FILIPI 1
1
1Paul le Timote, Krih Jesuh ah ṭemmi-sal hna nih, Filipi khua ah a ummi Krih Jesuh ah mithiang vialte le hotu le upa hna sinah; 2Pathian kan Pa le Bawipa Jesuh Krih sinin zângfahnâk le daihnâk nan sinah um ko seh. 3Nan kong karuah fate ka Pathian sinah lawmhnâk bia ka chim tawn, 4zeitintiah ni hmasa bikin atu tiang thawngṭha phuannâk ah hawikawmhnâk nankan ngeih peng caah, 5nan caah thlacamnâk le nawlnâk kha lunglawm tein ka tuah zungzal. 6Nanmah i rianṭha a thawktu nih Jesuh Krih ni tiangin a tlinter ko lai ti kha ka zumh. 7Ka lungthin ah nan ummi hi ka ruah tikah ka caah a dikmi a si tiah ka ruah, cikcin i khih ka sinâk le, thawngṭha kilvennâk le diknâk fehter dingin ka ṭuanmi rian ah nannih zong nih zângfahnâk in nan i hrawm ve. 8Zeitintiah Jesuh Krih velngeihnâk thawngin nan dihlak i hmuh kan duhning hna a ka hngalhpitu cu Pathian a si. 9Nan dawtnâk cu a tam chin lengmang i hngalhnâk le chunglei hmuhkhawhnâk nan ngeih chin chin nâkhnga thla ka cam. 10Cuticun Krih ni a phâk tiangin zumhtlâk le dotla nan si khawh nâkhnga, thilṭha sunlawinâk kha nan hngalh khawh lai i 11Pathian suparnâk le thangṭhatnâk caah, Jesuh Krih i a ummi dinnâk theitlai in nan khat lai. 12Ule nau hna, ka cung i a tlungmi thil kha thawngṭha karhnâk ding a si lehlam ti kha nan hngalh ka duh, 13cuticun cikcin i khih kasinâk chan hi siangpahrang inn a kilvengtu ralkap vialte sinah le mi vialte sinah Krih ruangah a si ti kha fiang tein a lang cang. 14Bawipa ah unau tamdeuh zong nih cikcin i khih ka si chan hi an hngalh cang, cuticun bia chimnâk ah ṭihnâk um loin an ral tu a ṭha chin chin. 15Cheukhat nih hnahchuahnâk le elhnialnâk he Krih bia hi an chim tawn, cun cheukhat nih duhnâk ṭha he an chim. 16Ahmasa deuh hna nih lungtak tak si loin, mah zawn ruahnâk le cikcin khih ka sinâk chapchih duhah Krih kong an chim tawn, 17asinain hmadung deuh hna nih cun thawngṭha kilvengtu i ruahmi ka si kha hngalin dawtnâk in an chim tawn. 18Zeidah poi? A deu in siseh, a tak in siseh, zeitilei pauh zongin Krih kong chim a si ko, cunih cun a ka lawmhter, kâ lawm chin lai. 19Zeitintiah nan thlacam piaknâk le Jesuh Krih Thlarau bomhnâk thawngin cu thil cu ka caah khamhnâk ah â cang lai ti kha ka hngalh. 20Hi ka taksa ah hin thihnâk in siseh nunnâk in siseh Krih cu thangṭhat in a um hrimhrim ko lai, zei thil pauh ah mualpho in ka um lai lo ti kha ralṭha in kâ ruahchanmi a si. 21Zeitintiah ka caah, nun hi Krih a si i thih hi miak a si. 22Asinain ka nun ah cun theitlai chuah lakin rian ka ṭuan lai tinâk a si i a zei deuh dah kâ thim lai, ka hngal lo. 23Zeitintiah kaphnih in hnuh chih ka si. Chuah i Krih sin um ka duh, cucu a ṭha deuh ngai ngai. 24Asinain taksa i umpeng hi nan caah a herh deuhmi a si. 25Cubantuk zumhfehnâk cu ngeiin, zumhnâk i lawmhnâk ah nan ṭhânchoh nâkhnga nan dihlak sinah ka umpeng ko rih lai ti kha ka hngalh, 26nansin ka rat ṭhân lai caah ka ca i nan i lawmhnâk cu Jesuh Krih ah a tam chinchin lai. 27Zeiasihmanhah, nan nunning le Krih thawngṭha cu i rem ko seh, cuticun nan sin i ka rat i kan hmuh hna ah siseh, nan sin i ka um lo ah siseh, thlarau pakhat i nan umnâk kong le ruahnâk pakhat i thawngṭha bia ah ṭhahnem nan ngaihning kha kan theih khawh lai, 28cun nanmah dohtu hna ruang i ṭih lo tein nan umnâk kong kha kan theih khawh lai, cucu an nih caah an kalsualning langhtertu a si i nannih caah Pathian sinin khamhnâk tu a si lai. 29Zeitintiah Krih aiawh i rian pêk nan si ah hin, Amah nan zumh lawng si loin Amah ruang i temtuar zong pêkchih nan si, 30keimah i nan hmuhmi raldohnâk atu tiangah a ummi bantuk hi nan ngeih ve cang.
Currently Selected:
FILIPI 1: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
