk a si i misuaksual thinlung nih man a ngei lo. 21Miding hmur nih mi tampi a cawm, asinain mihrut cu fimnâk bau ruangah a thi. 22BAWIPA thluachuahnâk nih mi a rumter i ngaihchiatnâk a chapchih bal lo. 23Mihrut caah sualnâk tuah hi nomhhnaihnâk ah a cang, asinain theithiamnâk ngeimi nih fimnâk a ngei. 24Misuaksual cu a ṭih bantuk tein a cungah a phân lai i miding duhmi tu cu pêk a si lai. 25Phusim â mer tikah mi suaksual cu a tlau lai, asinain miding nih zungzal hrambunhnâk a ngei. 26Mi thathu rianfial cu, misur thor nih ha a zatter i mei khu nih mit a khatter bantuk hi a si. 27BAWIPA ṭihzahnâk nih nunchung ni a sauter i misuaksual kum cu toiter a si lai. 28Miding hngahmi cu lunglawmhnâk a si lai i misuaksual hngahmi tu cu a lotlau dih lai. 29Midik caah BAWIPA lam cu thazâng a si i palhsualnâk a tuahtu cu rawhralnâk a phân lai. 30Miding cu ṭhialkâm an si hrimhrim lai lo, asinain misuaksual hna nih vawlei hi umnâk ah an hmanglai lo. 31Miding hmurkâ nih fimnâk a chuahter i a lei a ngawimi cu tanpiak a si lai. 32Miding hmurkâ nih cohlan awk a hngalh, asinain misuaksual hmurkâ cu lam ngawi a si.
Currently Selected:
PHUNGTHLÛKBIA 10: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
