ACT 24
24
1Ni nga hnu ah tlângbawi nganbik Ananias cu upa hna le biachim thiam pakhat, Tertulas he an rak phân. Annih nih mangki bawi sinah Paul cu taza an cuai. 2Paul an auh hnu ah, Tertulas nih sual phawt hram a thawk. “Hmaizahbik Felik, nangmah ruang i hnangam tein kan ummi ruangah le a fimmi na zohkhenhnâk tang i neinung ngai i kan um ruangah, 3zeitik cân pauh ah, khawzei hmun pauh ah lunglawm tein kan um tawn. 4Asinain saupi hna an hnawhtu si ka duh lo, na ṭhatnâk ruangah bia kamkhat ka chimmi hi ka ngaihpiak dingin kan nawl. 5Zeitintiah hipa hi mi hnahnawk, vulei i Judah mi vialte sinah ṭhennâk chuahtertu Nazaret mi hna lakah an hotu bik a si. 6Ṭempal tiang thurter a timh i kan tlaih, kan phungning in a kong ceih kan timh. 7Asinain ralkap lei bawi Lusia a ra i kan kut chungin zângen in a kan chuh, 8amah sual a phawtu kha na hmaiah ra dingin nawl a kan pêk. Nangmah hrimhrim nih hi sual kan phawtnâk kong hi amah sinin na hngalhkhawh lai,” tiah a ti. 9Judah mi hna nih cu bia cu a dik tiah an pompi. 10Mangki bawi nih bia chim dingin a ti hnu ah Paul nih, “Kum tampi hi miphun hna cungah biaceihtu na si cang ti ka hngalh tikah lunglawm tein keimah tein ka leh lai. 11zeitintiah Pathian bia dingin Jerusalem i ka kal kha ni hleihnih hlei a si rihlo tiah na hngalh khawh lai. 12Ṭempal ah siseh, sinagog ah siseh, khuapi chung zongah siseh, mizapi ca i buainâk chuahter dingin mi ka forh hna zong annih nih an hmu hrimhrim lai lo. 13Asiloah atu i sual phawt anka timhnâk zong hi a dik le dik lo an fianter kho lai lo. 14Asinain na hmai ah ka phuan lai, ‘bu dang’ tiah an chimmi lam ningin pupa hna Pathian ka biak tawn-Nawlbia le Profet vialte hna cauk chung ṭialmi ka zumh. 15Miding le midinglo thawhṭhannâk a um lai tiah Pathian lei ah kâ ruahchan, hi hna zong nih cucu an zumh ve ko. 16Cucaah chia le ṭha hngalhnâk thiang ngeih peng i Pathian le minung hmai i sawi awk um lomi si kâ tim peng. 17“Kum tampi hnuah ka miphun hna sinah thilpêk le raithawinâk tuah awkah ka ra, 18cu thil ka pêkchanh lioah Asia rammi hna nih ṭempal ah thiang tein anka hmuh, mizapi an um lo i hnahnawh lurit a um lo. 19Cu hna nih bia an ngeih ah cun hika ah na hmai ah sual anka puh awk a si. 20Asilole hi hna nih biaceihtu hna hmai i ka dir lioah ka palhmi zeidah chim hna seh, 21hi bia fangkhat ruangah dah ti lo cu, an lak i ka dir lioah khan, “Mithi thawhṭhannâk kongah nihin ah nan hmai ah chalh in ka um,” ka ti hna kha, tiah a ti. 22Felik nih lam kong cu fiang te i a hngalh hnuah, ‘ralbawibik Lusias cu a rak phâk tikah nan kong cu ka ceih te lai,’ tiah a bia cu a chiah ta. 23Paul cu zalong deuh i umter in a hawi le nih an rak zohkhenh le vehvat zong kham loin ven dingah ralbawi pa cu nawl a pêk. 24Cun ni zeimawzat hnuah Felik cu a nupi Judah nu Drusilla he an ra. Paul cu a auhter hna i Krih Jesuh zumhnâk bia cu a ngai. 25Cubangin Paul nih dinnâk, i sumnâk, biaceihnâk a um te laimi kha a chim i Felik nih a ṭihtuk hringhran, “Va kal cang, cân rem ka ngeih tikah kan auh ṭhân te lai,” tiah a ti. 26Paul nih â tlanhnâk dingah phaisa a pêk kha â ruahchanmi a si. Cucaah a auh lengmang i a kawmh tawnnâk cu a si. 27Kumhnih hnuah Porsias Festas nih Felik cu a thlen; cun Felik nih Judah mi hna lung ton a duh caah Paul cu ṭem buin a chiah.
Currently Selected:
ACT 24: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
