JEIM 2
2
1Ka ule ka nau hna, kan Bawipa Jesuh Krih, Sunparnâk Bawipa cu thleidan ngeihbu i zumh phun a si lo. 2Nan i pumhnâk inn ah sui zunghruk hrukmi, thil man sungin â thuammi ra in, culioah mi sifak hnipuan chia â aihmi ra ve sehlaw, 3thilṭha â hrukmi sinah, “Hi ṭhutnâk ṭha ah hin ṭhu tuah,” nan ti i mi sifak sinah, “Nang cu khi ka ah khin va dir, asiloah, kake chiahnâk ṭuang ah hin ṭhu,” nan ti ahcun, 4thleidan nan ngeihning nan langhter i ruahnâk sual he mi nan sawi a si hnga lo maw? 5Ka dawtmi unau hna, zohhmanh u, Pathian nih hi vawlei thil i misifak hna hi zumhnâk ah rumding le Amah dawtu hna sinah a kamhmi pennâk kha co cawk ah a thimmi an si lo maw? 6Asinain nannih nih mi sifak kha nan mualphoh hna. Mirum hna kha nanmah lamhchihtu le biaceihnâk hmun ah an hnuk tawntu an si lo maw? 7Kawh nan sinâk min ṭha a thangchiattu an si lo maw? 8Cathiang chung i siangpahrang nawlbia, “Nangmah nâ dawt bangin na innpa na dawt lai,” timi nan tlinter ahcun a ṭha; 9asinain thleidannâk nan ngeih ahcun, sualnâk nan tuah i nawlbia lila nih nawlbuartu bangin thiamlo an coter hna lai. 10Mizei pauh nih nawlbia vialte zul dih in pakhat te a buar ahcun, a dih lakin a buar a si. 11“Ṭangdang kai hlah,” titu nih, “Lainawng hlah” a ti fawn. Cuticun ṭângdang na kai lo zongah lai na nawn ahcun nawlbuartu ṭhiamṭhiam na si cang. 12Cuticun zolonâk nawlbia bang i biaceih dingin bia chim law, tuah. 13Zeitintiah mi cungah zângfahnâk ngei lomi cu zângfahnâk tel loin biaceih an si lai. Biaceihnâk cu zângfahnâk nih a tei. 14Ka unau hna, minih zumhnâk ka ngei tihmanhsehlaw, tuahsernâk a ngeihlo ahcun san a tlai hnga maw? cubantuk zumhnâk nih amah a khamh kho hnga maw? 15Unau nu siseh, unau pa siseh taklawng i um in ni fatin rawl ei awk ngeihlah sehlaw, 16nanlakah mi pakhat khat nih an sinah, “Hnangam tein um ulaw lum te le khim tein um ko u,” ti sehlaw, taksa ca i a herhmi kha nan pêk lo ahcun zeitindah san a tlaihpi lai? 17Cubantukin zumhnâk zong, tuahsernâk um loin, amah lawng a um ahcun, thi a si. 18Asinain mi pakhat nih, “Nangnih zumhnâk na ngei i kei nih tuahsernâk ka ngei, na zumhnâk cu tuahsernâk tel loin ka hmuhsak law ka tuahsernâk in ka zumhnâk kan hmuh sak lai,” a ti khawh ko. 19Pathian pakhat a um tiah na zumh maw. A ṭha, khuachia zong nih an zumh i an ther tawn dah kaw! 20Maw mihrutpa tuahsernâk tello i zumhnâk lawng cu zeihmanh a si lo kha na hngal duh taktak maw? 21Kan pa Abraham nih a fapa Isak biakṭheng i a pêkchanh lio ah khan tuahsernâk in a si lo maw thiam a co kha? 22Zumhnâk cu a tuahsernâk he an ṭangṭi, cuticun tuahsernâk nih zumhnâk cu tlam a tlinter a si lo maw? 23“Abraham nih Pathian a zumh i cucu a dinnâk ah ruahpiak a si,” tiah a timi Cathiang kha a tlinter. Cuticun Pathian hawikawm tiah kawh a si. 24Cuticun zumhnâk thawng lawng si loin tuahsernâk thawngin mi nih thiam a co tawn tiah nan theih. 25Cubantuk ṭhiamṭhiam in Rabab hlawhhlang nu zong nih khan ngiathlaitu kha a rak cohlan hna i lamdang i a tlunter hna ah khan, tuahsernâk in thiam a co a si lo maw? 26Zeitintiah taksa hi thlarau tello cun thi a si, cubangin zumhnâk hi tuahsernâk tello cun thi a si.
Currently Selected:
JEIM 2: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
