HEBRU 3
3
1Cucaah, a thiangmi unau, vanlei kawhnâk a comi hna, kan zumhnâk i lamkaltu le Tlângbawi Nganbik Krih Jesuh kha ruat tuah u. 2Moses kha Pathian chungkhar pumpi caah zumhtlâk a si bangin, Amah zong a dirhmun i a chiatu caah zumh a tlâk ve. 3Zeitintiah inn satu cu a sakmi inn nâkin upat deuh a si bantukin anih zong Moses nâkin upatnâk co awktlâk ah ruah a si. 4Zeitintiah inn pauh pauh cu mi pakhat khat sakmi an si nain zeizong vialte satu cu Pathian a si. 5Moses kha a hnu ah an chim te laimi thil hna hngalhpitu a si khawh nâkhnga Pathian chungkhar vialte lakah zumh a tlâk tak takmi sal a si, 6asinain Krih cu Fapa bangin Pathian chungkhar cungah zumhtlâk a si i chungkhar cu kanmah hi kan si, a dongh tiangin duh a nungmi zumhnâk le ruahchannâk kha kan i tlaih ahcun. 7Cucaah Thiang Thlarau chim bangin, “Nihin ah, a aw nan theih ahcun, 8ramcar i hneksaknâk ni bang khan nan lungthin hahter hlah u; 9Cuka ah nan hringtu hna nih anka hneksak i anka zuamcawh, kum 40 chung ka tuahmi kha an hmuh. 10Cucaah kha chan hna cungah ka thin a hung, cun an lungthin in an pial zungzal, ka lam kha an hngal lo,” tiah ka ti. 11Cuticun thin hungin chiat kâ serh i, “Ka dinhnâk ah an lut lai lo,” tiin. 12Unau hna, i ralring u, culoahcun Pathian nung kaltâk duhnâk tiangin nanmah lakah mi zeimaw chungah zumhlonâk lungthin sual a um sual lai. 13“Nihin” an ti lio ah hin ni chiar tein thazâng i pe u, culoahcun nan lakah mi zei pauh sual hlennâk in lung hahtermi nan si sual lai. 14Zeitintiah Krih cotu kan si a hramthawk i kan zumhnâk kha a dongh tiang fek tein kan i tlaih ahcun, 15“Nihin ah a aw nan theih ahcun, an ralchanh lio bang khan, nan lung hahter hlah u,” tiah ti a si. 16Ahodah thei ko nain ralthomi hna kha? A ngaingai tiah, Ezip ramin Moses nih a chuahpi mi vialte kha an si lo maw? 17Aho cungahdah kum 40 chung a thin a hun kha? Sualnâk an tuah i ramcar ah an ruak a tlumi kha an si lo maw? 18Cun ahosinahdah a dinhnâk chung i lut lo dingin chiat a serh hnawhmi hna kha? A bia a ngai lomi hna kha an si lo maw? 19Cuticun zumhlonâk ruangah an lut kho lo ti kha kan hngalh.
Currently Selected:
HEBRU 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
