ACT 23
23
1Cuticun Paul nih biaceihtu hna cu ṭha tein a zoh peng hna i, “Ule nau hna, nihin tiangin Pathian hmai ah, a dihumnâkin chiaṭha hngalhnâk ṭha he ka nung tawn,” tiah a ti. 2Tlângbawi nganbik Ananias nih Paul pawng i a dirmi hna sinah, a kâ benghpiak dingin nawl a pêk. 3Paul nih, “Nang vampang rantermi pa, Pathian nih an bengh deuh lai. Nawlbia bangin ka kong ceih dingin na ṭhu i nawlbia ning loin bengh ding na ti maw?” tiah a ti. 4A pawng i a dirmi hna nih, ‘Pathian tlângbawi nganbik na sîk lai maw?’ tiah an ti. 5Paul nih, “Unau hna, tlângbawi nganbik a si ka hngalh lo caah a si; ‘Na miphun hotu cungah bia ṭhalo chim hlah,’ tiah ṭial a si,” tiah a ti. 6Paul nih a cheu Sadusih an si i a cheu Farasih an si ti kha a hngalh tikah biaceihnâk ah a au i, “U le nau hna Farasih ka si i Farasih fapa zong ka si. Mithi thawhṭhannâk kong ruahchan ruangah nihin ah chalh in ka um,” tiah a ti. 7Cu bia a chim dih in Farasih le Sadusih kha an rak i el len i biaceihtu hna cu an i ṭhen. 8Zeitintiah Sadusih mi hna nih, ‘Mithi thawhṭhannâk a um lo, vanmi le thlarau zong a um lo, tiah an ti tawn, Farasih mi hna nih a pahnih in a um tiah an pom. 9Cuticun au aw a hung thang, Farasih lei kam in nawlbia cawnpiaktu an tho i, ‘Hi mipa hi a sualnâk zeihmanh kan hngal lo thlarau siseh, vanmi siseh amah an biak a si zongah Pathian ralchanh lei cun cawlcâng hlah usih,” tiah an el hna. 10Cubangin elhnialnâk a tam chin lengmang tikah nawlpetu bawi nih Paul kha an thlehbauh dih sual lai ti a phâng i ralkap kha a sinah vung kal in vung lâk i ralhruang chungah luhpi dingah nawl a pêk hna. 11Cu zanah Bawipa cu a pawngah a dir i, “Paul, hnangam tein um ko. Jerusalem i ka bia na hngalhter bantukin Rom khua zongah na hngalhter awk a si,” tiah a ti. 12A thaizing ah Judah mi cheukhat an i tong i Paul an thah hlan lo zeihmanh eiding lo dingin chiatserh in bia an i kam. 13Cubantuk timhlamhnâk ngeitu hna cu mi 40 renglo an si. 14Tlângbawi hna le upa hna sinah an ra i, ‘Paul kan thah hlan lo cu zeihmanh ei lo dingin bia kan i kam. 15Cucaah nannih nih, biaceihtu hna he amah kong ruat ṭhân ding bangin thaizingah nan sinah ratpi dingah ralkap hotu bawi sinah va chim u, cuticun nan pawng a phâk hlan ah amah that dingin timhcia in kan rak um lai,’ tiah an ti. 16Paul farnu fapa nih a thli te i an bawhnâk kong cu a theih i ralhruang chungah lut in Paul cu a va chimh. 17Paul nih ralbawi pakhat a auh i hi tlangval pa hi nawlpetu bawi sinah kalpi, a sinah a biapi ngaimi chim awk a ngei, tiah a ti. 18Cuticun nawlpetu bawi sinah a kalpi, “Paul, thongtla pa nih a ka auh i hi tlangval pa hi na sinah hruai dingin a ka chimh, na sinah bia chim awk a ngei rua,” tiah a ti. 19Nawlpetu bawi nih a banah a tlaih i a dangah a kalpi, “Zeidah chim ding na ngeihmi cu,” tiah a thli tein a hal. 20Anih nih Paul kong hi ṭha deuh i ruah ṭhan ding bangin thaizing ah biaceihtu hna sinah hruai dingah Judah mi hna nih nawl dingin an hna a tla. 21Asinain an bia rak zum hlah. An lak ah mi 40 renglo nih an bawh, cu mi hna nih amah an thah hlan pauh cu zeihmanh eiding lo dingin chiat an i serh: atu hi na bia hngak in timhcia in an um ko,” tiah a ti. 22Nawlpetu bawi nih tlangval cu a kalter i, “Hi bia hi na ka chimh cang tiah, ahohmanh chim hna hlah,” tiah a ti. 23Cun ralbawi pahnih a auh i, “Zan suimilam pakua ah Sisaria khua tiang i kal dingin ralkap 200, rang citmi 70 he, fei kengmi 200 he, tim tuah,” tiah a ti. 24Mangki bawi Felik sinah him tein a phâk khawh nâkhnga Paul cit ding rang zong rak timhtuah dingin a chimh. 25Hi bangin ca a ṭial. 26“Klaudias Lusian Felik, mangki bawi ṭhabik, Salâm, 27“Hi pa hi Judah mi nih an tlaih i thah an timh lioah ralkap he kan kal i Rommi a si ka hngalh i ka khamh. 28Sual an puhnâk kong hngalh ka duh i an biaceihtu hna hmaiah ka kalpi. 29Anmah nawlbia kong i thil zeimaw ruang men ah a si ti kha ka hngalh, asinain cu kongah thihnâk tiang maw, ṭemnâk tiang zeihmanh a um lo. 30Cun Judah mi hna nih a thli in amah an bawh tiah mi nih anka hngalhter le cângkâ anih cu na sinah ka rak kuat cawlh. Sual puhtu hna zong a cungah bia an ngeimi pauh cu na hmai ah chim dingin nawl ka pêk hna,’ Mangṭha,” tiin. 31Cuticun nawlpêk bangin ralkap hna nih Paul cu a zan a zan in an kalpi i Antipatri khua an phâkpi. 32A thaizing ah a sinah a kal peng ding rang citmi hna kha kaltâk in ralhruang ah an kir ṭhân. 33Sisaria khua kha an phâk tikah, mangki bawi sinah ca cu an pêk i Paul zong a sinah an pêk. 34Mangki bawi nih ca cu a rel dih in, khuazei rammi a si kha a hal i Silisia rammi a si kha a hngalh le cângkâ, 35“Nangmah sual puhtu hna an rak phâk tikah, na bia cu ka ruah lai,” tiah a ti. Cuticun Herod inah kilvennâk tang i chia dingin nawl a pêk hna.
Currently Selected:
ACT 23: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
